what hot now?.fast tamil news with video::best tamil blogs for youngers::Student,

கடற்படை தாக்குதல், தமிழ்நாடு கடற்றொழிலாளர்கள் 8 பேரை காணவில்லை

2008-08-24T09:54:00.000-07:00

இராமேஸ்வரத்தில் இருந்து 5 படகுகளில் தொழிலுக்குச் சென்ற தமிழ்நாடு கடற்றொழிலாளர்கள் மீது சிறீலங்கா கடற்படையினர் நடத்திய தாக்குதலைத் தொடர்ந்து, 8 பேர் காணாமல் போயிருப்பதாக அறிவிக்கப்பட்டுள்ளது.

450 படகுகளில் தொழில் ஈடுபட்டிருந்த தமிழ்நாடு கடற்றொழிலாளர்கள் இன்று அதிகாலை கடற்பரப்பில் வைத்து சிறீலங்கா படையினரால் தாக்கப்பட்டதாக, பாதிக்கப்பட்ட கடற்றொழிலாளரான 48 அகவையுடைய விஸ்வநாதன் தெரிவித்தார். சிறீலங்கா கடற் படையினரது தாக்குதலில் உயிர் பிழைத்தவர்களை தேடும் பணிகளில் இந்திய கரையோர காவல் படையினர் ஈடுபட்டு வருகின்றனர்.

சமாதானப் பேச்சுவார்த்தைக்கு அரசாங்கம் இரகசிய முயற்சி?

2008-08-24T01:10:00.000-07:00

அரசாங்கம் முல்லைத்தீவு மற்றும் கிளிநொச்சி ஆகிய பிரதேசங்கள் தமிழீழ விடுதலைப் புலிகளின் கட்டுப்பாட்டின் கீழ் இருக்கும் சந்தர்ப்பத்தில் சமாதானப் பேச்சுவார்த்தைகளை ஆரம்பிக்க இரகசிய முயற்சியை மேற்கொள்ளவதாக பிரபல சிங்கள வார இதழ் ஒன்று செய்தி வெளியிட்டுள்ளது.

15 ஆவது சார்க் மாநாட்டிற்கு விஜயம் செய்திருந்த இந்திய பிரதமர் மன்மோகன் சிங்கிற்கு இரகசிய வாக்குறுதி அளிக்கப்பட்டதாகத் தெரிவிக்கப்படுகிறது. தீர்வுத் திட்டமொன்று தொடர்பில் இலங்கை அரசாங்கமும், இந்திய அரசாங்கமும் பல தடவைகள் பேச்சுவார்த்தை மேற்கொண்டதாகவும்

வடமத்திய மற்றும் சப்ரகமுவ மாகாணசபைத் தேர்தல்கள் முடிவடைந்த உடன் விடுதலைப் புலிகளுடன் சமாதானப் பேச்சுவார்த்தைகளை ஆரம்பிக்க உத்தேசிக்கப்பட்டுள்ளதாகவும் தெரிவிக்கப்பட்டுள்ளது.

13 ஆவது திருத்தச் சட்டமூலத்தை அடிப்படையாகக் கொண்டு ஓர் தீர்வுத் திட்டம் முன்வைக்கப்பட வேண்டும் என இந்தியப் பிரதமர் கோரிக்கை விடுத்துள்ளதாகவும் முல்லைத்தீவு மற்றும் கிளிநொச்சி ஆகிய பிரதேசங்கள் விடுதலைப் புலிகளின் கட்டுப்பாட்டில் இருக்கும் சந்தர்ப்பத்தில் சமாதானப் பேச்சுவார்த்தைகளை ஆரம்பிக்குமாறு இலங்கைக்கான இந்திய உயர்ஸ்தானிகர் அலோக் பிரசாத் அரசாங்கத்திடம் கோரிக்கை விடுத்துள்ளதாகவும் அதில் தெரிவிக்கப்பட்டுள்ளது.

மகிந்த – கருஜயசூரிய இடையே தடால்--வன்னியில் முதலீடு செய்ய போட்டி

2008-08-24T00:21:00.000-07:00

ஐக்கிய தேசியக் கட்சியின் ஜனநயாக் குழுத்தலைவர் கரு ஜயசூரியவை ஜனாதிபதி மகிந்த ராஜபக்ஷ அவதூறு செய்துள்ளார். குறிப்பாக அமைச்சர் கரு ஜயசூரியவினால் முன்வைக்கப்பட்ட இரண்டு யோசனைகளை ஜனாதிபதி உதாசீனம் செய்ததாகக் குறிப்பிடப்படுகிறது.

விடுதலைப் புலிகளிடமிருந்து விடுவிக்கப்பட்ட பிரதேசங்களுக்கு தொலைபேசி இணைப்புக்கள் வழங்கப்பட வேண்டும் என அமைச்சர் ஜனாதிபதியிடம் வேண்டுகோள் விடுத்தார்.

எனினும், விடுதலைப் புலிகளின் ஆதரவாளர்களே தொலைபேசி இணைப்புக்களை கோரி நிற்பதாக நேரடி நிகழ்ச்சியொன்றின் போது கரு ஜயசூரியவை, ஜனாதிபதி சாடியுள்ளார்.

சிறுபான்மையினருக்கு அதிகாரங்கள் வழங்கப்படும் என்பதில் ஜேர்மன் நம்பிக்கை இழந்துள்ளது

2008-08-23T22:54:00.000-07:00

இலங்கையின் இனப்பிரச்சினையை தீர்ப்பதற்கு தாம் மேற்கொண்டு வந்த முயற்சிகளில் இருந்து ஒதுங்கிக் கொள்வதாக ஜேர்மனி தெரிவித்துள்ளது. இது குறித்து இலங்கைக்கான ஜேர்மனிய தூதுவர் ஜேர்ஜென் வீத் கொழும்பில் நடைபெற்ற நிகழ்வு ஒன்றில் உரையாற்றிய போது,

இனப்பிரச்சினையை தீர்ப்பதற்கு என ஜேர்மனி தெரிவித்து வரும் கோரிக்கைகளையோ அல்லது ஆலோசனைகளையோ தற்போதைய அரசாங்கம் செவிமடுப்பதில்லை. இலங்கையில் பெரும்பான்மை சமூகம் சிறுபான்மை சமூகத்திற்கு அதிகாரங்களை வழங்கும் என்பதில் ஜேர்மனி நம்பிக்கை இழந்துள்ளது எனத் தெரிவித்துள்ளார்.

எந்த ஒரு அரசும் ஆட்சிபுரியும் போது விட்டுக்கொடுப்புக்களை மேற்கொள்ள வேண்டும். ஒரு சமூகத்திற்கு ஆதரவு வழங்குவதை விடுத்து எல்லா சமூகங்களுக்கும் முன்னுரிமை வழங்கப்பட வேண்டும்.

இலங்கையில் இடம்பெற்று வரும் மனித உரிமை மீறல்களை தடுப்பதற்கு இலங்கை அரசாங்கம் சட்டங்களை ஏற்படுத்த வேண்டும். இலங்கையின் ஜனநாயகத்தை அனைத்துலக சமூகம் மதித்தே வந்துள்ளது. ஆனால் தற்போது அந்த நன்மதிப்பு சீர்குலைந்துள்ளது என ஜேர்மனிய தூதுவர் ஜேர்ஜென் வீத் சுட்டிக்காட்டி உள்ளார்.

தமிழ் மக்களை காக்க வேண்டிய பொறுப்பு சர்வதேசத்திற்கு உண்டு

2008-08-23T19:55:00.001-07:00

அரசாங்கம் புலிகளுக்கு எதிரான யுத்தமென்று அரசாங்கம் கூறினாலும் உண்மையில் இது தமிழ் மக்களுக்கு எதிரான யுத்தமே என்று தமிழ்த் தேசியக் கூட்டமைப்பின் நாடாளுமன்ற உறுப்பினர் சுரேஷ் பிரேமச்சந்திரன் கேசரி வார இதழுக்கு வழங்கிய நேர்காண லில் குறிப்பிட்டார். அவரது பேட்டியின் முழு விபரம் வருமாறு:

கேள்வி: இந்திய பிரதமர் இலங்கை வந்திருந்தபோது தமிழ் தேசிய கூட்டமைப்பினரை இந்தியா வரும்படி அழைப்பு விடுத்திருந்தார். இது தொடர்பாக கூட்டமைப்பு அவருடன் தொடர்பு கொண்டதா? கூட்டமைப்பினர் இந்தியா செல்வதன் நோக்கம் என்ன? யார் யார் எப்போது இப்பயணத்தை மேற்கொள்ள உள்ளீர்கள்?

பதில்: இந்திய பயணம் தொடர்பாக பேச்சுவார்த்தைகள் தற்போது நடந்து கொண்டிருக் கின்றன. அநேகமாக அடுத்தமாத நடுப்பகுதியில் இந்தியா செல்வதற்கான திட்டங்களை முன்வைத்துள்ளோம். இந்தியா செல்லும் குழுவில் யார் யார் இடம்பெறுகிறார்கள் என்பது இதுவரையில் தீர்மானிக்கவில்லை.

ஆனால், தமிழ் தேசிய கூட்டமைப்பைச் சேர்ந்த முக்கியமானவர்கள் செல்லலாம். ஏற்கனவே சார்க் மாநாட்டின் போது இந்திய பிரதமர் எமக்கு அழைப்பு விடுத்தார். அதனை தொடர்ந்து இந்திய தூதுவருடன் பேசியுள் ளோம். எனவே இந்திய விஜயம் நிச்சயம் இடம்பெறும். இந்திய விஜயத்தின் நோக்கம் இலங்கையில் தற்போது நிலவும் நெருக்கடியான நிலையில் மாற்றம் ஏற்பட வேண்டும் என்பதே. இலங்கை அரசாங்கம் இன்றுவரை முற்று முழுதாக யுத்தத்தால் தமிழ் மக்களை வெற்றி கொள்வதன் மூலம் இனப்பிரச்சினையைத் தீர்த்துவிடலாம் என்ற நிலைப்பாட் டிலேயே செயற்படுகிறது. அரசாங்கத்தை பொறுத்தவரையில் இது புலிகளுக்கு எதிரான யுத்தமென்று கூறினாலும் கூட உண்மையாக இன்று தமிழர்களுக்கு எதிராகவே இந்த யுத்தம் நடந்து கொண்டு இருக்கிறது. இந்த யுத்தத்தால் இரண்டு இலட்சத்துக்கும் அதிகமான மக்கள் இடம்பெயர்ந்துள்ளனர். நூற்றுக்கணக்கான மக்கள் கொல்லப்பட்டுள்ளனர். இதேவேளை இலங்கை அரசாங்கம் புலிகளுக்கு எதிராகவே யுத்தம் நடத்துகிறோம், தமிழ் மக்களுக்கு எதிராக அல்ல என பொய்யான கருத்துக்களை கூறி வருகிறது.

இந்த அரசாங்கம் தொடர்ச்சியாக தன்னுடைய குடி மக்கள் மீது யுத்தத்தை மேற்கொண்டு நூற்றுக்கணக்கான மக்களை கொலை செய்ததுடன் இலட்சக்கணக்கான மக்களை தொடர்ந்தும் அகதிகளாக்கியுள்ளது.

எனவே அரசாங்கம் மக்கள் மீது இவ்வாறான யுத்த நடவடிக்கைகளை மேற்கொள்கிற போது நிச்சயமாக அதனை நிறுத்துவதற்கு ஏனைய நாடுகளிடம் உதவி கேட்பதில் எந்த விதமான தவறும் இல்லை.

எனவே இலங்கையில் இருக்கக்கூடிய தமிழ் மக்களை காப்பாற்ற வேண்டும். அவர்களுக்கான முழுமையான உரிமைகளைப் பெற்றுக் கொடுக்க வேண்டும் என்ற மனிதாபிமான அடிப்படையில் ஏனைய நாடுகள் இதற்கு உதவி செய்ய வேண்டும்.சர்வதேச சட்டங்களின் பிரகாரம் ஐக்கிய நாடுகளின் சாசனங்களின் பிரகாரம், எந்த ஒரு இனத்தையும் அழிக்கும் உரிமை எந்த ஒரு அரசிற்கும் இல்லை . எனவே இதன் அடிப்படையில் இலங்கை தமிழ் மக்களை காப்பாற்ற வேண்டிய பொறுப்பும் கடமையும் சர்வதேச சமூகத்திற்கு உள்ளது.

எனவே, இவ்விடயம் தொடர்பாக தெளிவாக பேசுவதற்காகவே நாங்கள் இந்திய பயணத்தை ?ன்öனடுக்க உள்ளோம்.

கேள்வி: தற்போது யுத்தத்தால் இடம்பெயர்ந்த மக்கள் தொடர்பாக தமிழ் தேசிய கூட்டமைப்பு எவ்வாறான நடவடிக்கைகளை மேற்கொண்டுள்ளது. இதேவேளை இம்மக்களின் நிலையினை சர்வதேச சமூகத்திடம் கொண்டு செல்ல எவ்வாறான நடவடிக்கை முன்னெடுக்கப்பட்டுள்ளது?

பதில்: ஏற்கனவே கொழும்பில் இருக்கின்ற ஐக்கிய நாடுகள் தூதுவரõலயத்துடன் இது தொடர்பாக பேசி இருக்கின்றோம். வெளிநாடுகளின் தூதுவர்களிடம் இது தொடர்பாக பேசிக்கொண்டிருக்கிறோம். நிச்சயமாக உலக நாடுகளுக்கு இலங்கை யுத்தத்தால் மிக மோச மான இடப்பெயர்வுகள் இடம்பெற்றுள்மை நன்கு தெரியும். இது தவிர, சாப்பிட வழி இல்லாமலும் தங்க இடம் இல்லாமலும் மக்கள் மர நிழல்களில் தஞ்சம் புகுந்துமுள்ளனர். குறுகிய காலப்பகுதிக்குள் பாரிய இடப்பெயர்வு இடம்பெற்றுள்ளது.

மன்னார் பெருநில பரப்பில் மக்கள் முழுமையாக விரட்டி அடிக்கப்பட்டுள்ளனர். இதேபோல், வவுனியா பெருநிலப்பரப்பில் இருந்தும் இராணுவத்தினரால் மக்கள் விரட்டி அடிக்கப்பட்டுள்ளனர்.

எனவே பா?யளவில் மிக பாரதூரமான அளவில் இடம்பெயர்வுகள் இடம்பெற்றுள்ளன.

வன்னிப் பரப்பென்பது பாரிய கட்டிடங்களை கொண்ட இடமல்ல. சிறிய குடிசைகளும் வீடுகளுமே பெருமளவில் உள்ளன. இந்நிலையில் மக்களை தங்கவைப்பதற்கு இடவசதிகள் அங்கு இல்லை. எனவே சர்வதேச தொண்டு நிறுவனங்களும் இலங்கை அரசாங்கமுமே அவர்கள் தங்குவதற்கான வசதிகளை செய்து கொடுக்க வேண்டும். ஆனால், அம்மக்களுக் கான தங்குமிட வசதிகள் இதுவரையில் கிடைக்கவில்லை. காரணம் வன்னி நிலப்பரப்பிற்கு செல்லும் அரச சார்பற்ற நிறுவனங்கள் அரசாங்கத்தால் கட்டுப்படுத்தப்பட்டுள்ளன.

அத்துடன் கொண்டு செல்லும் பொருட்களும் கட்டுப்படுத்தப்பட்டுள்ளன.

இந்நிலையில் முறிகண்டி தொடக்கம் கிளிநொச்சி வரையான வீதியில் மக்கள் இரு மருங்கிலும் தங்க வசதியின்றி மரநிழலிலேயே தங்கும் நிலைமை தொடர்கிறது.

எனவே இது தொடர்பாக சர்வதேச சமூகத்திடமும் ஐக்கிய நாடுகள் தூதுவராலயத்திடமும் தெரிவித்துள்ளோம். நிச்சயமாக இவ்வாறான நிலைமைகள் நிறுத்தப்பட வேண்டும் என எதிர்பார்க்கப்படுமானால், முதலில் யுத்தம் முடிவுக்குக் கொண்டுவரப்பட வேண்டும்.

இன்று இலங்கை அரசாங்கம் இடம்பெயர்வு பற்றியோ மக்கள் அகதிகளாக்கப்பட்டது பற்றியோ எந்த ஒரு அக்கறையும் இல்லாத நிலையில் யுத்தத்தை நடத்திக் கொண்டிருக்கின்றது. இன்னும் கூறப் போனால், இலங்கை அரசாங்கம் மிக மோசமான பொய்களையும் கூறுகின்றது.

இடம்பெயர்ந்த மக்களுக்கு தேவையான உணவுப் பொருட்கள் வழங்கப்படுவதாகவும் அம்மக்களுக்கு எந்தவிதமான பிரச்சினையும் இல்லாமல் பாதுகாப்பாக இரு க்கின்றார்கள் என்றும் அரசாங்கத்தை பாதுகாப்பதற்காக பொய்களை கூறிவரு கிறது. ஆனால், உண்மையிலேயே ஒரு நாட்டின் குடி மக்களை மிக மோசமாக விரட்டி அடிக்கும் நடவடிக்கை இந்நாட்டில் மட்டுமே நடைபெற்று வருகின்றது.

ஒரு புறம் மக்களை விரட்டி அடித்துக் கொண்டு, இன்னுமொரு புறம் அம்மக்கள் எல்லோரும் சுகபோகமாக வாழ்கின்றனர் என்பது போல இலங்கை அரசாங்கம் வெளி உலகத்திற்கு காட்ட முயற்சி செய்கிறது. நிச்சயமாக அம்மக்களுக்கு எந்தவித அடிப்படை வசதியும் இல்லை. அம்மக்கள் வறுமை என்ற எல்லைக்குள்ளேயே வாழ்ந்துகொண்டிருக் கின்ற நிலையில் மீண்டும் மீண்டும் அவர்கள் தாக்கப்படுகின்றனர்.

வன்னி பகுதியில் மீன்பிடிப்பதற்கான தடை விதிக்கப்பட்டிருந்தது. இதுதவிர விவசாயத்தை முன்னெடுப்பதற்கு உரமோ மருந்து வøககளோ கொண்டு செல்வதற்கு இலங்கை அரசாங்கத்தால் அனுமதிக்கப்படவில்லை.

எனவே அவர்கள் எல்லாவகையிலும் மிகவும் பாதிக்கப்பட்ட நிலையிலேயே இருக்கின்றனர்.

இந்நிலையில் இலங்கை அரசாங்கம் மக்களை எதுவித வசதிகளுமற்ற நிலையில் நடுத் தெருவிற்கு கொண்டுவந்துள்ளது.

இம்மக்களின் அவலத்தை பார்த்து விடுதலைப் புலிகள் கூட நாங்கள் பேசுவதற்கு தயாராக இருக்கிறோம் யுத்தத்தை நிறுத்துங்கள் என்று கூட கேட்டனர். இது தொடர்பாக உலக நாடுகள் கூட பல தடவைகள் இலங்கை அரசாங்கத் திடம் யுத்தத்தை நிறுத்திவிட்டு பேச்சுவார்த்தைக்கு வாருங்கள் என அழுத்தத்தை கொடுத்துள்ளன. ஆனால், இலங்கை அரசாங்கத்தின் முடிவு முற்று முழுதாக இந்த யுத்தத்தை நடத்தி முடிப்பதே.

ஏற்கனவே கடந்த 25 வருடமாக நடந்த யுத்தத்தில் பத்து இலட்சத்துக்கு அதிகமான மக்கள் வெளிநாட்டிற்கு அகதிகளாக சென்று விட்டனர். எனவே, இலங்கை அரசாங்கத்தால் மக்கள் விரட்டப்பட்டுள்ளனர்.

அதேபோலவே இன்னும் தொடர்ச்சியாக இந்த விடயம் நடந்து வருகின்றது.

கிழக்கு மாகாணத்தை தமது கட்டுப்பாட்டுக்குள் கொண்டு வருவதற்கு 2 இலட்சம் மக்கள் அகதியாக்கப்பட்டுள்ளனர். அவர்கள் இதுவரையில் முழுமையாக குடியேற்றப்படவில்லை. மூதூரில் 22 கிராமத்தை சேர்ந்த மக்கள் குடியேற்றப்பட நிலையில் தற்போது வடக்கு பகுதியில் உள்ள மக்கள் அகதிகளாக்கப்பட்டுள்ளனர்.

எனவே, இவ்விடயங்கள் அனைத்தையும் மிக தெளிவாக சர்வதேச சமூகத்திடம் சொல்லி இருக்கிறோம். இன்னும் சொல்லிக் கொண்டிருக்கிறோம்.

நிச்சயமாக இந்திய அரசிற்கு இந்த விடயங்கள் பற்றி தெரியும். நாங்கள் இது தொடர்பாக இந்திய அரசுடனும் எதிர்க்கட்சி மற்றும் ஏனைய தலைமைக் கட்சிகளுடனும் பேச்சுவார்த்தை நடத்துவோம்.

கேள்வி: வன்னியில் மக்கள் அகதிகளாக மர நிழல்களில் தங்கி இருப்பதாக கூறப்படுவது பொய் என அரசாங்கம் கூறுகின்றதே.

இது பற்றி உங்களது கருத்து என்ன?

பதில்: இந்த அரசாங்கம் இதுவரையில் உண்மை பேசி இருக்கிறது என நம்புவதற்கு யாரும் தயாராக இல்லாத நிலையில், யுத்தம் தொடர்பான செய்திகள் பற்றி பார்ப்போமானால் மக்களுக்கு கூறப்படும் ஒரே ஒரு விடயம் "நாங்கள் யுத்தத்தில் வெற்றி பெற்றுக்கொண்டுள்ளோம். நாங்கள் வாகரையை பிடித்து விட்டோம். கிளிநொச்சிவரை சென்றுள்ளோம்' என்பவையே. யுத்தத்தில் எத்தனை இராணுவ வீரர்கள் கொல்லப்பட்டனர்.

எத்தனை பேர் காயமடைந்தார்கள் என்பன சிங்கள மக்களுக்கு கூறப்படவில்லை. சிங்கள மக்களுக்கு இனவெறி ஊட்டப்பட்டுள்ளது.

தமிழர்களை கொல்வதன் மூலம் தாங்கள் துட்டகைமுனுவின் வாரிசுகளாக தங்களைக் காட்டிக் கொள்ள விரும்புகின்றனர். எனவே, சிங்கள மக்களும் அதனை ஏற்றுக்கொள்கின்றனர். உண்மையில் இந்த நாட்டில் இருக்கும் மக்களில் சிங்கள மக்களுக்கு இருக்கக்கூடிய அனைத்து உரிமைகளும் தமிழ் மக்களுக்கும் இருக்க வேண்டும். அதனை தமிழ் மக்களும் பெற்றுக் கொள்ளும் போதே இப்பிரச்சினைக்கு ஒரு தீர்வு கிடைக்கும் என மக்கள் எண்ணுவதாக இல்லை. அல்லது மக்களை யோசிப்பதற்கு அரசாங்கமும் அரசியல் கட்சிகளும் விடுவதாய் இல்லை. அது இடதுசாரி பேசக்கூடிய ஜே.வி.பி.யாகவும் இருக்கலாம்.

மிக மோசமாக இனவாதத்தை பேசக்கூடிய சில பௌத்த பிக்குகளாகவும் இருக்கலாம்.

இதுதவிர ஐக்கிய தேசியக் கட்சியாகவும் இருக்கலாம். இந்நிலையில் இலங்கையை ஆள விரும்புகின்ற, எல்லா கட்சிகளுக்கும் தமிழர்களுக்கு எதிராகவும், தமிழர்களை அழிப்பதன் ஊடாகவும் தமிழ் விரோத கருத்துக்களை கொண்டுவருவதன் மூலமாகவும் தான் அரசாட்சியை கைப்பற்ற முடியும் என்றதொரு துர்ப்பாக்கிய நிலை ஆண்டாண்டு காலமாக இலங்கையில் நிலவி வருகின்றது.

இன்று மஹிந்த சமரசிங்க சொல்கிறார் இடம்பெயர்ந்த மக்களுக்கு தேவையான பொருட்கள் எல்லாம் சென்று கொண்டு செல்லப்பட்டுள்ளது. அங்கு எந்த பிரச்சினையும் இல்லை என. ஆனால், இவர் நேரே சென்று பார்த்தால் எத்தனை ஆயிரம் மக்கள் தங்க இடமின்றி மரநிழலில் இருக்கிறார்கள் என்பது தெரியும்.

இது தொடர்பாக சர்வதேச சமூகத்திற்கு கூறுவதற்கு பல கருத்துக்களை வைத்துள்ளனர். இவர்கள் எத்தனைமுறை அங்கு எதுவித பிரச்சினையும் இல்லை என்று கூறினாலும் அங்கு இருக்கக்கூடிய சர்வதேச நிறுவனங்களுக்கு உண்மையில் அங்கு என்ன நடைபெறுகிறது என்பது தெரியும்.

கேள்வி: வன்னியில் உணவு போதிய கையிருப்பில் இருப்பதாக அரசாங்க அதிபர் தெரிவிப்பதாகவும் மக்களின் நலன் கருதி தினம் 20 லொறிகளில் வன்னிக்கு உணவு அனுப்பி வைப்பதாகவும் அரசாங்கம் கூறுகிறது. இதன் உண்மை தன்மை பற்றி விளக்கமுடியுமா?

பதில்: முல்லைத்தீவு, கிளிநொச்சி, வவுனியா ஆகிய பகுதிகளில் கிட்டத்தட்ட நான்கு இலட்சம் மக்கள் வாழ்கின்ற நிலையில் 20 லொறிகள் தான் போகின்றது என்றால், அந்த பொருட்கள் எவ்வளவு காலத்திற்கு போதும் என்னென்ன பொருட்கள் போகின்றன என்பது கேள்வி குறியே.

முக்கியமாக அம்மக்களுக்கு தங்குவதற்குக் கூடாரம் வேண்டும். உணவு வேண்டும். குழந்தைகளுக்கு பால்மா வேண்டும். நான் அறிந்த வகையில் அங்கு குழந்தைகளுக்கு எந்த வகையான பால்மாவும் இல்லை. அரிசியையும் பருப்பையும் மட்டும் கொண்டு செல்ல அனுமதியை வழங்கிவிட்டு

"நாம் மக்களுக்கு அனைத்து வசதிகளையும் செய்து கொடுத்து விட்டோம். 20 லொறிகளில் பொருட்கள் அனுப்புகிறோம் ' என கூறி கொள்வதில் எந்த உண்மையும் இல்லை. பொதுவாக அங்கு குழந்தைகளுக்கான பால் மா இல்லாத பிரச்சினை இருக்கிறது. மக்களது உயிர் காக்கும் மருந்து இல்லாத பிரச்சினை இருக்கிறது. இதுவரை முல்லைத்தீவிலும், கிளிநொச்சியிலும் உள்ள வைத்தியசாலைக்கு மின்சாரம் இல்லாத பிரச்சினை உள்ளது. இதனால், கையிருப்பில் உள்ள மருந்துகளை பாதுகாக்க முடியாத நிலை உள்ளது.

ஆகவே, பிரச்சினைகள் என்று பார்த்தால் அங்கு ஆயிரம் பிரச்சினைகள் உள்ளன. ஆனால், அரசாங்க அதிபர் இல்லை என்றே பதிலளிக்கிறார். காரணம் அரசாங்க அதிபர் என்பவர் ஒரு அரசாங்க ஊழியர்.

அவர் அரசாங்கம் சொல்வதையே கூறுவார்.

இந்நிலையில் அவர் தமிழர்களுக்காக பேசுவார் என எதிர்பார்க்க முடியாது. அவர் அரசாங்கத்தை எதிர்த்து தமிழர்களுக்காக பேசுவாரானால் அவருடைய பதவி பறிக்கப்படும்.

எனவே அரசாங்கம் கூறுவதையே அரசாங்க அதிபர் கூறுவார். 20 லொறிகள் போனது உண்மைதான். ஆனால், அந்த ö லாறியில் அம்மக்களுக்கான முக்கியமான உணவுகள், மருந்துகள் குழந்தைகளுக்கான பால் மா என ஏற்று கொள்ள முடியாது.

காரணம் இவற்றுக்கான தட்டுப்பாடு தற்போதும் அங்கு நிலவுகின்றது. இதுதவிர அப்பகுதிகளில் நாளாந்தம் ஷெல் தாக்குதல் நடைபெறுகிறது. இவற்றின் மூலம் பாதிக்கப்படுபவர்கள் புலிகளோ புலிகளின் உறுப்பினர்களோ அல்ல. இவற்றில் அதிகளவில் பாதிக்கப்படுபவர்கள் அப்பாவி மக்களே. எனவே இவர்களுக்கு சிகிச்சை அளிப்பதற்கான மருந்துகளை கூட கொண்டு செல்வதற்காக அரசாங்கம் தடை விதித்துள்ளது.

இதேவளை மக்களுக்கு தேவையான மருந்துகள் கொழும்பிலிருந்து அனுப்பப்பட்டும் வவுனியாவில் அனுமதிக்கப்பட்டாமல் தடுத்து வைக்கப்பட்டுள்ளன.

நாங்கள் ஏற்கனவே கிழக்கு மாகாணத்தில் அரசாங்கத்தின் செயற்பாடுகளை பார்த்துள்ளோம். வாகரையில் தொடர்ச்சியாக குண்டு வீசி அம்மக்களை தாக்கி அவர்களுக்கு உணவு அனுப்பாமல் அவர்களை இராணுவ கட்டுப்பாட்டுப்பகுதிக்குö காண்டு வர வேண்டும் என்ற நோக்கில் 300க்கும் மேற்பட்ட மக்கள் கொல்லப்பட்டுள்ளனர்.

இது தொடர்பாக நாடாளுமன்றத்தில் அறிக்கையினை நாங்கள் சமர்ப்பித்திருக்கிறோம். மக்களை மிக மோசமான முறையில் அங்கிருந்து விரட்டி விட்டு நாங்கள் வாகரையை பிடித்து விட்டோம் என கூறியது. அதேபோன்ற செயற்பாடே இன்று இங்கும் நடைபெற்றுக் கொண்டுள்ளது.

மக்களின் மீது மோசமானதும் மோசடித்தனமான தாக்குதலை நடத்துகின்ற நடவடிக்கைகளையே இன்று இந்த அரசாங்கம் முன்னெடுத்து வருகிறது. எனவே, இந்த அரசாங்கம் கூறுவதிலோ அரசாங்க அதிபர்கள் கூறுவதிலோ எந்த உண்மையும் இல்லை.

கேள்வி: தமிழ் தேசிய கூட்டமைப்பை பிளவுபடுத்த சில சக்திகள் முயல்வதாக ஸ்ரீகாந்தா எம்.பி. அண்மையில் குற்றம் சாட்டியுள்ளார். அந்த சக்தி என்ன? இதுபற்றி உங்களுடைய கருத்து என்ன என்பதை கூற முடியுமா?

பதில்: இதுவரையில் எனது அறிவுக்கு எட்டிய வகையில் எனக்கு கிடைக்கின்ற தகவல்களின் அடிப்படையில் தமிழ் கூட்டமைப்பில் ஒரு பிளவு வரும் என நான் கருதவில்லை.

சில வேளைகளில் ஸ்ரீகாந்தாவிற்கு யாராவது இடையூறு விளைவிப்பது அவருக்கு தெரிந்திருக்கலாம். இல்லை என நான் கூறமாட்டேன்.

ஆனால், என்னை பொறுத்தவரையில் தமிழ்த் தேசியக் கூட்டமைப்பு தமிழ் மக்களுடைய உரிமைகளை, தமிழ் மக்களினுடைய அபிலாஷகளை ஏற்றுக்கொள்ளக்கூடியது தமிழ் மக்களுக்கு ஒரு தீர்வு கிடைக்கும் வரையில் நிச்சயமாக அவர்களுடைய கூட்டு என்பது பாதுகாக்கப்படும். அவர்கள் ஒற்றுமையும் பாதுகாக்கப்படும்.

இலங்கை மண்ணில் சமாந்தரமாக பயணிக்கும் யுத்தமும் தேர்தலும் - இதயச்சந்திரன்

2008-08-23T19:25:00.000-07:00

சத்தியத்திற்குப் பின்னால் அணி வகுத்து நிற்கும் உலகத் தமிழர்களின் அரசியல் அபிலாஷை நிச்சயம் வெற்றியடையும்.

புலம்பெயர் மக்கள் வாழும் நாடொன்றில் இயங்கும் தொலைக்காட்சி ஒன்றிற்கு, திருகோணமலை நாடாளுமன்ற உறுப்பினரும் தமிழ் தேசியக் கூட்டமைப்பின் தலைவருமாகிய இரா. சம்பந்தன் வழங்கிய நேர்காணலில் கூறப்பட்ட விடயமே இது.

மிகவும் ஆழமான அத்திவாரத்தில் கட்டியெழுப்பப்பட்ட இப் போராட்டம், உண்மையின் தரிசனத்தில் வேரூன்றி இருப்பதால் வெற்றிப் பாதையில் பயணிக்குமென்பதே அவரின் உறுதியான நம்பிக்கை.

அரசால் முன்னெடுக்கப்படும் கிழக்கு அபிவிருத்தி குறித்து எழுப்பப்பட்ட கேள்வி ஒன்றிற்கு தெளிவான பதிலையும் அவர் முன்வைத்தார்.

மூதூர் கிழக்கிலிருந்து வெளியேற்றப்பட்ட 2000 குடும்பங்களிற்கு எந்தவிதமான நிவாரணங்களும் இதுவரை வழங்கப்படவில்லை.

அபிவிருத்தி என்பது அங்கு பூர்வீகமாக வாழ்ந்த மக்களிற்குக் கிடைக்கவில்லை.
துரத்தியடிக்கப்பட்ட மக்கள் வாழ்ந்த பூமியில், இராணுவத்திலிருந்து இளைப்பாறியவர்களைக் குடியமர்த்துவது அபிவிருத்தி ஆகாது.

தெருக்களையும், நீண்ட நெடுஞ்சாலைகளையும் அமைத்து, திட்டமிட்ட சிங்களக் குடியேற்றங்களை செயற்படுத்துவதே அபிவிருத்தி என்கிறது அரசு.

தமிழ், முஸ்லிம்களின் குடியிருப்புக் காணிகளில் பாதை அமைப்பது நிலப்பறிப்பா? அல்லது அபிவிருத்தியா? என்கிற கேள்வியையும் சம்பந்தன் முன்வைத்தார்.

தமிழ் மக்களால் ஜனநாயக முறைமையில் தெரிவு செய்யப்பட்ட நாடாளுமன்ற பிரதிநிதியின் கருத்துக்களை செவிமடுக்கும் நிலையில் அகண்ட பாரதத்தின் ஜனநாயகத் தலைமைகள் இல்லையென்பது வேறு விடயம்.

அரசாங்கத்தால் விடுவிக்கப்பட்ட தமிழ் மக்களின் பூர்வீக நிலங்களில் துணைப்படையின் துணையோடு ஜனநாயகத்தை நிலைநிறுத்தும்படி ஆதரவு வழங்குகிறது இந்திய, அமெரிக்க வல்லரசுகள்.

மாகாண சபைத் தேர்தல்கள் வரும்போது, பதிவு செய்யப்பட்ட ஒலிப்பதிவு நாடாவை இயக்கி விடுவார் அமெரிக்கத் தூதர் றொபேட் ஓ பிளேக். நேர்மையான, சுதந்திரமான தேர்தல் ஸ்ரீலங்காவில் நடைபெற வேண்டுமென கிழக்குத் தேர்தலின் போது கூறினார்.

தற்போதைய வடமத்திய, சப்ரகமுவ
மாகாண சபைத் தேர்தலின் போதும் அதையே திரும்பவும் கூறுகிறார்.
படை நடவடிக்கைகள் எவ்வாறு இருந்தாலும் தமிழ் மக்கள் மரங்களின் கீழ் ஏதிலியாக வாழ்ந்தாலும் உலக மகா ஜனநாயகத்தைக் காப்பாற்ற, தேர்தலை நடத்துங்களென்பதே அமெரிக்காவினதும், இந்தியாவினதும் வேண்டுதல்.

வடக்கை முழுமையாக வெற்றி கொள்ள ஒரு வருடம் தேவையெனக் கூறியவாறு, யாழ். குடாவில் உள்ளூராட்சி சபைத் தேர்தல்களை நடத்தப் போவதாக ஜனாதிபதி அறிவித்துள்ளார். யுத்தமும், தேர்தலும் சமாந்தரமாகப் பயணிக்கும் உத்தியை, தற்போது பிரயோகிக்கும் அரசு, வல்லரசுகளின் மீது மனித உரிமை சங்கங்கள் செலுத்தும் அழுத்தங்களை திசை திருப்புமென எடைபோடுகிறது.

தேர்தல் திருவிழாக்கள் தொடர்ச்சியாக நடைபெற்றால், ஸ்ரீலங்காவில் ஜனநாயக விழுமியங்கள் இன்னமும் அழியவில்லையென்று உலகம் நம்புமென அரசு சிந்திக்கிறது.

கடன் பெறுவதற்குப் பயன்படும் தேர்தல்கள், இன அழிப்பு வெளிப்பாடுகளை மூடி மறைக்கவும் உபயோகப்படுகிறதென கூறிக் கொள்ளலாம்.

விடுதலைப் போராட்டமும், இன அழிப்பு நிலையும், இருபெரும் முரண் அடையாளங்களாக ஸ்ரீலங்காவில் இனங்காணப்படுகின்றன.

அவலத்தில் சிக்கித் தவிக்கும் வன்னி மக்களுக்குத் தேவையான அவசர நிவாரணப்
பொருட்கள் சென்றடையவிடாமல், சிங்களம் தடுப்பதாக சர்வதேச மன்னிப்புச்சபை விடுத்த அறிக்கையால், அனர்த்த முகாமைத்துவ மற்றும் மனித உரிமைகள் அமைச்சின் செயலாளர் கலாநிதி ரஜீவ விஜேசிங்க விசனமடைந்துள்ளார்.

அந்த அறிக்கையை மீளப் பெறும்படி அவசர வேண்டுகோள் ஒன்றினையும், சர்வதேச மன்னிப்புச் சபைக்கு அவர் விடுத்துள்ளார்.

இந்த அபத்தமான வேண்டுகோளை செவிமடுக்கும் மன்னிப்புச் சபை, உறுதியான மேலதிக அழுத்தங்களை அரசின் மீது செலுத்த வேண்டுமென்பதே மரணத்தின் விளிம்பில் அவஸ்தைப்படும் வன்னி மக்களின் எதிர்பார்ப்பு.

வாகரையில் பிரயோகித்த அதேவகையான, வெளியேற்றும் தந்திரத்தை, மன்னாரில் நிறைவேற்ற முடியாமல் ஏமாற்றமடைந்திருக்கும் அரசு, பொருளாதாரத் தடையை இறுக்கி, மக்களைப் பிதுக்கி வெளியே தள்ளும் உத்தியை பிரயோகிக்கிறது.

வெறுமனே மன்னிப்புச் சபைகளும், தூதர்களும் அபிப்பிராயங்களை உதிர்த்து விட்டுப் போவது, துயர்படும் மக்களை ஆசுவாசப்படுத்தாது. யுத்தப் பிரதேசத்தில் பொதுமக்கள் பாதிப்படையக் கூடாதென்கிற ஐ.நா.வின் சாசனத்தையாவது சிங்களத்திடம் இவர்கள் கூறலாம்.

விடுதலைப் புலிகளின் கட்டுப்பாட்டுப் பிரதேசத்தை நோக்கியே நாம் நகர்வோம் என்கிற விடயமும் மக்களின் ஜனநாயக உரிமைதான்.

ஆகவே அரசு நியாயப்படுத்தும் பயங்கரவாதத்திற்கெதிரான ஜனநாயகத்தை நிலைநாட்டும் போரில் தமிழ் மக்கள் எவர் பக்கமென்பது தெளிவாகப் புலப்படுகிறது.

அதேவேளை விடுதலைப் புலிகளுக்கு அழுத்தம் கொடுத்து, இராணுவப் பிரதேசத்திற்கு மக்களை வரவழையுங்களென்று சர்வதேச மன்னிப்புச் சபையிடம் அரசு வேண்டுகோள் விடுப்பதிலிருந்து மக்கள் எவரோடு இணைந்துள்ளார்களென்பது தெளிவாகிறது.

அரசியல் துறையினரின் அழைப்பை ஏற்று ஆயிரக்கணக்கான முன்னாள் போராளிகள், விடுதலைப் புலிகளோடு இணைவதும், பரந்துபட்ட மக்கள், போரெழுச்சி கொண்டு அணிதிரள்வதும், நடைபெறப் போகும் கோரமான யுத்தத்தின் அழிவுப் பரிமாணங்களை தெற்கிற்குக் கோடிட்டுக் காட்டுகிறது.

தொலைந்த இடத்தில்தான் வாழ்வைத் தேட வேண்டும். மக்களின் ஒன்றுகூடல் விளம்பும், கருத்துநிலையும் இதுதான்.

கடல்வழி வழங்கலை அழித்து, பன்முனைத் தாக்குதலை தொடர்ச்சியாகத் தொடுத்து படைநகர்வுகளை முடக்க வான்வெளி தாக்குதலை நிகழ்த்தி, விடுதலைப் புலிகளின் மரபுசார் படையணியைத் தற்காப்பு நிலைக்குள் வைத்திருக்கலாமென்பதே சரத் பொன்சேகாவின் போர் மூலோபாயம். பலவீனமான பகுதிக்குள் நகர்வினை மேற்கொள்ளல் என்பது அவரின் தந்திரோபாய உத்தி.

எதிர்ப்பு இல்லாமல் நடந்து சென்றால், அகலக்கால் பரப்ப அவகாசம் கொடுக்கப்பட்டுள்ளதென்று கருதலாம். இவைதான் இராணுவ மூலோபாயங்கள் எதிர்கொள்ளும் சில யதார்த்தங் கள். ஜெயசிக்குறுவின் “ஒட்டிசுட்டான்’ மன்னாரிற்கு எதுவென்று தெரியவில்லை. அதிகம் எழுதினால் அரசாங்கத்திற்குப் பிடிக்காது. சில புலம்பெயர் பத்திரிகைகளுக்கும் நெஞ்செரிவு வரும். களையெடுத்து, ஊடகத்துறையை சுத்தம் பண்ணப் புறப்பட்டு விடுவார்கள் சில “கிருஷ்ண’ துர்வாசகர்கள்.

இருப்பினும் புலம்பெயர் மக்கள் வாழும் நாடுகளில் இயக்கும் ஊடகங்கள் அனைத்தும், ஒருமித்த குரலில், அக்னிக் களத்துப் புதல்வர்களுக்கும், மரணத்தின் விளிம்பில் தவிக்கும் இடம்பெயர்ந்த மக்களுக்கும் ஆதரவு தெரிவிப்பது ஆறுதலான விடயம். இன்னமும் வேர் அறவில்லை.

இலங்கை மாகாண சபை தேர்தலில் ஆளும் கட்சி அமோக வெற்றி

2008-08-23T19:07:00.000-07:00

சபரகமுவ மற்றும் வடமத்திய மாகாணசபைகளுக்காக நேற்று நடைபெற்ற தேர்தலின் தற்போதைய முடிவுகளின்படி ஆளும் ஐக்கிய மக்கள் சுதந்திர முன்னணி அனைத்து தொகுதிகளிலும் முன்னிலை பெற்றுள்ளது.

மாவட்ட அடிப்படையில் முழுமை தகவல் வெளியாகியுள்ள வடமத்திய மாகாணத்தில் பொலநறுவ மாவட்டத்தில் ஐக்கிய மக்கள் சுதந்திர முன்னணி மொத்தமுள்ள 10 ஆசனங்களில் 6 ஆசனங்களை ஐக்கிய மக்கள் சுதந்திர முன்னணி பெற்றுள்ளது.

ஐக்கிய தேசிய கட்சி 4 ஆசனங்களை கைப்பற்றியுள்ள அதேவேளை ஜே.வி.பிக்கு ஆசனங்கள் எதுவும் கிடைக்கவில்லை.

இதனை தவிர அனுராதபுர மாவட்டத்தின் மதவாச்சி தேர்தல் தொகுதி, பொலநறுவை மாவட்டம் மெதிரிகிரிய தேர்தல் தொகுதி மின்னேரிய தேர்தல் தொகுதி, அநுராதபுரத்தின் மிகிந்தலை தேர்தல் தொகுதி ஆகியவற்றிலும் ஐக்கிய மக்கள் சுதந்திர முன்னணி பெற்றுள்ளது.

சப்பரகமுவ மாகாணத்தில் கேகாலை மாவட்டம் அரநாயக்க தேர்தல் தொகுதி, ரத்தினபுரி மாவட்டத்தின் பலாங்கொடை தேர்தல் தொகுதி கேகாலை மாவட்டத் கேகாலை தேர்தல் தொகுதி, ரத்தினபுரி மாவட்டம் நிவித்திகல தேர்தல் தொகுதி போன்ற இடங்களிலும் ஐக்கிய மக்கள் சுதந்திர கூட்டணி முன்னிலையை பெற்றுள்ளது.

ஆறுமுகம் தொண்டமான் தலைமையிலான இலங்கை தொழிலாளர் காங்கிரஸ் ரத்தினபுரி மாவட்ட அஞ்சல் வாக்குகளில் 34 வாக்குகளை பெற்றுள்ளது.
பி. சந்திரசேகரன் தலைமையிலான மலையக மக்கள் முன்னணி 2 வாக்குகளை பெற்றுள்ளது.

கேகாலை மாவட்ட அஞ்சல் வாக்களிப்புகளில் இலங்கை தொழிலாளர் காங்கிரஸ் 34 வாக்குகளை பெற்றுள்ளது.

கேகாலை அரநாயக்க தேர்தல் தொகுதியில் இலங்கை தொழிலாளர் காங்ரஸ் 91 வாக்குகளை பெற்றுள்ளது.
ரத்தினபுரி பலாங்கொடை தேர்தல் தொகுதியில் இலங்கை தொழிலாளர் காங்ரஸ் 81 வாக்குகளையும் மலையக மக்கள் முன்னணி 332 வாக்குகளையும் பெற்றுள்ளன.

கேகாலை தேர்தல் தொகுதியில் இலங்கை தொழிலாளர் காங்ரஸ் 68 வாக்குகளைப் பெற்றுள்ளது.
ரதத்தினபுரி நிவித்திகலை தேர்தல் தொகுதியில் இலங்கை தொழிலாளர் காங்ரஸ் 681 வாக்குகளைப் பெற்றுள்ளது.
இதேவேளை பொலனறுவை மெதிரிகிரிய தேர்தல் தொகுதியில் ஏ. எல். எம். அத்தாவுல்லா தலைமையிலான தேசிய காங்கிரஸ் 796 வாக்குகளைப் பெற்றுள்ளது.

பொலனறுவ அஞ்சல் மூல வாக்குவாக்குகளில் இந்த கட்சி 36 வாக்குகளைப் பெற்றுள்ளது.

அநுராதபுர மதவாச்சி தேர்தல் தொகுதியில் தேசிய காங்கிரஸிற்கு 231 வாக்குகள் கிடைத்துள்ளன.

மிகிந்தலையில் 440 வாக்குகளும் மெதிரிகிரயவில் 796 வாக்குகளை தேசிய காங்கிரஸ் பெற்றுள்ளது.

கள்ள வாக்கை அளிக்க முயற்சித்த சுதந்திரக் கூட்டமைப்பின் நாடாளுமன்ற உறுப்பினர் தாக்கப்பட்டுள்ளார்

2008-08-23T10:08:00.000-07:00

இரத்தினபுரியில் கள்ள வாக்கை அளிக்க முயற்சித்த ஐக்கிய மக்கள் சுதந்திரக் கூட்டமைப்பின் கம்பாஹா மாவட்ட நாடாளுமன்ற உறுப்பினர் சரண குணவர்தனவை பிரதேச மக்கள் தாக்கியுள்ளதாக தெரிவிக்கப்பட்டுள்ளது.

இரத்தினபுரி கரபிஞ்ச பிரதேசத்தில் உள்ள புனித ஜோக்கின் தமிழ் பாடசாலையில் அமைக்கப்பட்டிருந்த வாக்குச்சாவடியிலேயே அவர் தாக்குதலுக்கு உள்ளாகியுள்ளார்.

கம்பாஹாவைச் சேர்ந்த 25 பேருடன் பேரூந்து மற்றும் கெப் வாகனத்தில் சென்ற சரண குணவர்தன, ஜே.வீ.பீனரை போல் சிவப்பு உடைகளை அணிந்திருந்தாகவும்,

பிரதேச மக்கள் நாடாளுமன்ற உறுப்பினரை அடையாள கண்டப்பின்னர், அங்கிருந்து விரட்டியதுடன் , அவர்கள் மீது கற்களை கொண்டு தாக்குதல் நடத்தியதாகவும் தெரிவிக்கப்பட்டுள்ளது.

ஜாதிக ஹெல உறுமயவின் குற்றச்சாட்டை மறுத்தார் கிழக்குப் பல்கலைக்கழக துணைவேந்தர்

2008-08-23T02:19:00.001-07:00

கிழக்குப் பல்கலைக்கழகத்தில் பயிலும் சிங்கள மாணவர்கள் பலர் கொலை அச்சுறுத்தல்களுக்கு உள்ளாகியிருப்பதாக ஜாதிக ஹெல உறுமய முன்வைத்த குற்றச்சாட்டை கிழக்கு பல்கலைக்கழகத் துணைவேந்தர் கலாநிதி.என்.பத்மநாதன் மறுத்துள்ளார்.

கிழக்குப் பல்கலைக்கழகத்தில் பல சிங்கள மாணவர்கள் அனுமதிக்கப்பட்டிருப்பதாகவும், மாணவர் அமைப்புக்களின் செயற்பாடுகளில் பங்கெடுக்காத சிரேஷ்ட மாணவர் ஒருவரே துப்பாக்கிச் சூட்டுக்கு இலக்காகி உயிரிழந்ததாகவும் துணைவேந்தர் கூறினார்.

“உயிர் அச்சுறுத்தல்கள் விடுக்கப்பட்டதாக சிங்கள மாணவர்கள் எவரும் ஒருபோதும் எம்மிடம் முறைப்பாடு செய்யவில்லை” என கலாநிதி பத்மநாதன் தெரிவித்தார்.

மட்டக்களப்பு மற்றும் யாழ்ப்பாண பல்கலைக்கழகங்களில் பயிலும் சிங்கள மாணவர்கள், அங்குள்ள தமிழ் மாணவர்களால் மோசமாக நடத்தப்படுவதாகவும், மட்டக்களப்பு மாவட்டத்தில் பகிடிவதைக்கு உட்படுத்தப்படும் சிங்கள மாணவர்கள் தாக்கப்பட்டதாகவும் ஜாதிக ஹெல உறுமயவின் தலைவர் எல்லாவல மேதானந்த தேரர், கடந்த வியாழக்கிழமை கொழும்பில் நடைபெற்ற ஊடகவியலாளர் மாநாட்டில் குற்றஞ்சாட்டினார்.

சிங்கள மாணவர்கள் யாழ்ப்பாண மற்றும் மட்டக்களப்பு மாவட்டங்களில் கல்வி பயில்வதற்கு அனுமதித்திருக்கும் பல்கலைக்கழக மானியங்கள் ஆணைக்குழுவின் செயற்பாட்டைப் பாராட்டியிருந்த தேரர், எனினும், அந்தப் பகுதிகளில் காணப்படும் பாதுகாப்புச் சூழ்நிலைகளால் சிங்கள மாணவர்களின் உயிர்களுக்கு அச்சுறுத்தல் இருப்பதாகக் கூறினார்.

இவ்வாறு ஜாதிக ஹெல உறுமயவின் தலைவர் குற்றஞ்சாட்டிய அன்று இரவே சிங்கள மாணவர் ஒருவர் இனந்தெரியாத ஆயுததாரிகளால் சுட்டுக்கொல்லப்பட்டார். இந்தக் கொலைக்கான மூலகாரணி எதுவென்பது இதுவரை தெளிவாகத் தெரியவில்லையென கிழக்குப் பல்கலைக்கழகத் துணைவேந்தர் தெரிவித்தார்.

இந்தச் சம்பவம் தொடர்பாக பல்கலைக்கழக மாணவர் ஒருவரும், இரண்டு பாதுகாப்பு உத்தியோகத்தர்களும், ஒரு சிற்றூழியரும் பொலிஸாரால் கைதுசெய்யப்பட்டனர்.

இந்தப் படுகொலைச் சம்பவத்தைத் தொடர்ந்து பல்கலைக்கழகம் தற்காலிகமாக மூடப்பட்டதுடன், சிங்கள மாணவர்கள் பாதுகாப்பாக வெளியேற்றப்பட்டிருந்தமை இங்கு குறிப்பிடத்தக்கது.

பிரபாகரனைக் காப்பாற்ற அவுஸ்ரேலியர் முயற்சி – திவயின

2008-08-23T02:08:00.000-07:00

வாழ்க்கைக்கு மதிப்பளிப்போம் என்ற பெயரில் இலங்கையில் நடைபெறும் போருக்கு எதிராக மகஜர் ஒன்றில் 7 லட்சம் கையெழுத்துகளைப் பெறும் நடவடிக்கையில் அவுஸ்த்ரேலிய தன்னார்வ தொண்டர் அமைப்பின் செயற்பாட்டாளர் ஒருவர் ஈடுபட்டுள்ளார்.

ஜோன்சன் தோமஸ் என்ற தொண்டர் அமைப்பின் செயற்பாட்டாளர் இந்த நடவடிக்கையை மேற்கொண்டுள்ளதாகவும் விடுதலைப்புலிகளையும் அதன் தலைவர் பிரபாகரனையும் பாதுகாக்க மேற்கொள்ளும் முயற்சி என புலனாய்வுதுறையினர் கூறியுள்ளதாக திவயின செய்தி வெளியிட்டுள்ளது.

அவுஸ்த்ரேலிய பிரஜை ஒருவர் வழி நடத்தும் அமைப்புபொன்று பிரபாகரனைக் காப்பாற்ற கையெழுத்து சேகரிக்கிறது என அந்த நாழிதழ் தலைப்பிட்டு இந்த செய்தியை வெளியிட்டுள்ளது.

அமைச்சர்கள் அமீர் அலி - ஹுசைன் பைலா பயனித்த ஜீப் வண்டி மீது குண்டுத்தாக்குதல்

2008-08-23T00:26:00.000-07:00

அமைச்சர்கள் அமீர் அலி மற்றும் ஹுசைன் பைலா ஆகியோர் சென்று கொண்டிருந்த ஜீப் வண்டி மீது குண்டுத் தாக்குதல் நடத்தப்பட்டிருக்கிறது. இச்சம்பவம் பொலநறுவை நெலும்விலவில் நடைபெற்றுள்ளது.

வாகனம் சிறிது சேதமடைந்தாலும் எவருக்கும் காயமெதுவும் ஏற்படவில்லை. குண்டு வாகனத்துள் பொருத்தப்பட்டிருந்ததா அல்லது தெருவோரத்தில் வைக்கப்பட்டிருந்ததா என்பது குறித்து காவற்துறையினர் விசாரணைகளை மேற்கொண்டு வருகின்றனர்.

பல்லியாகொடல்லவில்; முஸ்லிம் வாக்காளர்கள் விரட்டியடிப்பு

2008-08-23T00:24:00.000-07:00

பொலன்னறுவை பல்லியாகொடல்லவில் வாக்களிக்கச் சென்ற முஸ்லிம் வாக்காளர்களை தமிழ் மக்கள் விடுதலைப் புலிகளின் ஆயுததாரிகள் விரட்டியடித்ததாக முறையிடப்பட்டுள்ளது.

பெரும் எண்ணக்கையிலான முஸ்லிம் வாக்காளர்கள் இவ்வாறு விரட்டியடிக்கப்பட்டுள்ளதாக தேர்தல் வன்முறைக் கண்காணிப்பு மையம் தகவல் வெளியிட்டுள்ளது.

இதேவேளை, அடையாள அட்டைகளை சமர்ப்பிக்காத பெரும் எண்ணிக்கையிலான வாக்காளர்கள் பல மாவட்டங்களில் திருப்பி அனுப்பப்பட்டுள்ளனர். தேர்தல் ஆணையகம் வெளியிட்ட தகவல்களை பொதுமக்கள் சரியாக புரிந்துகொள்ளாமையினால் இந்த நிலை உருவாகியுள்ளது.

அடையாள அட்டைக்குப் பதிலாக எந்தவொரு ஆவணத்தையும் சமர்ப்பிக்க முடியும் என பொதுமக்கள் கருதியதனால் இந்தக் குழப்ப நிலை ஏற்பட்டதாக சுட்டிக்காட்டப்படுகிறது.

ஆள் அடையாளத்தை உரிய வகையில் நிரூபிக்க முடியாத பல வாக்காளர்கள் வாக்குச் சாவடிகளிலிருந்து திருப்பி அனுப்பி வைக்கப்பட்டுள்ளதாக விசனம் வெளியிடப்பட்டுள்ளது.

யாழில் துணைப்படை E.P.D.P குழுவினரின் கப்பம் அறவீடு தொடர்கி்றது

2008-08-22T20:57:00.000-07:00

யாழ் குடாநாட்டில் துணைப்படை E.P.D.P குழுவினரின் கப்பம் அறவீடு தொடர்ந்து வருகின்ற போதிலும், அச்சம் காரணமாக பாதிக்கப்பட்ட மக்கள் வெளியே அதனைக்கூறாது தவிர்த்து வருகின்றனர்.

பொதுமக்களின் வீடகளுக்கு தொலைபேசி அழைப்புக்களை மேற்கொள்ளும் துணைப்படை E.P.D.P குழுவினர் தம்மை கருணா குழு எனத் தெரிவித்து கப்பம் கோருகின்றனர்.

இடமொன்றைக் குறிப்பிட்டு அங்கு கப்பப் பணத்தைக் கொண்டுவந்து தருமாறு அச்சுறுத்தும் துணைப்படைக் குழுக்கள், இல்லையெனில் கடத்திச் செல்வோம், அல்லது சுட்டுக்கொல்வோம் என எச்சரிக்கை செய்து வருகின்றனர்.

சிறீலங்கா படைகளது இறுக்கமான தடைகள் காரணமாக துணைப்படைக் குழுக்களின் மிரட்டலுக்கு அஞ்சும் மக்கள் வேறு இடங்களுக்கு சென்று வாழ முடியாத நிலை காணப்படுவதாக எமது குடாநாட்டுச் செய்தியாளர் தெரிவிக்கின்றார்.

துணைப்படை T.M.V.P குழுவினரும் கிழக்கிலும், வவுனியாவிலும் கப்பம் அறவிட்டு வருகின்றனர்.

கந்தளாய் வெந்நீர் ஊற்றில் காவற்துறைச் சிப்பாய் பலி

2008-08-22T19:34:00.000-07:00

துப்பாக்கியின் குறிதவறியதில் காவற்துறை சிப்பாய் ஒருவர் உயிரிழந்துள்ளார். திருகோணமலை – கந்தளாய் வெண்ணீர் ஊற்று காட்டுப் பிரதேசத்தில் உள்ள வீதியின் சோதனை சாவடியில் பணியில் இருந்த காவற்துறைச் சிப்பாயே இவ்வாறு உயிரிழந்துள்ளார்.

காட்டு யானை ஒன்றை விரட்டுவதற்காக மேற்கொள்ளப்பட்ட துப்பாக்கிப் பிரயோகத்தின் போது குறி தவறி தோட்டா காவற்துறை சிப்பாயின் மீது பாய்ந்ததில் இந்த சம்பவம் இடம்பெற்றுள்ளது.

இராணுவத்தினர் தமிழர்கள் மீது தாக்குதல் நடத்துவதை ஒளிப்பதிவு செய்து வெளியிடுமாறு மேர்வின் அறிவுரை

2008-08-22T06:54:00.000-07:00

இலங்கை இராணுவத்தினர் தமிழர்கள் மீது தாக்குதல் நடத்துவதை ஒளிப்பதிவு செய்து வெளியிடுமாறு அமைச்சர் மேர்வின் சில்வா ஊடகங்களுக்கு அறிவுரை வழங்கியுள்ளார்.

சிரச ஊடகவியலாளர்களை தாக்கி அவர்களிடம் இருந்து ஒளிப்பதிவுக் கருவிகளைப் பறித்தமை தொடர்பில் நீதிமன்றதினால் பிடியாணை பிறப்பிக்கப்பட்டிருந்த நிலையில் நேற்று மேர்வின் சில்வா சட்டத்தரணி மூலம் நேற்று நீதிமன்றத்தில் சரணடைந்தார்.

அவர் நீதிமன்றத்திற்குள் பிரவேசிப்பதை ஒளிப்பதிவுசெய்த ஊடகவியலாளர்களிடமே அமைச்சர் மேர்வின் மேற்கண்டவாறு கூறியுள்ளார். அமைச்சர் மேர்வின் சில்வா படையினர் தமிழர்களைத் தாக்குவதாகக் கூறியுள்ளமை தொடர்பாக அரசாங்க பாதுகாப்பு விவகாரங்களுக்கான பேச்சாளர் அமைச்சர் கெஹெலிய ரம்புக்வெல்லவிடம் கேட்டபோது,

படையினர் எந்த இனத்திற்கு எதிராகவும் தாக்குதல்களை நடத்தவில்லை, பயங்கரவாதிகளுக்கு எதிராகவே தாக்குதல்களை நடத்தி வருகின்றனர். இதற்கு அனைவரது ஆசிர்வாதமும் அவசியம் என கூறியுள்ளார்.

அமைச்சர் மேர்வின் கூறிய கருத்து தொடர்பில் தன்னால் எதனையும் தெரிவிக்க முடியாது எனவும் தான் அதனை அறிந்திருக்கவில்லை என்றும் அமைச்சர் கெஹெலிய ரம்புக்வெல்ல குறிப்பிட்டுள்ளார். இராணுவத்தினர் வடக்கில் தமிழர்களை தாக்குகின்றனர் என்று கூறுவது, படையினர் இனப்படுகொலை புரிகின்றனர் எனப் பொருள்படுகிறது.

மேர்வின் சில்வா அரசாங்கத்தின் அமைச்சர் என்பதால், அரசாங்கத்தின் கொள்கை இதுவோ என்ற சந்தேகம் ஏற்பட்டுள்ளதாக விமர்சகர்கள் சுட்டிக்காட்டியுள்ளனர்.

இலங்கை அரிசிக் கப்பல் விபத்தில் சிக்கி மூழ்கியது!

2008-08-22T05:11:00.001-07:00

இந்தியாவிலிருந்து இலங்கை நோக்கி அரிசியை ஏற்றிக்கொண்டு வந்த இலங்கைக் கப்பல் ஒன்று பங்களாதேஸ் சிட்டகொங் துறைமுகத்திற்கு அருகில் வேறொரு கப்பலுடன் மோதி விபத்துக்குள்ளாகி மூழ்கியுள்ளது.

இலங்கையின் பிரபல வர்த்தகரான தம்மிக பெரேரா என்பவருக்குச் சொந்தமான எம்.வி. பதுலுவலி எனும் கப்பலே 3000 தொன் அசிரியுடன் சிட்டகொங் துறைமுகத்திற்குள் நுழைந்தவேளை எதிரே வந்துகொண்டிருந்த பனாமா நாட்டின் எண்ணெய் கப்பலொன்றுடன் மோதி மூழ்கியுள்ளது.

இதன்போது கப்பலில் இருந்த 17 பேரில் தலைமைப் பொறியியளாளர் தவிர ஏனைய அனைவரும் காப்பாற்றப்பட்டுள்ளனர். இவர்கள் அனைவரும் இலங்கையர்கள் என்பது குறிப்பிடத்தக்கது. பங்களாதேஸ் துறைமுக அதிகாரிகளும் கடற்படையினரும் தேடுதல் நடவடிக்கைகளை மேற்கொண்டுள்ளனர் என்றும் தெரிவிக்கப்படுகிறது

துணுக்காய், உயிலங்குளம் பகுதிகளை இராணுவத்தினர் கைப்பற்றியிருப்பதாக பாதுகாப்பு அமைச்சு அறிவிப்பு

2008-08-22T04:55:00.000-07:00

முல்லைத்தீவு மாவட்டம் துணுக்காய் மற்றும் உயிலங்குளம் பகுதிகளை அரசாங்கப் படைகள் மீட்டிருப்பதாக பாதுகாப்பு அமைச்சு அறிவித்துள்ளது. இராணுவத்தினரின் 57வது படைப்பிரிவு இன்று வெள்ளிக்கிழமை அதிகாலை இந்தப் பகுதிகளைத் தமது கட்டுப்பாட்டின் கீழ் கொண்டு வந்ததாக பாதுகாப்பு அமைச்சின் இணையத்தளத்தில் குறிப்பிடப்பட்டுள்ளது.

விடுதலைப் புலிகளுக்கு மிகவும் முக்கிய பகுதியாக விளங்கிய துணுக்காயை நோக்கி நேற்று முதல் இராணுவத்தினர் முன்நகர்வுகளை ஆரம்பித்திருந்ததாக அந்த இணையத்தளத்தில் தெரிவிக்கப்பட்டுள்ளது.

வெள்ளான்குளம்- மாங்குளம் வீதியின் மையப் பகுதியில் துணுக்காய் நகர் அமைந்திருப்பதுடன், துணுக்காயிலிருந்து வடக்கில் 5 கிலோமீற்றர் தொலைவில் உயிலம்குளம் அமைந்துள்ளது.

அண்மைய வெற்றிகள் மூலம் விடுதலைப் புலிகளின் கோட்டையெனக் கருதப்படும் கிளிநொச்சி மற்றும் முல்லைத்தீவு மாவட்டங்கள் தமது கட்டுப்பாட்டின் கீழ் கொண்டுவரப்படுகின்றமை தெளிவாகிறது என பாதுகாப்பு அமைச்சின் இணையத்தளத்தில் குறிப்பிடப்பட்டள்ளது.

இதேவேளை, துணுக்காய் மற்றும் உயிலங்குளம் பகுதிகள் இராணுவத்தினரால் மீட்கப்பட்டமை குறித்து விடுதலைப் புலிகள் தரப்பிலிருந்து இதுவரை எந்தவிதமான தகவல்களும் வெளியாகவில்லை.

எனினும், கிளிநொச்சி, முல்லைத்தீவு மாவட்டங்களிலுள்ள பொதுமக்கள் மற்றும் முன்னாள் போராளிகளுக்கு விடுதலைப் புலிகள் பயிற்சிகளை வழங்கிவருவதாக தமிழ் இணையத்தளங்கள் பல செய்தி வெளியிட்டிருந்தமை இங்கு குறிப்பிடத்தக்கது.

விடுதலைப்புலிகளை வலுப்படுத்த கொபி கிளப் - சிங்கள இணையம்

2008-08-22T04:54:00.000-07:00

விடுதலைப்புலிகளை வலுப்படுத்தும் நோக்கில் சர்வதேச அரசசார்பற்ற நிறுவனங்கள் இணைந்து அமைப்பொன்றை உருவாக்கியுள்ளதாக சிங்கள இணையத்தளம் ஒன்று செய்தி வெளியிட்டுள்ளது.

கொபி கிளப் என்ற பெயரில் உருவாக்கப்பட்டுள்ள இந்த அமைப்பின் மூலம் இலங்கை அரசாங்கத்திற்கு எதிரான சர்வதே நிலைப்பாடு ஒன்றை ஏற்படுத்தும் நடவடிக்கைகளில் இவர்கள் ஈடுபட்டுள்ளதாகவும் அந்த இணையத்தளம் குறிப்பிட்டுள்ளது.

இந்த நடவடிக்கையை ஒழுங்குப்படுத்துவதற்காக கொழும்பில் இவர்கள் கூட்டம் ஒன்றை நடத்தியுள்ளனர்.

இதன் உறுப்பினர்கள் வெளிநாட்டினர் எனவும் இந்த அமைப்பை வன்னியில் செயற்படுத்தவும் இவர்கள் நடவடிக்கை எடுத்துள்ளதாகவும் தெரிவிக்கப்பட்டுள்ளது.

கொபி கிளப் அமைப்பில் உள்ள சில சர்வதேச அமைப்புகளின் வாகனங்களை விடுதலைப்புலிகள் பயன்படுத்தி வருகின்றனர். இது குறித்து அரசாங்கம் விசாரணைகளை ஆரம்பித்துள்ள நிலையில், இந்த அமைப்பு தற்போது புதிய செயற்பாடுகளை ஆரம்பித்துள்ளதாகவும் அந்த இணையத்தளம் கூறியுள்ளது.

கிழக்குப் பல்கலைக்கழகத்திலிருந்து சிங்கள மாணவர்கள் வெளியேற்றம்: மாணவன் கொலையின் எதிரொலி

2008-08-22T04:49:00.000-07:00

வந்தாறுமூலை கிழக்குப் பல்கலைக்கழகத்தின் வர்த்தகபீட இறுதியாண்டைச் சேர்ந்த மாணவன் பஸன் சமரசிங்க(22) இனந்தெரியாத நபர்களால் சுட்டுக்கொல்லப்பட்டதைத் தொடர்ந்து, கிழக்குப் பல்கலைக்கழக விடுதிகளிலிருந்து சிங்கள மாணவர்கள் பாதுகாப்புக் காரணங்களுக்காக வெளியேற்றப்பட்டதாக கிழக்குப் பல்கலைக்கழக அதிகாரி ஒருவர் தெரிவித்தார்.

நேற்றிரவு 8.45 மணியளவில் மாணவர்கள் தங்கியிருக்கும் விடுதிக்குள் சென்ற இனந்தெரியாத ஆயுததாரிகள், சிறியரக கைத்துப்பாக்கியைப் பயன்படுத்தி பெரும்பான்மை இனத்தைச் சேர்ந்த அந்த மணவர் மீது துப்பாக்கிப் பிரயோகம் மேற்கொண்டுவிட்டுத் தப்பிச் சென்றதாக பாதுகாப்பு அமைச்சு அறிவித்துள்ளது.

இந்த நிலையில், கிழக்குப் பல்லைகலைக்கழகத்தின் விடுதிகளில் தங்கியிருந்த சிங்கள மாணவர்கள் அவர்களின் பாதுகாப்புக்காக அங்கிருந்து வெளியேற்றப்பட்டிருப்பதாகவும், பல்கலைக்கழகத்தின் விரிவுரை நடவடிக்கைகள் எதுவும் நடைபெறவில்லையெனவும் கிழக்குப் பல்கலைக்கழக அதிகாரியொருவர் எம்மிடம் தெரிவித்தார். எனினும், இந்தச் சம்பவத்திற்கான காரணங்கள் இதுவரை தெரியவரவில்லையென அவர் கூறினார்.

நேற்றைய சம்பவத்தில் கொல்லப்பட்ட மாணவர் பஸன் சமரசிங்கவின் சடலம் பிரேதப் பிரசோதனைக்காக மட்டக்களப்பு மாவட்ட போதனா வைத்தியசாலையில் வைக்கப்பட்டிருப்பதாக வைத்தியசாலைத் தகவல்கள் தெரிவிக்கின்றன. சுட்டுக்கொல்லப்பட்ட மாணவர் குருநாகல், பொத்துஹர பகுதியைச் சேர்ந்தவர் என அடையாளம் காணப்பட்டுள்ளது.

‘கிழக்குப் பல்கலைக்கழகம் மரணவீடு’ என முன்பே அச்சம் வெளியிட்டிருந்த தாயார்

கிழக்குப் பல்கலைக்கழகத்துக்கு பெரும்பான்மை இன மாணவர் ஒருவரை அனுமதித்துவிட்டுத் திரும்பியிருந்த அவரின் தாயார், மரணவீட்டில் தனது பிள்ளையை விட்டுவந்ததைப் போன்றிருப்பதாக அண்மையில் பி.பி.சி.க்கு கூறியிருந்தார்.

இவ்வாறு அவர் கூறி, ஒரு மாத காலத்துக்குள்ளேயே கிழக்குப் பல்கலைக்கழகத்தில் பெரும்பான்மை இன மாணவர் இனந்தெரியாத நபர்களால் சுட்டுக்கொல்லப்பட்டுள்ளார்.

“எனது பிள்ளையை மரண வீடொன்றில் விட்டுவிட்டு வந்ததாகவே நான் நினைக்கிறேன். இவ்வளவு காலமும் கஷ்டப்பட்டு எனது பிள்ளையைப் படிப்பித்தது இவ்வாறானதொரு இடத்தில், பெரும் அச்சத்துக்கு மத்தியில் உயர்கல்வியைத் தொடர்வதற்கு அல்ல” என கிழக்குப் பல்பலைக்கழக மருத்துவ பீடத்தில் தனது மகனை அனுமதிக்கச் சென்றிருந்த அந்தத் தாயார் பி.பி.சி. செய்திச் சேவைக்குத் தனது கவலையைத் தெரியப்படுத்தியிருந்தார்.

யாழ் பல்கலைக்கழகத்தில் சிங்கள மாணவர்கள் அனுமதிக்கப்பட்டிருப்பதைக் கண்டித்து அவர்களது பெற்றோர் கடந்த சில தினங்களுக்கு முன்னர் பல்கலைக்கழக மானியங்கள் ஆணைக்குழு முன்னால் ஆர்ப்பாட்டம் நடத்தியிருந்தனர். இதுதவிரவும், கிழக்கு பல்கலைக்கழக மாணவர்கள் தாம் எதிர்நோக்கும் பிரச்சினைகள் அடங்கிய கடிதமொன்றை பல்கலைக்கழக மானியங்கள் ஆணைக்குழுவுக்கு அண்மையில் அனுப்பிவைத்திருந்தனர்.

ஜாதிக ஹெல உறுமய

யாழ்ப்பாணம் மற்றும் மட்டக்களப்பு பல்கலைக்கழகங்களில் பயிலும் சிங்கள மாணவர்கள் தமிழ் மாணவர்களால் தொல்லைக்களுக்கு உள்ளாவதாக ஜாதிக ஹெல உறுமய நேற்று வியாழக்கிழமை குற்றஞ்சாட்டியிருந்தது.

யாழ்ப்பாணம் மற்றும் மட்டக்களப்பு பல்கலைக்கழகங்களில் கல்விபயிலும் சிங்கள மாணவர்கள் மாத்திரமே இவ்வாறான பிரச்சினைக்கு முகம்கொடுப்பதாகவும், அங்கிருக்கும் தமிழ், முஸ்லிம் மாணவர்களுக்கு எந்தப் பிரச்சினையும் இல்லையெனவும் ஜாதிக ஹெல உறுமயவின் தலைவர் எல்லாவல மேதானந்த தேரர் நேற்று காலை நடைபெற்ற ஊடகவியலாளர் மாநாட்டில் கூறியிருந்தார்.

அந்தப் பல்கலைக்கழகங்களிலுள்ள சிங்கள மாணவர்கள் தமிழ் மாணவர்களால் தாக்கப்படுவதாகவும், அவ்வாறு கிழக்குப் பல்கலைக்கழகத்தில் தாக்கப்பட்ட மாணவர்களை ஜாதிக ஹெல உறுமய அடையாளம் கண்டிருப்பதாகவும் அவர் தெரிவித்தார்.

தமிழ் மாணவர்கள்

எந்தவொரு பல்கலைக்கழகத்திலும் எந்த இனத்தைச் சேர்ந்த மாணவரும் அனுமதிக்கப்படலாம் என அரசாங்கத் தரப்பில் நியாயம் கூறப்படுகின்றபோதும், தற்போது வடக்கு, கிழக்கில் நிலவும் சூழ்நிலையில், சிங்கள மாணவர்களை அங்கு அனுமதிப்பதானது தமது பல்கலைக்கழகங்களை ஆக்கிரமிக்கும் அரசாங்கத்தின் திட்டமாக இருக்கலாமென தமிழ், முஸ்லிம் மாணவர்கள் மத்தியில் சந்தேகத்தைத் தோற்றுவித்துள்ளமை இங்கு குறிப்பிடத்தக்கது.

கிழக்கு பல்கலைக்கழக இறுதியாண்டு மாணவர் சுட்டுக் கொலை

2008-08-21T18:08:00.000-07:00

கிழக்கு பல்கலைக்கழக இறுதியாண்டு மாணவரான 27 வயதுடைய எம்.பி.எஸ் சமரசிங்க இன்றிரவு ஒன்பது மணியளவில் இனந்தெரியாத ஆயுதபாணிகளால் சுட்டுக் கொல்லப்பட்டுள்ளார்.

இவர் குருநாகல் பொத்துஹர என்ற பிரதேசத்தைச் சேர்ந்த சிங்கள மாணவராவார். கிழக்குப் பல்கலைக்கழகத்தில் தமிழ் மாணவி ஒருவர் ராக்கிங் செய்யப்பட்ட சம்பவத்துடன் இப்படுகொலைக்குத் தொடர்புள்ளதா என காவற்துறையினர் விசாரணைகளை மேற்கொண்டு வருகின்றனர்.

ஓகஸ்ட் 19ஆம் திகதி தமிழ் மக்கள் விடுதலைப் புலிகளின் கலாசாரப்பிரிவினரால் ஒரு எச்சரிக்கைத் துண்டுப்பிரசுரம் ஒன்று வெளியிடப்பட்டிருந்தது.

அதில் பெண்களுக்கெதிரானதும் கலாசாரத்திற்கு எதிரானதுமான இழிவான செயல்களில் ஈடுபடுவோருக்கு எதிராக கடுமையான நவடிக்கை தம்மால் எடுக்கப்படும் எனத் தெரிவிக்கப்பட்டிருந்தது.

கொல்லப்பட்ட மாணவன் கடந்த மூன்று வருடங்களாக 16 சிங்கள மாணவர்களுடன் கற்கையில் ஈடுபட்டு வருபவர் என்று பல்கலைக்கழக வட்டாரம் தெரிவிக்கிறது.

2007 -2008 ஆம் ஆண்டுகளில் 181 சிங்கள மாணவர்கள் கிழக்குப் பல்கலைக்கழகத்திற்கு அனுமதிக்கப்பட்டுள்ளார்கள் என்பது குறிப்பிடத்தக்கது.

பாகிஸ்தானில் முக்கிய ஆயுத தொழிற்சாலைக்கு அருகே இரட்டை தற்கொலை குண்டுத் தாக்குதல்

2008-08-21T10:20:00.000-07:00

பாகிஸ்தானின் தலைநகர் இஸ்லாமாபாத்துக்கு வெகு அருகிலிருக்கும் நாட்டின் முக்கிய ஆயுத தொழிற்சாலைக்கு அருகே இடம் பெற்ற இரட்டை தற்கொலை குண்டுத் தாக்குதலில் குறைந்தது 63 பேராவது கொல்லப்பட்டிருப்பதாக பாகிஸ்தானிய போலீசார் கூறுகிறார்கள். இந்தத் தாக்குதலில் பலர் காயமடைந்துள்ளனர்.

வாஹ் நகரிலுள்ள இந்த ஆயுதத் தொழிற்சாலையின் முக்கிய வாயிலுக்கு எதிரே ஒரு தற்கொலை குண்டுதாரி தன்னைத் தானே வெடிக்க வைத்துக் கொண்டார் எனவும் பாகிஸ்தானிய போலீசார் தெரிவிக்கிறார்கள்.

மற்றொரு வாயிலுக்கு அருகே இருந்த சந்தைப் பகுதியில் இரண்டாவது தற்கொலை குண்டுதாரியின் வெடிப்பு நிகழ்ந்துள்ளது.

பாகிஸ்தானிலுள்ள தாலிபான்களுக்காக பேசவல்ல ஒருவர் அந்நாட்டின் பழங்ககுடிகள் வாழும் பகுதிகளில் தமக்கு எதிராக இராணுவம் நடத்திய தாக்குதல்களுக்கு பதிலடியாகத்தான் இன்றைய இந்தத் தாக்குதல்கள் நடைபெற்றுள்ளன என்று கூறியுள்ளார்.

2287ஆம் ஆண்டில் வானில் இரண்டு சந்திரன்கள் தோன்றும்!!

2008-08-21T09:55:00.000-07:00

செவ்வாய்க் கிரகமானது எதிர்வரும் 27ஆம் திகதி பூமிக்கு மிக நெருங்கி வரவுள்ளதாகவும் அது பூமியிலிருந்து பார்க்கும்போது இரண்டாவது சந்திரன் போன்று தோற்றமளிக்கும் எனவும் அராபிய பத்திரிகைகள் அண்மையில் அறிக்கையிட்டிருந்தன. இந்நிலையில் ஐக்கிய அரபு எமிரேட்ஸ் வானிலை நிபுணர்கள் மேற்படி எதிர்வு கூறல்அறிக்கைகளை நிராகரித்துள்ளனர்.

எதிர்வரும் 27ஆம் திகதி செவ்வாய்க் கிரகமானது வானத்தில் பெரிய முழுநிலவு போன்று தோற்றமளிக்கும் எனவும் அதனால்,வானத்தில் இரு சந்திரன்களைப் பார்க்கும் வாய்ப்பு மக்களுக்கு கிடைக்கும் எனவும் இணையத் தளங்கள் பலவற்றிலும் செய்தி வெளியிடப்பட்டுள்ளது.

செவ்வாயானது ஒவ்வொரு 780 நாட்களுக்கும் ஒரு தடவை சூரியனுக்கும் பூமிக்கும் இடையில் பயணிக்கையில் பிரகாசமான தோற்றத்தை வெளிப்படுத்துவது வழமையாகவுள்ளது என எமிரேட்ஸ் வானிலை சபையின் இஸ்லாமிய சந்திர அவதான திட்ட தலைவர் மொஹமட் சொயுகத் அவதா தெரிவித்தார்.

மேற்படி செவ்வாய்க் கிரகமானது இவ்வருடம் மனித வெற்றுக் கண்ணுக்கு முழு நிலவு அளவு தோன்றுவது சாத்தியமில்லை எனக்குறிப்பிட்ட அவர்,2287ஆம் ஆண்டில் அத்தகைய இரு சந்திரத் தோற்றப்பாடு வானில் ஏற்பட வாய்ப்புள்ளதாகக் கூறினார்.

வவுணதீவில் ஆயுததாரிகளால் கடத்தப்பட்ட இளைஞர் படுகொலை

2008-08-21T09:31:00.000-07:00

இனந்தெரியாத ஆயுததாரிகள் ஐவர் தமிழ் இளைஞர் ஒருவரை பலவந்தமாகத் தூக்கிச் சென்று படுகொலை செய்துள்ளனர்.

இச்சம்பவம் கடந்த புதன்கிழமை மட்டக்களப்பு வவுணதீவில் இடம்பெற்றுள்ளது. விசேட அதிரடிப்படையினரின் சீருடையை ஒத்த சீருடையையே ஆயுததாரிகள் அணிந்திருந்தனர் என்பது குறிப்பிடத்தக்கது.

படுகொலை செய்யப்பட்டவர் 48 வயதான அழகதுரை தர்மலிங்கம் என்ற விவசாயி என அடையாளம் காணப்பட்டுள்ளார்.

இவர் மூன்று குழந்தைகளின் தந்தையாவார். கொல்லப்பட்டவரின் கையிலிருந்த இரண்டு பவுண் பெறுமதியான தங்க மோதிரத்தையும் கொலையாளிகள் அபகரித்துச் சென்றுள்ளனர்.

சடலம் மட்டக்களப்பு வைத்தியசாலையில் வைக்கப்பட்டிருக்கிறது.

புல்மோட்டையில் இருவர் கொலை

2008-08-21T09:29:00.000-07:00

இனந்தெரியாத ஆயுதபாணிகளால் இரண்டு முஸ்லிம்கள் சுட்டுப் படுகொலை செய்யப்பட்டுள்ளனர். கடந்த புதன்கிழமை இரவு ஏழரை மணியளவில் திருகோணமலை புல்மோட்டை வீதியிலுள்ள நிலாவெளியில் இச்சம்பவம் இடம் பெற்றுள்ளது.

இச்சம்பவத்தில் மேலும் நான்கு முஸ்லிம்கள் படுகாயமடைந்துள்ளனர். படுகொலை செய்யப்பட்டவர்களது சடலங்கள் திருகோணமலை வைத்தியசாலைக்கு எடுத்துச் செல்லப்பட்டுள்ள நிலையில் பொலிஸார் விசாரணைகளைத் தொடர்கின்றனர்

மட்டக்களப்பில் ஒருவர் சுட்டுக்கொலை

2008-08-21T06:39:00.001-07:00

மட்டக்களப்பு வவுணகுளம் கந்தன்குடா பகுதியைச் சேர்ந்த ஒருவரை இனந்தெரியாதோர் சுட்டுப் படுகொலை செய்துள்ளதாகத் தெரிவிக்கப்படுகிறது.

இன்று அதிகாலை குறித்த நபரின் வீட்டுக்கு சென்ற இனந்தெரியாத நபர்கள், கொலையுண்டவரை வெளியே அழைத்து பின்னர் துப்பாக்கிப் பிரயோகம் மேற்கொண்டுள்ளதாக பொலிஸ் ஊடகப் பேச்சாளர் ரஞ்சித் குணசேகர தெரிவித்துள்ளார்.

அழகுதுரை தர்மலிங்கம் என்ற 48 வயது நபரே இவ்வாறு உயிரிழந்துள்ளதாகத் தெரிவிக்கப்படுகிறது.

இந்த சம்பவம் தொடர்பாக மட்டக்களப்பு பொலிஸார் விசாரணைகளை ஆரம்பித்துள்ளதாக பொலிஸ் ஊடகப்பேச்சாளர் மேலும் குறிப்பிட்டார்.

இலங்கையில் அமில மழை பெய்யக்கூடிய சாத்தியம் - பேராசிரியர் ஓ.ஈ.இளப்பெரும

2008-08-21T06:38:00.000-07:00

எதிர்காலத்தில் இலங்கையின் சில பகுதிகளில் அபாயகரமான அமில மழை பெய்யக்கூடிய சாத்தியம் இருப்பதாக பேராதனைப் பல்கலைக்கழகப் பேராசிரியர் ஓ.ஈ. இளப்பெரும எச்சரிக்கை விடுத்துள்ளார்.

அண்மைய வருடங்களாக இலங்கையில் ஏற்பட்டுவரும் காலநிலை மாற்றங்களினால் அமில மழை பெய்யக்கூடிய அபாயம் இருப்பதாக அவர் சுட்டிக் காட்டியுள்ளார்.

குறிப்பாக அனுராதபுரம், மஹாஇலுப்பள்ளம் மற்றும் ஊவா பகுதிகளில் வடகிழக்கு பருவப் பெயர்ச்சி மழைக் காலத்தில் அமில மழை பெய்யலாம் என அவர் தெரிவித்துள்ளார்.

அமில மழை காரணமாக ஆறுகள், குளங்கள், தாவரங்கள் மற்றும் பொதுமக்களின் சுகாதாரத்திற்கும் தீங்கு ஏற்படக்கூடும் என அவர் குறிப்பிட்டுள்ளார்.

இலங்கையின் விவசாயத்துறைக்கு அமில மழை பெரும் பாதிப்புக்களை ஏற்படுத்தக் கூடும் என அவர் தெரிவித்துள்ளார்.

அமில மழை தொடர்பாக இலங்கையில் எவ்வித முறையான ஆய்வுகளும் இதுவரையில் நடத்தப்படவில்லை என அவர் குறிப்பிட்டுள்ளார்.

அம்பாறையில் தாயும், மகனும் கடத்திச் செல்லப்பட்டனர்

2008-08-21T05:17:00.000-07:00

அம்பாறை, கல்முனையில் தாயும் மகனும் வெள்ளைச் சிற்றூந்தில் சென்ற ஆயுத நபர்களால் கடத்திச் செல்லப்பட்டுள்ளனர்.

மருத்துவமனை வீதியிலுள்ள இவர்களது வீட்டிற்கு நேற்று அதிகாலை 1:30 அளவில் சென்ற ஆயுத நபர்கள் இவர்களைக் கடத்திச் சென்றனர்.

40 அகவையுடைய நவரத்தினம் மஞ்சுளா, உயர்தரப் பரீட்சையில் தோற்றும் அவரது மகனான 18 அகவையுடைய நவரத்தினம் கலைவாணன் ஆகியோரே கடத்திச் செல்லப்பட்டுள்ளனர்.

இவர்கள் கடத்திச் செல்லப்பட்ட வீட்டில் இருந்து 75 மீற்றர் தொலைவில் துணைப்படைக் குழு ஒன்றின் முகாம் அமைந்திருக்கின்றது.

nitharsanam: கல்முனையில் சார்க் அமைப்பின் தலைவரின் அம்பாறை இணைப்பாளரால் தாயும் மகனும் கடத்தல்!!

பருவப் பெயர்ச்சி மழையால் வடக்கை நோக்கிய இராணுவ முன்நகர்வு தடைப்படும் சாத்தியம்- அரசியல் ஆய்வாளர்

2008-08-21T05:07:00.000-07:00

வடக்கைக் கைப்பற்றும் நோக்கில் இலங்கை அரசாங்கப் படைகள் முன்னெடுத்திருக்கும் இராணுவ முன்நகர்வுகள் ஒக்டோபர் மற்றும் நவம்பர் மாதங்களில் ஆரம்பமாகும் பருவப்பெயர்ச்சி மழையால் தடைப்படுவதற்கான சாத்தியக்கூறுகள் இருப்பதாக அரசியல் ஆய்வாளர், முன்னாள் கேணல் சுசந்த செனவிரட்ன ஏ.பி.செய்திச் சேவைக்குத் தெரிவித்துள்ளார்.

தற்பொழுது முன்னெடுத்திருக்கும் இராணுவ முன்நகர்வானது கிழக்கைப் போன்று இலகுவானதாக அமைந்திருக்காதெனவும், கூடுதலான நிலக்கண்ணிவெடிகள் புதைத்து வைத்திருக்கக் கூடும் என்பதால் சிக்கல் நிறைந்த முன்நகர்வாக அமையும் எனவும் அவர் எச்சரித்துள்ளார்.

அண்மைய மோதல்களில் விடுதலைப் புலிகள் உடனடியாக பின்வாங்கிச் செல்கின்றமை, இராணுவத்தினரைக் கவரும் நிகழ்ச்சியாக அமைந்திருக்கலாம் என ஏ.பி.செய்திச் சேவைக்குத் தெரிவித்திருக்கும் செனவிரட்ன, காடுகளுக்குள் பதுங்கியிருக்கும் விடுதலைப் புலிகள் இன்னமும் தம்வசம் ஆட்லறி மற்றும் கனரக ஆயுதங்களை வைத்திருப்பதால், கடுமையான பதில் தாக்குதல்களை நடத்தக்கூடும் என எச்சரிக்கை விடுத்துள்ளார்.

“இந்த மௌனம் படையினருக்கு நல்லதாக அமையாது” என செனவிரட்ன கூறியுள்ளார்.

அண்மைய இராணுவ முன்நகர்வுகள் விடுதலைப் புலிகளைப் பலவீனமடையச் செய்துள்ளபோதும், இனப்பிரச்சினை மோதல்கள் மூலம் தீர்க்கப்படாது என அவர் தெரிவித்துள்ளார்.

“உடனடியாகவோ அல்லது ஆறுதலாகவோ பேச்சுவார்த்தை மூலமான தீர்வொன்றுக்கு நாங்கள் செல்லவேண்டியே இருக்கும்” என அரசியல் ஆய்வாளர், முன்னாள் கேணல் சுசந்த செனவிரட்ன ஏ.பி.செய்திச் சேவைக்கு மேலும் கூறியுள்ளார்.

இதேவேளை, மன்னார் மாவட்டத்தின் வடமேல் பகுதியில் எட்டு மைல் விவசாய நிலங்களை அண்மித்திருப்பதால் அவற்றுக்குப் பாதிப்பு ஏற்படாத வகையில் இராணுவ முன்நகர்வுகளை மெதுவாக்கியிருப்பதாக இராணுவப் பேச்சாளர் பிரிகேடியர் உதய நாணயகார தெரிவித்திருப்பதாக ஏ.பி.செய்திச்சேவை செய்தி வெளியிட்டுள்ளது.

சிறிய இராணுவ முன்நகர்வை மேற்கொள்வதற்கு இராணுவத்தினர் இரவுவேளைகளில் போராடவேண்டி இருப்பதாகவும், இரவு வேளைகளிலேயே விடுதலைப் புலிகளின் பதுங்கு குழிகளைக் கைப்பற்றி அவற்றை ஒழிப்பதற்கான முயற்சிகள் முன்னெடுக்கப்படுவதாகவும் பிரிகேடியர் கூறியுள்ளார்.

வடக்கில் இடம்பெயர்ந்துள்ள மக்கள் பாலியல் தொந்தரவுக்குள்ளாக்கப்படுகின்றனர் - மன்னிப்புச் சபை

2008-08-21T05:05:00.000-07:00

இராணுவத்தினருக்கும் விடுதலைப் புலிகளுக்குமிடையில் இடம்பெறும் மோதல்கள் காரணமாக, வன்னியில் இடம்பெயர்ந்திருக்கின்ற ஆயிரக்கணக்கான மக்கள் உணவுப்பற்றாக்குறை மற்றும் கூடாரங்களின்றி பெரும் கஷ்டங்களுக்கு முகங்கொடுத்திருப்பதாக சர்வதேச மன்னிப்புச் சபை தெரிவித்துள்ளது.

அத்துடன், இடம்பெயர்ந்துள்ள பெண்களும், யுவதிகளும் பாலியல் தொந்தரவுகளுக்கு உள்ளாகிவருவதாகவும் சர்வதேச மன்னிப்புச் சபை நேற்று புதன்கிழமை வெளியிட்டுள்ள அறிக்கையில் தெரிவித்துள்ளது.

மோதல்கள் இடம்பெறும் பகுதிகளுக்கும், இடம்பெயர்ந்த மக்கள் தங்கியிருக்கும் பகுதிகளுக்கும் ஊடகவியலாளர்கள் செல்வதற்கு கட்டுப்பாடுகள் விதிக்கப்பட்டிருக்கும் நிலையில், சிறியளவு நம்பகரமான தகவல்கள் அங்கிருந்து கிடைத்துள்ளதாகவும் மன்னிப்புச் சபை தனது அறிக்கையில் தெரிவித்துள்ளது. இதுதொடர்பில், மோதலில் ஈடுபட்டுள்ள இருசாராரும் ஒருவரை ஒருவர் குற்றம்சாட்டுவதாகவும் அந்த அறிக்கையில் குறிப்பிடப்பட்டுள்ளது.

விடுதலைப் புலிகளின் கட்டுப்பாட்டுப் பகுதியிலிருந்து வெளியேறியுள்ள மக்களை அரசாங்கம் தற்காலிக கூடாரங்களிலும், இடைத்தங்கல் முகாம்களிலும் தங்கவைத்துள்ளதாகவும் மன்னிப்புச் சபை குறிப்பிட்டுள்ளது.

"மன்னார் மாவட்டத்திலுள்ள களிமோட்டை முகாமில் 200 குடும்பங்கள் தங்கியிருப்பதாக நேரில் கண்ட சாட்சிகள் தெரிவிக்கின்றனர். இவர்களில், பாடசாலைக்குச் செல்வோரைத் தவிர வேறெவரும் படையினரின் விசேட அனுமதியின்றி வெளியில் செல்ல அனுமதிக்கப்படுவதில்லை" என்றும் அந்த அறிக்கையில் தெரிவிக்கப்பட்டுள்ளது.

இடம்பெயர்ந்துள்ள மக்கள் பாதுகாப்பான இடங்களை நோக்கிச் செல்வதற்கு விதிக்கப்பட்டுள்ள தடைகளை இருசாராரும் நீக்க வேண்டும் என வேண்டுகோள்விடுத்துள்ள மன்னிப்புச் சபை, இடம்பெயர்ந்த மக்கள் மோதல்களுக்கு மத்தியில் மனிதக் கேடயங்களாகப் பயன்படுத்தப்படுவதாகவும் தெரிவித்துள்ளது.

" இடம்பெயர்ந்துள்ள மக்கள் தங்குவதற்கான 3 பெரிய தங்குமிடங்கள் அமைக்கப்பட வேண்டும். அத்துடன், ஓமந்தை சோதனைச் சாவடியூடாக மனிதாபிமான உதவிகள் கொண்டு செல்வதற்கு அனுமதி வழங்கப்படல் வேண்டும்" எனவும் மன்னிப்புச் சபை தனது அறிக்கையில் குறிப்பிட்டுள்ளது.

கடந்த ஜூலை மாதம் 14,000 குடும்பங்கள் புதிதாக இடம்பெயர்ந்துள்ளதாகவும், அரசாங்க தரவுகளின்படி, ஓகஸ்ட் 7 ஆம் திகதி வரை மொத்தமாக இடம்பெயர்ந்துள்ள மக்களின் எண்ணிக்கை 150,000 முதல் 160,000 வரை எனவும் அந்த அறிக்கையில் குறிப்பிடப்பட்டுள்ளது.

T.C.C ஐ தடைசெய்யுமாறு ஐரோப்பிய ஒன்றியத்திடம் இலங்கை கோரிக்கை

2008-08-21T05:03:00.000-07:00

ஐரோப்பாவில் விடுதலைப்புலிகளுக்கு நிதிசேகரிப்பில் ஈடுபட்டு வரும் T.C.C என்ற தமிழ்க் கோடிநேசன் கமிட்டியை தடைசெய்யுமாறு இலங்கை அரசாங்கம் நேற்று(20) ஐரோப்பிய ஒன்றியத்திடம் கோரிக்கை விடுத்துள்ளது.

தமிழர் புனர்வாழ்வு கழகம் தடைசெய்யப்பட்ட பின்னர், பிரான்சில் உள்ள இந்த ரி.சீ.சீ என்ற விடுதலைப்புலிகளுக்கு ஆதரவான அமைப்பு அதிகளவான நிதிசேகரிப்பில் ஈடுபட்டுள்ளமை குறித்து தமக்கு தகவல் கிடைத்துள்ளதாக அரசாங்கம் குறிப்பிட்டுள்ளது.

இந்த அமைப்பை தடைசெய்யுமாறு கோரும் மகஜரை அரசாங்கம் ஐரோப்பிய ஒன்றியத்தைச் சேர்ந்த 27 நாடுகளுக்கு உடனடியாக அனுப்பி வைத்துள்ளது. தற்போது கிடைத்துள்ள தகவல்களின் அடிப்படையில் தமிழ் கோடிநேசன் கமிட்டி கடந்த இரண்டு மாதங்களில் மூன்று மில்லியன் பிராங் நிதியைச் சேகரித்துள்ளது.

விடுதலைப்புலிகள் பாதிக்கப்பட்டுள்ளதாக கூறி இந்த நிதி சேகரிக்கப்பட்டுள்ளதாக அரசாங்கம் தெரிவித்துள்ளது.

பணாங்கொட இராணுவ முகாமில் படைச் சிப்பாய் தற்கொலை

2008-08-21T05:00:00.000-07:00

பாணாங்கொட இராணுவ முகாமில் பாதுகாப்பு கடமையில் ஈடுபட்டிருந்த இராணுவ லான்ஸ் கோப்ரல் ஒருவர் தன்னைத் தானே துப்பாக்கியால் சுட்டு தற்கொலை செய்து கொண்டுள்ளார்.

இந்த சம்பவம் நேற்று முன்தினம் (19) இடம்பெற்றுள்ளது. மாத்தளையைச் சேர்ந்த ஜயவீர என்பரே இவ்வாறு தற்கொலை செய்து கொண்டுள்ளார். முகாமுக்குள் மூன்று சிப்பாய்கள் காவல் கடமையை பொறுப்பேற்றிருந்தனர்.

மூன்று கட்டங்களாக இவர்கள் பாதுகாப்பு கடமையில் ஈடுபட்டு வந்துள்ளனர். இவர்களில் தற்கொலை செய்து கொண்ட லான்ஸ் கேப்ரல் இரவு 10 மணிக்கு தனது காவல் கடமையை பொறுப்பேற்றுக்கொண்டுள்ளார்.

இதனடிப்படையில் இவர் காவல் கடமையை பொறுபேற்றுக் கொண்டதும் ஏனைய இருவரும் ஓய்வெடுக்க சென்றுள்ளனர். சுமார் ஒரு மணிநேரத்தின் பின்னர் துப்பாக்கி சத்தம் கேட்டதும் இவர்கள் சென்று பார்த்த போது லான்ஸ் கேப்ரல் துப்பாக்கி காயங்களுடன் கீழே விழுந்து கிடந்துள்ளார்.

துப்பாக்கிச் சூட்டில் அவரது மார்பு பகுதியிலும், தலையிலும் கடுமையான காயங்கள் ஏற்பட்ட நிலையில் அவர் உயிரிழந்திருந்ததாக ஹோமாகம காவல்துறையினர் தெரிவித்துள்ளனர்.

தற்கொலைக்கான காரணம் இதுவரை கண்டறியப்படாத நிலையில் காவற்துறையினர் தொடர்ந்தும் விசாரணைகளை மேற்கொண்டு வருகின்றனர்.

ஐவரைத் தடுத்து வைக்க மகிந்த சிறப்பு உத்தரவு

2008-08-20T18:16:00.001-07:00

கொழும்பு துறைமுக காவல்துறையினரால் கைது செய்யப்பட்ட ஐவரை மூன்று மாதங்களுக்கு தடுத்து வைப்பதற்கான சிறப்பு அதிகாரத்தை, சிறீலங்கா அரசுத் தலைவர் மகிந்த ராஜபக்ஸ காவல்துறையினருக்கு வழங்கியுள்ளார்.

இதன்மூலம் கைது செய்யப்பட்டவர்களுக்கு எதிராகக் குற்றப்பத்திரிகை தாக்கல் செய்யாது, நீதிமன்ற விசாரணையின்றி தடுத்து வைக்க முடியும் என அறிவிக்கப்பட்டுள்ளது.

சிறீலங்கா முப்படைகளின் தளபதி, மற்றும் பாதுகாப்பு அமைச்சர் என்ற அடிப்படையில் அரசுத் தலைவர் மகிந்த ராஜபக்ஸ இந்த உத்தரவைப் பிறப்பித்துள்ளார்.

இதேவேளை, ஊடகவியாலாளர் திஸ்ஸநாயத்தை அடுத்த மாதம் 5ஆம் நாள்வரை தொடர்ந்தும் தடுப்புக் காவலில் வைத்திருக்குமாறு நீதிமன்றம் உத்தரவிட்டுள்ளது.

யாழ்ப்பாணத்தில் ஒருவர் கொலை

2008-08-20T18:12:00.002-07:00

யாழ்ப்பாணத்தின் வடமராட்சியில் இன்று மாலை இடம்பெற்ற துப்பாக்கிச் சூட்டுச் சம்பவத்தில் குடும்பஸ்தர் ஒருவர் உயிரிழந்துள்ளார். இவர் 48 வயதான குட்டியன் சிவபாதம் என அடையாளம் காணப்பட்டுள்ளார்.

வல்வெட்டித்துறை மாவடியில் உள்ள இவரின் வீட்டுக்கு சென்ற இனம் தெரியாதவர்கள் துப்பாக்கிப் பிரயோகத்தை மேற்கொண்டபின் தப்பிச் சென்றுள்ளனர்.

சம்பவ இடத்திற்கு விஜயம் செய்து மரண விசாரணை மேற்கொண்ட பருத்தித்துறை நீதிமன்ற மேலதிக நீதிவான், சடலத்தை மந்திகை வைத்தியசாலையில் ஒப்படைக்குமாறு உத்தரவிட்டார்.

மங்களம் மாஸ்டரின் வாகனம் மோதி ஊர்காவற்படைச்சிப்பாய் மரணம்

2008-08-20T18:12:00.001-07:00

வடமத்திய மாகாண சபைத் தேர்தலில் போட்டியிடும் ரி.எம்.வி.பியின் மங்களம் மாஸ்டர் என அழைக்கப்படும் அய்யாத்துரை கதிர்காமத்தம்பி பயணித்த வாகனம் மோதியதில் ஊர்காவற்படைச்சிப்பாய் ஒருவர் உயிரிழந்துள்ளார்.

மங்களம் மாஸ்டர் பயணித்த ஜீப் வண்டி ஊர்காவல் படைச்சிப்பாய் சென்ற மோட்டார் சைக்களில் மோதியதாக காவல்துறையினர் தெரிவித்துள்ளனர்.

ஜீப் வண்டியின் சாரதியை கைதுசெய்துள்ளதுடன் வண்டியை கைப்பற்றியுள்ளதாகவும் காவல்துறையினர் தெரிவித்துள்ளனர்.

நேற்றைய மோதல்களில் நால்வர் பலி, 31 பேர் காயம் - படைத்தரப்பு

2008-08-20T08:15:00.000-07:00

விடுதலைப் புலிகளுடனான நேற்றைய மோதல்களில் தமது தரப்பில் நால்வர் கொல்லப்பட்டு, மேலும் 30ற்கும் மேற்பட்ட படையினர் காயமடைந்துள்ளதாக, சிறீலங்காவின் பாதுகாப்பு அமைச்சு அறிவித்துள்ளது.

முல்லைத்தீவு, மணலாறு, ஆன்டான்குளத்தில் படைத் தரப்பில் ஒருரவர் கொல்லப்பட்டதுடன், மேலும் 6 படையினர் காயமடைந்துள்ளனர்.

மாந்தை கிழக்கில் துணுக்காய், மல்லாவி, மணியகுளம் பகுதியில் மூன்று படையினர் கொல்லப்பட்டதுடன், மேலும் 23 படையினர் காயமடைந்துள்ளனர்.

யாழ் முகமாலை, வவுனியா பாலமோட்டையில் இரண்டு படையினர் காயமடைந்துள்ளனர்.

இந்த தகவல்களை சிறீலங்காவின் பாதுகாப்பு அமைச்சே அறிவித்துள்ளது.

நேற்றைய மோதல்கள் தொடர்பாக விடுதலைப் புலிகள் தரப்பில் இருந்து எந்தவித தகவல்களும் வெளியாகவில்லை.

பி.பி.சி செய்தியாளர் T.M.V.P குழுவால் மிரட்டப்பட்டதற்கு கண்டனம்

2008-08-20T08:14:00.001-07:00

BBC உலக சேவையில் சிங்கள மொழியிலான சந்தேசிய ஒலிபரப்பின் செய்தியாளர் T.M.V.P துணைப்படைக் குழுவால் மிரப்பட்டதற்கு, கொழும்பை தளமாகக் கொண்ட ஐந்து முக்கிய ஊடக அமைப்புகள் கண்டனம் தெரிவித்துள்ளன.

சந்தேசிய ஒலிபரப்பின் பொலநறுவை செய்தியாளர் தக்சிலா ஜெயசேன (Thakshila Jayasena) பொலநறுவையில் தேர்தலில் போட்டியிடும் துணைப்படைக் குழுவின் மங்களம் மாஸ்ரர் என்பவரது அடியாட்களால் நேற்று முன்தினம் மிரட்டப்பட்டிருந்தார்.

பொலநறுவை மன்னம்பிட்டியவில் நடைபெற்ற ஐக்கிய தேசியக் கட்சியின் தேர்தல் பேரணி பற்றிய செய்தியை சேகரித்துவிட்டு பொலநறுவை நகர் நோக்கிச் சென்றபோது இவர் மிரட்டப்பட்டிருந்தார்.

வந்தாறு மூலை கிழக்குப் பல்கலைக்கழகத்திலும் சிங்களத்தின் காடைத்தனம்!

2008-08-20T05:42:00.001-07:00

நேற்றைய தினம் கிழக்குப் பல்கலைக்கழக முதலாம் வருட முகாமைத்துவ தழிழ் மாணவி ஒருவருக்கு இறுதி ஆண்டு சிங்கள மாணவியால் பகிடிவதை எனும் பெயரில் பாலியல் துஸ்பிரயோகம் மேற்கொள்ளப்பட்டுள்ளது.

முகாமைத்துவக்கற்கை நெறிக்குத் தெரிவான முதலாம் ஆண்டு தழிழ் மாணவியை மேடையில் ஏற்றிய இறுதியாண்டு சிங்கள மாணவி சக ஆண்டு சிங்கள ஆண் மாணவகர் கை கொட்டி சிரிக்க குறித்த மாணவியின் உள்ளாடையினை கழற்றும் படி வற்புறுத்தி கழற்ற வைக்கப்பட்டுள்ளது. பீதியின் காரணம் பணிந்து குறித்த மாணவி அந்த துன்புறுத்தலின் பின்னர் மனநோயாளிக மாறியுள்ளார். மேலும் தொடர்ந்து கற்கை நெறியினை மேற்கொள்ள முடியாத அளவுக்கு மனநோயாளியாக மாறியுள்ளார்.

குறித்த காடைத்தனத்தினை மேற்கொண்ட சிங்கள மாணவி பல்கலைக்கழக மானிய ஆணைக்குழுவின் தலைவரின் உறவுக்காரி என்பதால் கிழக்குப் பல்கலைக்கழக நிர்வாக வாய் பேசா மௌனியாக இருப்பதாகத் தெரியவருகின்றது

இவ்வாண்டு சிங்கள மாணவர்களின் ஆதிக்கம் பல்கலைக்கழகத்தில் அதிகரித்துள்ளது மாத்திரமல்லாமல் தமிழ் மாணவ மாணவியரின் கல்விக்கு குந்தகம் விளைவிக்கும் செயற்பாடுகளும் திட்டமிடப்பட்டு நிகழ்த்தப்படுவதாக தெரியவருகின்றது.

மேலும், சிங்கள மாணவர்களின் வழிபாட்டிற்காக ஓர் பௌத்த விகாரையும் பல்கலைக்கழக வளாகத்தில் அமைக்கப்படவுள்ளதாகவும் தெரியவருகின்றது. மேலும் சிங்கள மாணவரின் வேண்டுகொழுக்கு இணக்க தங்களது தங்குமிட பொறுப்பதிகாரியாக ஓர் சிங்களவர் நியமிக்கபடவுள்ளதாகவும் தெரியவருகின்றது.

நான்கு இலட்சம் ஈழத்தமிழ் மக்களுக்கு உதவி செய்ய ஆறரைக் கோடி தமிழர்களால் முடியவில்லை - டி.இராஜேந்திரன்

2008-08-20T05:36:00.000-07:00

தமிழகத்தில் ஆறரை கோடி தமிழர்கள் இருந்தும் ஈழத் தமிழர்களுக்காக குரல் கொடுக்க முடியவில்லை என்றும் மத்தியில் 40 தமிழக எம்பிக்கள் இருந்தும் எதுவும் செய்ய முடியவில்லை என்றும் லட்சிய திமுக தலைவர் விஜய டி.ராஜேந்தர் கூறினார்.

அக் கட்சியின் இளைஞர் அணி சார்பில் கொள்கை விளக்க பொதுக்கூட்டம் சென்னையில் நடந்துது. அதில் டி.ராஜேந்தர் பேசியதாவது:

லட்சிய திமுக தொடங்கி 5வது ஆண்டில் அஞ்சாமல் நடைபோடுகிறோம். இலங்கை தமிழர்களுக்கு குரல் கொடுப்பதற்காக எம்ஜிஆர் ஆட்சி காலத்தில் திமுகவில் இணைந்தேன். தமிழன் என்ற உணர்வு என்னிடம் உள்ளதால் இதை நான் செய்தேன்.

கன்னடர்களுக்கு இருக்கும் இன உணர்வு தமிழர்களுக்கு இல்லை. குலேசன் படத்தை கர்நாடகத்தில் திரையிட வேண்டும் என்றால் ரஜினிகாந்த் மன்னிப்பு கேட்டால்தான் விடுவோம் என்று கூறினார்கள்.

அதனால் அவர் மன்னிப்பு கேட்டு படத்தை அங்கு வெளியிட்டுள்ளார். ஒகேனக்கல் பிரச்சனைக்காக நடத்தப்பட்ட நடிகர்கள் உண்ணாவிரதத்தில்இ ரஜினிகாந்தை முன்னிலைப்படுத்தியது தமிழர்களின் குற்றம்.

இலங்கையின் வட மாநிலங்கள் விடுதலைப்புலிகள் கட்டுப்பாட்டில் உள்ளன. இங்குள்ள 4 லட்சம் மக்களில் 2 லட்சம் பேர் அகதிகள். அவர்களுக்கு சாப்பாடு மருந்து எதுவும் இல்லை. செஞ்சிலுவை சங்கம் மூலம் மருந்தையும் அங்கு கொண்டு போக முடியவில்லை. மத்தியில் தமிழகத்தைச் சேர்ந்த 40 எம்பிக்கள் இருந்தும் எதுவும் செய்ய முடியவில்லை.

மற்ற மாநிலத்தினர் இலங்கையில் இருந்து அவர்கள் தாக்கப்பட்டால் சும்மா விடுவார்களா?. ஆறரை கோடி தமிழர்களால் 4 லட்சம் ஈழ தமிழர்களுக்கு குரல் கொடுக்க உணர்வில்லை என்று அவர் குற்றம் சாட்டினார்

கொட்டாஞ்சேனையில் காவற்துறை சிப்பாயின் கழுத்து அறுப்பு

2008-08-20T05:33:00.000-07:00

கொட்டாஞ்சேனை ஜெம்பட்டா வீதி காவல்துறை சிப்பாய் ஒருவர் கழுத்தறுக்கப்பட்டு கொலை செய்யப்பட்டுள்ளதாக கொட்டாஞ்சேனை காவற்துறையினர் தெரிவித்துள்ளனர்.

24 வயதான இந்திக பண்டார என்ற காவற்துறை சிப்பாயே இவ்வாறு கொலை செய்யப்பட்டுள்ளார்.

புலிகளுக்கு உதவியதாக நீதிமன்றத்தினால் முத்திரையிடப்பட்டு மூடப்பட்டிருந்த அச்சகம் ஒன்றில் பாதுகாப்புப் பணியில் ஈடுபட்டிருந்த போதே இந்த சம்பவம் நடைபெற்றுள்ளது. அச்சகத்தின் உரிமையாளர் ஏற்கனவே சிறையில் அடைக்கப்பட்டுள்ளார்.

காணாமல்போனவர்கள் தொடர்பில் அரசாங்கமே பதிலளிக்க வேண்டும்- மனோ கணேசன்

2008-08-20T05:32:00.001-07:00

கடத்தல் சம்பவங்களின் எண்ணிக்கையில் குறைந்து கூடும் நிலைமை காணப்பட்டாலும் இதுவரை காணாமல் போனவர்கள் குறித்து அரசாங்கமே பதில்கூறவேண்டும் என மக்கள் கண்காணிப்புக் குழுவின் ஏற்பாட்டாளர் மனோ கணேசன் கேள்வியெழுப்பியுள்ளார்.

“கடந்த வாரங்களில் கடத்தல் சம்பவங்கள் தொடர்பான முறைப்பாடுகள் குறைவாகக் கிடைத்துள்ளது என்பதற்காக கடத்தல்கள் குறைவடைந்து விட்டதாகக் கூறிவிட முடியாது. நேற்றுக் கூட இரண்டு கடத்தல் சம்பவங்கள் குறித்த முறைப்பாடுகள் எமக்குக் கிடைத்திருக்கின்றன” என மனோ கணேசன் எமது இணையத்தளத்துக்குத் தெரிவித்தார்.

“கடத்தல் சம்பவங்களின் எண்ணிக்கை கூடிக் குறைந்தாலும், இதுவரை கடத்தப்பட்டவர்கள் குறித்து யார் பதிலளிப்பது” என அவர் கேள்வியெழுப்பினார்.

இந்த வருடத்தில் இதுவரை 104 பேர் காணாமல் போயிருப்பதாக மக்கள் கண்காணிப்புக் குழு தெரிவித்துள்ளது. 2006ஆம் ஆண்டு முதல் சுமார் 200 பேர் காணாமல் போயிருப்பதாகவும், அவர்கள் இதுவரை வீடு திரும்பவில்லையெனவும் மக்கள் கண்காணிப்புக் குழு தெரிவித்துள்ளது.

“கடத்தல் சம்பவங்கள் குறைந்துவிட்டன, பிரச்சினை தீர்ந்துவிட்டது எனக் கூறி அரசாங்கம் தப்பிக்கொள்ள முடியாது. காணாமல் போனவர்கள் குறித்து அரசாங்கமே பதில் சொல்லவேண்டும்” என மனோ கணேசன் கூறினார்.

கடத்தல் சம்பவங்கள் குறைவடைந்துள்ளன என்பதை தாங்கள் ஒருபோதும் ஏற்றுக்கொள்ளப் போவதில்லையெனக் குறிப்பிட்ட மக்கள் கண்காணிப்புக் குழுவின் ஏற்பட்டாளர், அண்மைய பாதுகாப்புக் கெடுபிடிகள் காரணமாக கடத்தல்களின் எண்ணிக்கையில் வீழ்ச்சி ஏற்பட்டிருந்தாலும் இதனைவிட கூடுதல் நடவடிக்கைகள் எடுக்கப்பட வேண்டும் எனத் தெரிவித்தார்.

இதேவேளை, கடந்த சில நாட்களாக கடத்தல் சம்பவங்கள் குறைவடைந்து சென்றிருப்பதாகத் தெரிவித்திருக்கும் சிரேஷ்ட பொலிஸ் அத்தியேட்சகர் ரஞ்சித் குணசேகர, பொலிஸார் தொடர்ச்சியாக மேற்கொள்ளும் ரோந்து நடவடிக்கைகளாலேயே கடத்தல் சம்பவங்களில் வீழ்ச்சி ஏற்பட்டதாகவும் கூறினார்.

கடற்படையால் இழுத்துச் செல்லப்பட்ட கணவர் வெள்ளைவான் குழுவிடம் ஒப்படைக்கப்பட்டார்--ஒரு அதிர்ச்சி ரிப்போட்

2008-08-20T05:29:00.000-07:00

கொழும்பு புதுச்செட்டித்தெரு 70/27ஆம் இலக்கத்தில் வசித்து வந்த யாழ்.நெல்லியடியைப் பிறப்பிடமாகக் கொண்ட மூன்று பிள்ளைகளின் தந்தையான 34 வயதுடைய செல்வராஜா பாலகுமார் என்பவர் மோட்டார் சைக்கிளில் சென்ற இரண்டு கடற்படையினரால் இழுத்துச் செல்லப்பட்டு பின் இலக்கத்தகடு இல்லாத வெள்ளை வானில் சென்ற தமிழ் ஆயுதக்குழுவினரால் கடத்தப்பட்டு காணாமல் போயுள்ளார் என அவரது மனைவியான ரோகினி பாலகுமார் முறைப்பாடு செய்துள்ளார்.

வாழ்க்கைத் தொழில், தொழில்நுட்பப் பயிற்சி பிரதியமைச்சர் இராதாகிருஷ்ணனிடம் இவ்வாறு முறைப்பாடு செய்யப்பட்டுள்ளது.

இந்த முறைப்பாட்டில் கடந்த 15ஆம் திகதி வெள்ளிக்கிழமை காலை 9.30 மணிக்கு வீட்டுச் சோதனைக்காக பிரவேசித்த கடற்படைச் சிப்பாய்கள் தனது கணவரை தாக்கி இழுத்துச்சென்று இலக்கத்தகடு இல்லாத வெள்ளை வானில் வந்திருந்த தமிழ்க் குழுவினரிடம் ஒப்படைத்தனர்.

அவர்களுடன் காவற்துறைக் கான்ஸ்டபிள் ஒருவர் இருந்தார் எனவும் ரோகினி தெரிவித்தார். ஏற்கனவே இதே விலாசத்திலிருந்த மார்க்கண்டு வடிவானந்தன் கடந்த 2006ஆம் ஆண்டு 24ஆம் திகதி கடத்தப்பட்டு காணாமல் போயுள்ளார்.

இவரை விடுவிப்பதற்கு நிறுவன உரிமையாளர் 35 லட்சம் பணம் கப்பமாகச் செலுத்தியபோதும் அவர் இன்றுவரை விடுவிக்கப்படவில்லை என்றும், உரிமையாளர் தற்போது தமிழ் நாட்டில் தங்கியிருக்கிறார் எனவும் தெரிவிக்கப்படுகிறது.

குறிப்பிட்ட தமிழ்க்குழு பாலகுமாரை முன்னர் ஒருமுறை எச்சரித்துச் சென்றது எனவும், அதன் பிறகே கடற்படையினரின் உதவியுடன் தமிழ்க் குழுவால் தனது கணவர் கடத்தப்பட்டுள்ளார் எனவும் ரோகினி தெரிவித்தார்.

இதேவேளை, கடந்த 18ஆம் திகதி வெள்ளிக்கிழமை வத்தளை, ஹூணுப்பிட்டிய, சிறிஜயந்தி மாவத்தையில் வசிக்கும் கிறீஸ்தோதிரம் பிரான்சிஸ் சேர்ச்சில் என்ற 49 வயதுடைய தமிழர், இரவு 9.30 மணியளவில் அவரது இல்லத்தில் வைத்துத் தாக்குதலுக்கும் விசாரணைக்கும் உட்படுத்தப்பட்டு பின்னர் கடத்தப்பட்டுள்ளார் எனத் தெரிவிக்கப்படுகிறது.

இவர் புங்குடுதீவைப் பிறப்பிடமாகக் கொண்டவர். அதேவேளை இவர் வெளிநாட்டில் தொழில் புரிந்துகொண்டிருந்தபோது 1997இல் ஏற்பட்ட ஒரு வாகன விபத்தில் தனது ஒரு காலை இழந்தவர் ஆவார்.

இச்சம்பவம் தொடர்பாக சேர்ச்சிலின் மனைவி மக்கள் கண்காணிப்புக் குழுவில் முறைப்பாடு செய்துள்ளனர். அத்துடன்,

இச்சம்பவம் தொடர்பாக கிரிபத்கொட காவற்துறை நிலையத்திலும் முறைப்பாடு பதிவு செய்யப்பட்டுள்ளது. இம்முறைப்பாடு குறித்த மேல் நடவடிக்கைகளுக்காக மக்கள் கண்காணிப்புக்குழுவின் காணாமல் போனோர் பட்டியலில் சேர்க்கப்பட்டுள்ளனர் எனக் கண்காணிப்புக்குழுவின் ஏற்பாட்டாளர் மனோகணேசன் தெரிவித்துள்ளார்.

வடக்கு, கிழக்கு பல்கலைக்கழகங்களில் சிங்கள மாணவர் அனுமதி; பெற்றோர் எதிர்ப்புப் போராட்டம்

2008-08-20T05:28:00.000-07:00

தமது விருப்பத் தேர்வுக்கு மாறாக யாழ்ப்பாண பல்கலைக்கழகத்தில் உயர்கல்வி பயிலுமாறு தென்னிலங்கை மாணவர்களுக்கு பல்கலைக்கழக மானியங்கள் ஆணைக்குழு அறிவித்திருப்பதை எதிர்த்து, பல்கலைக்கழக மானியங்கள் ஆணைக்குழு முன்னால் நேற்று செவ்வாய்க்கிழமை மாணவர்களின் பெற்றோர் ஆர்ப்பாட்டத்தில் ஈடுபட்டனர்.

அத்துடன், தமது பிரச்சினைக்குத் தீர்வு கிடைக்கும் வரை சத்தியாக்கிரகப் போராட்டத்தில் ஈடுபடப்போவதாகவும் ஆர்ப்பாட்டத்தில் கலந்துகொண்டோர் தெரிவித்துள்ளனர்.

2007 ஆம் ஆண்டு க.பொ.த உயர்தரப் பரீட்சைக்குத் தோற்றி, பல்கலைக்கழக அனுமதி கிடைத்த மாணவர்கள் 306 பேருக்கு, யாழ்ப்பாண பல்கலைக்கழகத்துக்கு தெரிவு செய்யப்பட்டுள்ளதாக பல்கலைக்கழக மானியங்கள் ஆணைக்குழு கடிதம் மூலம் அறிவித்திருந்தது. இவர்களில் 23 பேர் மருத்துவபீடத்திற்கும், 80 பேர் முகாமைத்துவ பீடத்திற்கும், 20 பேர் சட்ட பீடத்திற்கும் தெரிவுசெய்யப்பட்டுள்ளனர்.

இருப்பினும், மாணவர்களின் பாதுகாப்பு மற்றும் போக்குவரத்து உள்ளிட்ட ஏனைய வசதிகளைக் கருத்திற்கொண்டு, தமது பிள்ளைகளை யாழ்.பல்கலைக்கழகத்துக்கு அனுப்பமுடியாது என பெற்றோர் தெரிவிக்கின்றனர்.

"யாழ்ப்பாணத்துக்கு தமது பிள்ளைகளை அனுப்புவதற்கு பெற்றோர் எதிர்ப்புத் தெரிவிப்பது இன வேறுபாட்டின் அடிப்படையில் அல்ல. தமது பிள்ளைகளின் பாதுகாப்பு குறித்து பெற்றோர் அதிகம் கவலைப்படுவதே இதற்குக் காரணம்" என பல்கலைக்கழகங்கங்களுக்கிடையிலான மாணவர் பேரவையின் ஏற்பாட்டாளர் உதுல் ப்ரேமரத்ன தெரிவித்திருக்கிறார்.

தமது விருப்பமின்மையை பல்கலைக்கழக மானியங்கள் ஆணைக்குழுவுக்கும், உரிய அதிகாரிகளுக்கும் பலதடவைகள் வெளிப்படுத்தியுள்ளபோதிலும், அவர்கள் உரிய பதில் எதனையும் வழங்காதிருப்பதாகவும் பெற்றோர் விசனம் தெரிவிக்கின்றனர்.

கடந்த ஓகஸ்ட் 14 ஆம் திகதி இந்த விடயம் தொடர்பாகக் கலந்துரையாட வருமாறு பல்கலைக்கழக மானியங்கள் ஆணைக்குழு அழைப்பு விடுத்தபோதிலும், கலந்துரையாடலில் கலந்துகொள்ள மாணவர்களுக்கு மட்டுமே அனுமதி வழங்கப்பட்டதாகவும் பெற்றோர் தெரிவிக்கின்றனர்.

"முதல் ஒரு தவணைக்கு மாத்திரம் மட்டக்களப்பு சுகாதார பராமரிப்பு நிலையத்திற்கு செல்லுமாறும், பின்னர் யாழ்ப்பாண பல்கலைக்கழகத்தில் கல்வியைத் தொடருமாறும் குறிப்பிடப்பட்ட உடன்படிக்கை ஒன்றில் கைச்சாத்திடுமாறு எம்மிடம் ஆணைக்குழு கேட்டது. இருப்பினும் நாம் அந்த உடன்படிக்கையில் கைச்சாத்திட விரும்பவில்லை" என யாழ் மருத்துவ பீடத்திற்கு தெரிவுசெய்யப்பட்டுள்ள பாணந்துறை சிறீ சுமங்கல வித்தியாலயத்தைச் சேர்ந்த உதாரா ரணசிங்க எனும் மாணவி தெரிவித்துள்ளார்.

இதேபோன்றே, யாழ் பல்கலைக்கழகத்துக்கு தெரிவுசெய்யப்பட்டுள்ள ஏனைய பீடங்களைச் சேர்ந்த மாணவர்களும், முதல் ஒரு தவணையை மாத்திரம் கிழக்குப் பல்கலைக்கழகத்தில் பயிலுமாறும், பின்னர் யாழ். பல்கலைக்கழகத்தில் கல்வியைத் தொடருமாறும் குறிப்பிடப்பட்ட உடன்படிக்கையில் கைச்சாத்திடுமாறு வேண்டப்பட்டதாகவும் அந்த மாணவி தெரிவித்துள்ளார்.

"இந்தப் பிரச்சினைக்குத் தீர்வினைப் பெற்றுக்கொள்வதற்காக 4 தடவைகள் பல்கலைக்கழக மானியங்கள் ஆணைக்குழுவுக்கு வந்திருக்கிறேன்" எனத் தெரிவிக்கும் மாத்தளையைச் சேர்ந்த மலானி ஜெயசிங்க எனும் தாயொருவர், ஏன் இந்த அதிகாரிகள் தனது பிள்ளையை யாழ். பல்கலைக்கழகத்திற்கு தெரிவுசெய்துள்ளனர் எனவும் கேள்வியெழுப்பினார்.

"யாழ்ப்பாணத்தை எப்போது சென்றடைவோம் என்பதே எமக்குத் தெரியாது. ஏ-9 பாதை மூடப்பட்டுள்ள நிலையில், நாம் கடல்மார்க்கமாகவே அங்கு செல்லவேண்டும். திருகோணமலைக்குச் சென்று அங்கு கப்பலுக்காகக் காத்திருந்து, 4 நாட்களின் பின்னரே யாழ்ப்பாணத்தை அடையமுடியும்" என்றும் அவர் கூறுகிறார்.

இதேவேளை, அண்மையில் பாராளுமன்றத்தில் நடைபெற்ற யாழ்.பல்கலைக்கழகத்தில் சிங்கள, முஸ்லிம் மாணவர்களை இணைப்பது தொடர்பான சபை ஒத்திவைப்பு வேளை பிரேரணையில் உரையாற்றிய தமிழ்த் தேசியக் கூட்டமைப்பின் மட்டக்களப்பு மாவட்ட பாராளுமன்ற உறுப்பினர் கே.தங்கேஸ்வரி, யாழ்.பல்கலைக்கழகத்திற்கு 1,203 மாணவர்கள் உள்ளீர்க்கப்படுவதாகவும், இவர்களில் சிங்கள, முஸ்லிம் மாணவர்கள் 261 பேர் அடங்குவதாகவும் சுட்டிக்காட்டினார்.

"மூவின மாணவர்களும் கலந்து கற்பது நல்ல நடவடிக்கை. ஆனால், நாட்டில் அவ்வாறான சூழ்நிலை இல்லை. வடக்கில் யுத்தம் இடம்பெறுகிறது. இவ்வாறான நிலையில் சிங்கள, முஸ்லிம் மாணவர்கள் எவ்வாறு யாழ்ப்பாணம் சென்று கல்வி கற்க முடியும்" என்றும் அவர் கேள்வியெழுப்பியிருந்தார்.

"வடக்கு, கிழக்கில் மாணவர்கள் கல்வி கற்கக் கூடிய நல்ல சூழ்நிலை ஏற்படுத்தப்பட வேண்டும். அத்துடன், ஏ9 பிரதான வீதி திறக்கப்படவேண்டும். இவற்றை அரசாங்கம் செய்தால் யாழ்.பல்கலைக்கழகத்தில் மூவின மாணவர்களும் கல்வி கற்கக்கூடிய சூழ்நிலை ஏற்படும். இதில் அரசாங்கமும் உயர் கல்வி அமைச்சும் உடனடி கவனம் செலுத்தவேண்டும்" எனவும் அவர் பாராளுமன்றத்தில் குறிப்பிட்டிருந்தார்.

இந்த விவகாரம் குறித்து உயர்கல்வி பிரதியமைச்சர் மயோன் முஸ்தபாவைத் தொடர்பு கொண்டு கேட்டபோது, உயர்கல்வி அமைச்சுக்கு இதுகுறித்து எதுவும் தெரியாது எனவும், பல்கலைக்கழக மானியங்கள் ஆணைக்குழுவுக்கே இவற்றைத் தீர்மானிக்கும் முழுஅதிகாரமும் இருப்பதாகவும் கூறினார்.

"சிங்கள மாணவர்களை யாழ். பல்கலைக்கழகத்துக்கு அனுமதித்திருப்பது நியாயமற்றது. தற்போதுள்ள சூழ்நிலையில் அவர்களால் அங்கு கல்வி கற்க முடியாது. பல்கலைக்கழக மானியங்கள் ஆணைக்குழு ஏன் இப்படி நடந்துகொள்கிறது என எனக்குத் தெரியாது" என்றும் அவர் தெரிவித்தார்.

கிழக்குப் பல்கலைக்கழகத்திற்கும் சிங்கள மாணவர்கள் அனுமதி

இதற்கிடையில், கிழக்குப் பல்கலைக்கழகத்திற்குத் தெரிவுசெய்யப்பட்டிருக்கும் மாணவர்கள்; சிலரும், நேற்று செவ்வாய்க்கிழமை தாம் எதிர்நோக்கும் உணவு மற்றும் போக்குவரத்துப் பிரச்சினைகள் தொடர்பில் விரிவாகக் குறிப்பிடப்பட்ட கடிதம் ஒன்றினை பல்கலைக்கழக மானியங்கள் ஆணைக்குழுவுக்கு கையளித்துள்ளனர்.

வடக்கு, கிழக்கு மாகாணங்களிலுள்ள சகல பல்கலைக்கழகங்களிலும் சிங்கள மாணவர்களை அனுமதிப்பது எனும் பல்கலைக்கழக மானியங்கள் ஆணைக்குழுவின் தீர்மானத்திற்கமைய கிழக்குப் பல்கலைக்கழகத்திற்கும் இந்த வருடம் 41 சதவீதமான சிங்கள மாணவர்கள் தெரிவுசெய்யப்பட்டுள்ளனர்.

இதற்கமைய, கிழக்குப் பல்கலைக்கழகத்திற்கு 358 தமிழ் மாணவர்களும், 306 சிங்கள மாணவர்களும், 79 முஸ்லிம் மாணவர்களுமாக மொத்தம் 743 மாணவர்கள் தெரிவு செய்யப்பட்டுள்ளனர்.

கிழக்கு மாகாணம் விடுவிக்கப்பட்டுள்ளதாகத் தெரிவிக்கப்பட்டபோதிலும், பாதுகாப்பான சூழலில் கிழக்குப் பல்கலைக்கழத்தில் தம்மால் கல்வியைத் தொடர முடியாதென சிங்கள மாணவர்கள் தெரிவிக்கின்றனர். அத்துடன், பெற்றோரும் இதற்கு தமது எதிர்ப்பைத் வெளிப்படுத்துகின்றனர்.

"எனது பிள்ளையை மரண வீடொன்றில் விட்டுவிட்டு வந்ததாகவே நான் நினைக்கிறேன். இவ்வளவு காலமும் கஷ்டப்பட்டு எனது பிள்ளையைப் படிப்பித்தது இவ்வாறானதொரு இடத்தில், பெரும் அச்சத்துக்கு மத்தியில் உயர்கல்வியைத் தொடர்வதற்கு அல்ல" என கிழக்குப் பல்பலைக்கழக மருத்துவ பீடத்தில் தனது மகனை அனுமதிக்கச் சென்றிருந்த தாயொருவர் பி.பி.சி. செய்திச் சேவைக்குக் கூறியுள்ளார்.

தென்கிழக்குப் பல்கலைக்கழகத்தில் முதன்முறையாக சிங்கள மாணவர்கள் அனுமதி

இதேவேளை, முதன்முறையாக ஒலுவில் தென்கிழக்குப் பல்கலைக்கழகத்துக்கு சிங்கள மாணவர்கள் இணைத்துக்கொள்ளப்பட்டிருப்பதாக துணைவேந்தர் கலாநிதி குசைன் இஸ்மாயில் தெரிவித்துள்ளார்.

2008/2009 ஆம் கல்வியாண்டுக்கு அனுமதிக்கப்பட்டிருக்கும் மாணவர்களில் நாற்பது வீதமான சிங்கள மாணவர்களுக்கு அனுமதி வழங்கப்பட்டிருப்பதாகவும் பி.பி.சி. செய்திச்சேவைக்கு அவர் தெரிவித்துள்ளார்.

குறித்த கல்வியாண்டில் 361 முஸ்லிம் மாணவர்களுக்கும், 140 சிங்கள மாணவர்களுக்கும், 17 தமிழ் மாணவர்களுக்கும் தென்கிழக்குப் பல்கலைக்கழகத்தில் அனுமதி வழங்கப்பட்டுள்ளது.

"தேசிய பல்கலைக்கழகங்கள் தனிப்பட்ட இனத்துக்காக ஆரம்பிக்கப்படுவது பொருத்தமானதல்ல. அந்த வகையில் தென்கிழக்குப் பல்கலைக்கழகத்துக்கு சிங்கள மாணவர்கள் அனுமதிக்கப்பட்டிருப்பதில் சிந்திப்பதற்கு எதுவுமேயில்லை" எனவும் தென்கிழக்குப் பல்கலைக்கழக துணைவேந்தர் கலாநிதி குசைன் இஸ்மாயில் தெரிவித்துள்ளார்.

இது குறித்து, உயர்கல்வி பிரதியமைச்சர் மயோன் முஸ்தபாவைத் தொடர்புகொண்டு கேட்டபோது, சிங்கள மாணவர்கள் தென்கிழக்குப் பல்கலைக்கழகத்தில் கல்வி கற்பது பிரச்சினைக்குரியதொன்றல்ல எனவும், சிங்கள மாணவர்கள் தமிழ் மொழியைக் கற்பதற்கும், முஸ்லிம் மாணவர்கள் சிங்கள அறிவைப் பெற்றுக்கொள்வதற்கும் இது நல்ல சந்தர்ப்பத்தை ஏற்படுத்திக் கொணடுக்கும் எனவும் அவர் கூறினார்.

இருப்பினும், கிழக்கு மற்றும் யாழ். பல்கலைக்கழகங்களுக்கு சிங்கள மாணவர்கள் அனுமதிக்கப்பட்டுள்ளமை குறித்து பல்கலைக்கழக மானியங்கள் ஆணைக்குழு பரிசீலனை செய்யவேண்டும் எனவும் அவர் தெரிவித்தார்.

உரிமைக்காகவும் வறுமைக்காகவும் போராடும் இளைஞர்களை அரசாங்கம் அழித்தொழிக்கிறது – விக்கிரமபாகு

2008-08-20T05:27:00.000-07:00

வடக்கில் உரிமைக்காகப் போராடும் தமிழ் இளைஞர்களையும் தெற்கில் வேலை வாய்ப்பின்மை, வறுமை என்பவற்றை எதிர்த்துப் போராடும் இளைஞர்களையும் இராணுவபலத்தின் ஊடாக அழித்தொழிக்கும் இரண்டு வகையான யுத்தங்களையே ஜனாதிபதி மகிந்த ராஜபக்ஷவின் இன்றைய அரசாங்கம் முன்னெடுத்து வருகின்றது என இடதுசாரிமுன்னணியின் தலைவர் கலாநிதி விக்கிரமபாகு கருணாரத்ன தெரிவித்துள்ளார்.

சப்ரகமுவ மாகாண சபை தேர்தலில் கேகாலை மாவட்ட தலைமை வேட்பாளர் பிறேம்குலதுங்கவை ஆதரித்து எட்டியாந்தோட்டை சந்தை பகுதியில் நடைபெற்ற கூட்டத்தில் கலாநிதி விக்கிரமபாகு கருணாரத்ன தொடர்ந்து உரையாற்றுகையில்,

இன்று இந்த அரசாங்கம் இரண்டு முனைகளில் யுத்தத்தை நடத்துகின்றது. ஒரு புறம் வடபகுதியில் தமது நிலத்துக்காகவும் உரிமைக்காகவும் போராடும் இளைஞர்களை இராணுவத்தின் மூலம் அழிக்க முயல்கின்றது. மறுபக்கத்தில் வாழ்க்கைச் செலவு உயர்வு,

வேலையின்மை போன்றவற்றிற்கு எதிராகப் போராடும் தென் இலங்கை இளைஞர்களை அவசர காலச் சட்டத்தின் துணையுடன் ஒடுக்க முயல்கிறது. இத்தகைய சூழ்நிலையில் வடக்கில் தமது உரிமைக்காக போராடும் இளைஞர்களுக்காகவும் தெற்கில் பொருளாதார பிரச்சினை, வேலைவாய்ப்பிற்காக போராடும் இளைஞர்களுக்காகவும் குரல் கொடுப்பது தமது கடமையாகும்.

ஜே.வி.பி. அவசர காலச் சட்டத்திற்கு ஆதரவளித்து விட்டு இளைஞர்களின் போராட்டத்தை ஆதரிப்பதாக கூறுவது ஒரு ஏமாற்று நாடகமாகும்.

கடந்த ஜூலை 10 ஆம் திகதி வேலைநிறுத்தப் போராட்டத்தை தொடக்கி வைத்த ஜே.வி.பி. அதை இடைநடுவில் கைவிட்டது என்பதே உண்மை நிலையாகும். ஆனால், தாங்கள் அந்த போராட்டத்தை வெற்றிகரமாக முன்னெடுத்ததாகவும், இந்தப் போராட்டத்துக்கு மலையக தோட்டத் தொழிலாளர் மற்றும் வடக்கு, கிழக்கு தொழிலாளர்கள் முழு ஆதரவை தெரிவித்து இருந்தனர் எனவும் கூறினார்.

இன்றும் ஜே.வி.பி. எல்லா தேசிய சக்திகளையும் இணைத்து போராட்டம் நடத்த வக்கற்றே நிற்கிறது. பல்வேறு நிலைகளில் இந்த அரசாங்கத்தின் பொய் வேஷம் கலைந்து வருகிறது. இந்த நாட்டு மக்கள் ஒன்றிணைந்து இந்த அரசாங்கத்தை அப்புறப்படுத்தும் நாள் வெகு தூரத்தில் இல்லை என்றும் அவர் தெரிவித்தார்.

சிறுபான்மையினமா – காவற்துறை அதிகாரியின் குடும்பமும் கைது செய்யப்படலாம்

2008-08-20T05:25:00.000-07:00

கொழும்பு வலய நடவடிக்கைப் பிரிவு காவற்துறை அதிகாரியின் மனைவியும் குடும்பத்தினரும் கண்டி காவற்துறையினரால் தடுத்து வைக்கப்பட்ட சம்பவமொன்று இடம் பெற்றுள்ளது.

அக்கரைப்பற்றிலிருந்து கண்டி ஊடாகக் கொழும்பு நோக்கி பயணிகள் வாகனமொன்றில் பயங்கரவாதிகள் செல்வதாகக் கூறி கண்டி தலைமையகக் காவற்துறையினருக்கு கிடைத்த தகவலை அடுத்து அவர்கள் அந்தப் பயணிகள் வாகனத்தை மறித்துச் சோதனையிட்டனர். 12 முஸ்லிம்களும் 3 தமிழர்களும் அந்த வாகனத்தில் இருந்துள்ளனர்.

அதிகாலை 1.30க்கு வானை வழிமறித்த காவற்துறையினர் அவர்களை கண்டி காவற்துறை நிலையத்திற்கு கைது செய்து அழைத்துச் சென்றனர். இந்த வானில் கொழும்பு பிரதிப் பொலிஸ்மா அதிபரின் பிரிவுக்குட்பட்ட, கொழும்பு வலய நடவடிக்கைப் பிரிவு காவற்துறை அதிகாரியின் மனைவியும் குடும்பத்தினருமே பயணம் செய்திருந்தனர்.

காவற்துறை நிலையத்தில் மேற்படி காவற்துறை அதிகாரியின் மனைவி தன்னை அடையாளப்படுத்தியதுடன் தனது கணவரின் பதவி நிலையையும் தெரியப்படுத்தினார்.

எனினும் காவற்துறையினர் அவர்களை விடுவிக்கவில்லை. கண்டி பிரதிக் காவற்துறை மா அதிபரின் கவனத்திற்கு இவ்விடயம் கொண்டு வரப்பட்டு அவர்களை விடுவிக்குமாறு அவர் உத்தரவிட்டும் 17 மணி நேரத்தின் பின்னரே அவர்கள் விடுவிக்கப்பட்டனர்.

சிறுபான்மையின காவற்துறை அதிகாரி என்பதால் பெரும்பான்மையின காவற்துறையினர் இவர்களை மிக மோசமாக நடாத்தியிருப்பதாக அந்த காவற்துறை அதிகாரியின் குடும்பத்தினர் முறையிட்டுள்ளனர்.

திஸநாயகம் மீதான விசாரணையை எதிர்வரும் 25ஆம் திகதி எடுத்துக்கொள்ள உயர்நீதிமன்றம் தீர்மானம்

2008-08-20T05:22:00.000-07:00

பயங்கரவாதத் தடுப்புப் பிரிவினரால் தடுத்துவைக்கப்பட்டிருக்கும் ஊடகவியலாளர் ஜே.எஸ்.திஸநாயகம் மீதான குற்றச்சாட்டுத் தொடர்பான விசாரணைகளை எதிர்வரும் 25ஆம் திகதி நடத்துவதற்கு கொழும்பு உயர்நீதிமன்றம் தீர்மானித்துள்ளது.

திஸநாயகம் தொடர்பான ஆவணங்களை சமர்ப்பிக்குமாறு உயர்நீதிமன்றம் நீதவான் நீதிமன்ற பதிவாளருக்குப் பணிப்புரை வழங்கியுள்ளது. திஸநாயகம் மீதான விசாரணை அறிக்கைகளை பயங்கரவாதத் தடுப்புப் பிரிவினர் நீதிமன்றத்தில் சமர்ப்பிக்க வேண்டுமென நீதிமன்றம், சட்டமா அதிபர் திணைக்களத்துக்கு அறிவித்துள்ளது.

2006ஆம் ஆண்டு ஜுன் 1ஆம் திகதி முதல் 2007ஆம் ஆண்டு ஜுன் 1ஆம் திகதி வரையான காலப்பகுதியில் வடக்கு, கிழக்கில் மாதாந்தச் சஞ்சிகையை வெளியிட்டமை, விநியோகித்தமையானது பயங்கரவாதத் தடுப்புச் சட்டத்துக்கு எதிரானது என ஊடகவியலாளர் திஸநாயகம் மீது குற்றப்பத்திரம் தாக்கல்செய்யப்பட்டுள்ளது.

சந்தேகத்தை ஏற்படுத்திய வங்கிக் கணக்குப் புத்தகம், சில சஞ்சிகைகள் மற்றும் கையடக்கத் தொலைபேசி போன்றவற்றை பயங்கரவாதத் தடுப்புப் பிரிவினர் கைப்பற்றியிருப்பதாக அவர்மீதான குற்றப்பத்திரத்தில் குறிப்பிடப்பட்டுள்ளது.

கடந்த மார்ச் மாதம் 7ஆம் திகதி ஊடகவியலாளர் திஸநாயகம் மற்றும் அச்சக உரிமையாளரான ஜசிகரன், அவருடைய மனைவி வளர்மதி ஆகியோர் பயங்கரவாதத் தடுப்புப் பிரிவினரால் கைதுசெய்யப்பட்டனர்.

இவர்கள் எந்தக் குற்றச்சாட்டும் சுமத்தப்படாத நிலையில் 150 நாட்களுக்கு மேலாகத் தடுத்துவைக்கப்பட்டிருந்தனர். இந்த நிலையில் ஊடகவியலாளர் திஸநாயகம் பயங்கரவாத அமைப்புடன் தொடர்புபட்டவர் என தற்பொழுது பயங்கரவாதத் தடுப்புப் பிரிவு குற்றஞ்சாட்டியுள்ளது.

இதேநேரம், திஸநாயகம் மீது குற்றப்பத்திரம் தாக்கல் செய்யப்படவேண்டும், அல்லது அவர் விடுவிக்கப்பட வேண்டும் என சர்வதேச மன்னிப்புச் சபை உள்ளிட்ட பல்வேறு மனிதநேய அமைப்புக்களும், சர்வதேச ஊடக அமைப்புக்களும் தொடர்ச்சியாகக் கோரிக்கை விடுத்து வந்தமை இங்கு குறிப்பிடத்தக்கது.

அரசாங்கம் புண்ணாக்கு சாப்பிடுகிறது அதனால் நாமும் சாப்பிடுகிறோம்-விமல் வீரவன்ஸ

2008-08-20T05:21:00.000-07:00

வான்பரப்பில் இருந்து உணவுப் பொதிகளைப் போடும் நிலைமைக்கு உட்பட்ட நாடாக மேற்குலக நாடுகள் இலங்கையை பட்டியலிட்டுள்ளதாக தேசிய சுதந்திர முன்னணியின் தலைவர் விமல் வீரவன்ஸ தெரிவித்துள்ளார்.

இந்த நிலையில் ஒன்றிணைந்து செயற்பட வேண்டிய நேரம் இதுவெனவும் கூத்தாட வேண்டிய சந்தர்ப்பம் இது அல்ல எனவும் அவர் கூறியுள்ளார். பணிப்புறக்கணிப்புகள், அரசாங்கம் நடத்தும் தேர்தல்கள் என்பன இந்த பிரச்சினைகளை திசைத்திருப்பும் செயற்பாடுகள்.

அரசாங்கம் இந்த மூடத்தனமான வேலையை செய்யும் போது, ஏனையோரும் இந்த மூடத்தனமான வேலையை செய்ய தமக்கு உரிமை இருப்பதாக கூறுகின்றனர் எனவும் விமல் வீரவன்ஸ குறிப்பிட்டுள்ளார். ‘

யுத்தம் என்றால் அரசாங்கம் தேர்தலை நடத்தமால் இருக்காலம்தானே, அரசாங்கத்திற்கு தேர்தல் நடத்த முடிந்தால் எமக்கு ஏன் பணிப்புறக்கணிப்பை மேற்கொள்ள முடியாது என சகோதரர் லால்காந்த கேள்வி எழுப்பியிருந்தார். அரசாங்கம் புண்ணாக்கு சாப்பிடுகிறது அதனால் நாமும் சாப்பிடுகிறோம்,

அரசாங்கத்திற்கு புண்ணாக்கு சாப்பிட முடிந்தால் ஏன் எங்களுக்கு சாப்பிட முடியாது என்றுதானே லால்காந்த கேட்கிறார் எனவும் தேசிய சுதந்திர முன்னணியின் தலைவர் விமல் வீரவன்ஸ குறிப்பிட்டுள்ளார்.

பிரச்சாரக் கூட்டத்திற்கு மக்கள் வராததல் காத்திருந்தார் இலங்கை பிரதமர்

2008-08-20T05:17:00.000-07:00

தம்புத்தேகம ஐக்கிய மக்கள் சுதந்திரக் கூட்டமைப்பின் இறுதித் தேர்தல் பிரசாரக் கூட்டத்திற்கு மக்கள் சமூகமளிக்காத நிலையில் பிரதமர் ரட்ணசிறி விக்கிரமநாயக்க மக்களுக்காக காத்திருந்ததாக தகவல் வெளியாகியுள்ளது.

வடமத்திய மாகாணத்தில் அமைந்துள்ள தம்புத்தேகம பிரதேசத்தில் நேற்று முற்பகல் 10.30க்கு ஐக்கிய மக்கள் சுதந்திரக் கூட்டமைப்பின் தேர்தல் பிரசாரத்திற்கான ஏற்பாடுகள் செய்யப்பட்டிருந்தன.

இந்த கூட்டத்திற்காக மாகாணம் முழுவதும் கட்அவுட்கள், பிரசார சுவரொட்டிகள் என தடல்புடலான ஏற்பாடுகள் செய்யப்பட்டிருந்தாக தெரிவிக்கப்படுகிறது. கூட்டம் 10.30க்கு ஆரம்பமாக விருந்த போதிலும் மக்கள் கூட்டம் இல்லாத நிலையில் மதியம் 12.30 மணிக்கே கூட்டம் ஆரம்பிக்கப்பட்டது.

எனினும் சுமார் 150 பேரே கூட்டத்தில் கலந்துக்கொண்டதாக தெரியவந்துள்ளது. கூட்டத்தில் உரையாற்றவிருந்த பிரதமர் ரட்ணசிறி விக்கிரமநாயக்க மக்கள் கூடும் வரை அருகில் உள்ள இடம் ஒன்றில் காத்திருந்திருந்ததாகவும் மக்களை அழைத்து வரும் பணியில் ஐக்கிய மக்கள் சுதந்திரக் கூட்டமைப்பின் வேட்பாளர்களும், அமைப்பாளர்களும் ஈடுபட்டிருந்ததாக கூறப்படுகிறது.

இதேவேளை தம்புத்தேகம பிரதேசத்தில் ஜே.வீ.பீயினர் நடத்திய கூட்டத்தில் 5 ஆயிரம் பேர் வரை கலந்து கொண்டதாகவும் இந்த கூட்டத்தை குழப்புவதற்காக ஐக்கிய மக்கள் சுதந்திரக் கூட்டமைப்பு ஏற்பாடு செய்த கூட்டத்திற்கு மக்கள் வராத நிலையில் தொடர்ந்தும் மக்களை அழைத்துவரும் பணிகள் மேற்கொள்ளப்பட்டிருந்தாகவும் தெரிவிக்கப்பட்டுள்ளது.

நிலையில் மக்கள் கூட்டத்திற்கு சமூகமளிக்காததால் அதனை ஒளிப்பதிவுசெய்ய ஊடகவியலாளர்களுக்கு ஐக்கிய மக்கள் சுதந்திரக் கூட்டமைப்பினர் அனுமதி வழங்கவில்லை.

விடுவிக்கப்பட்ட பகுதிகளில் புதிய பொலிஸ் நிலையங்கள் அமைக்கப்படும்- பிரதிப் பொலிஸ்மா அதிபர்

2008-08-20T05:15:00.000-07:00

அண்மையில் இராணுவத்தினரால் விடுவிக்கப்பட்ட விடத்தல் தீவு உட்பட ஏனைய பகுதிகளில் விரைவில் புதிய பொலிஸ் நிலையங்கள் அமைக்கப்படும் எனப் பொலிஸார் தெரிவித்துள்ளனர்.

புதிதாக அமைக்கப்படவிருக்கும் பொலிஸ் நிலையங்களில் பணியாற்றுவதற்குப் பொலிஸார் முன்வந்திருப்பதுடன், அவ்வாறு அமைக்கப்படும் பொலிஸ் நிலையங்களில் பணியாற்றுபவர்களுக்கு 5 ஆயிரம் ரூபா விசேட கொடுப்பனவு வழங்கப்படும் எனவும் பிரதிப் பொலிஸ்மா அதிபர் மஹிந்த பாலசூரிய கூறியுள்ளார்.

மடு பகுதியில் புதிய பொலிஸ் நிலையமொன்றை கடந்த சனிக்கிழமை திறந்துவைத்து உரையாற்றும்போதே அவர் இவ்வாறு தெரிவித்துள்ளார்.

அண்மையில் விடுவிக்கப்பட்ட மன்னார் மற்றும் வடக்கின் ஏனைய பகுதிகளில் பகுதியில் வீதிகள் மற்றும் பாலங்களை அமைப்பதற்கும் அரசாங்கம் திட்டமிட்டிருப்பதாக ஜனாதிபதியின் சிரேஷ்ட ஆலோசகர் பசில் ராஜபக்ஷ, கடந்த சில தினங்களுக்கு முன்னர் தொலைக்காட்சியொன்றுக்கு வழங்கிய பிரத்தியேக செவ்வியில் கூறியிருந்தார்.

அங்கிருக்கும் மக்களுக்கான அனைத்து அடிப்படை உட்கட்டுமான வசதிகளைப் பூர்த்திசெய்து கொடுப்பதற்கு தமது அரசாங்கம் முயற்சிகளை முன்னெடுத்திருப்பதாகவும், வடபகுதியைச் சேர்ந்த மக்கள் இதுவரை கண்டிராத சீரான வீதிகளை இனிவருங்காலங்களில் காண்பார்கள் எனவும் அவர் தெரிவித்திருந்தார்.

அதேநேரம், பாலங்கள் மற்றும் வீதிகளை அமைப்பதற்கான முயற்சிகளை அரசாங்கம் ஆரம்பித்திருப்பதாகத் தெரியவருகிறது. பாலங்களை அமைப்பதில் தேர்ச்சிபெற்ற பொறியியலாளர்களை கூடியளவு சம்பளம் கொடுத்து பணிக்கு வருமாறு அரசாங்கம் அழைத்திருப்பதாகத் தெரியவருகிறது.

இதேவேளை, யாழ் குடாநாட்டில் உயர்பாதுகாப்பு வலயத்திலுள்ள வயல்களில் பயிர்ச்செய்கை மேற்கொள்வதற்கு இராணுவத்தினர் அனுமதி வழங்கியுள்ளனர். இராணுவக் கட்டளைத் தளபதி மேஜர் ஜென்ரல் ஜீ.ஏ.சந்திரசிறியின் கட்டளைக்கு அமைய உயர்பாதுகாப்பு வலயப் பகுதியான அரியாலையில் விவசாயம் மேற்கொள்வதற்கு அனுமதி வழங்கியிருப்பதாக தகவல்கள் வெளியாகியுள்ளன.

நீண்டகாலமாக உயர்பாதுகாப்பு வலயம் அமைந்திருக்கும் அரியாலையில் கண்டி-யாழ்ப்பாணம் ஏ-9 வீதியிலிருந்து அரியாலை புகையிரதப் பாதைக்கு இடைப்பட்ட 103 ஏக்கர் வயல் நிலங்களில் விவசாயம் செய்வதற்கு இராணுவத்தினர் அனுமதி வழங்கியுள்ளனர். இதற்கமைய 512வது படைப்பிரிவினால் வழங்கப்படும் விசேட அடையாள அட்டைகளுடன் விவசாயிகள் விவசாயம் செய்ய அனுமதிக்கப்படவிருப்பதாகத் தெரியவருகிறது.

மகேஸ்வரன் - கொலைச் சந்தேக நபரிடம் குற்றப்பத்திரிகை கையளிக்கப்பட்டுள்ளது

2008-08-19T18:38:00.000-07:00

ஐக்கிய தேசிய கட்சியின் நாடாளுமன்ற உறுப்பினர் ரி.மகேஸ்வரன் உள்ளிட்ட இரண்டு பேர் சுட்டுக் கொல்லப்பட்டமை தொடர்பில் கைதுசெய்யப்பட்டுள்ள சந்தேக நபரிடம் இன்று குற்றப்பத்திரிகை வழங்கப்பட்டுள்ளது.

கொழும்பு மேல் நீதிமன்ற நீதிபதி திலக் தாப்ரூ முன்னிலையில் விசாரணைக்கு எடுத்துக்கொள்ளப்பட்ட இந்த வழக்கில் குற்றவாளியாக காணப்பட்டுள்ள ஜோன்சன் கோலின் வெலன்டினோ எலியஸ் வசந்தன் என்பவருக்கே இன்று குற்றப்பத்திரிகை வழங்கப்பட்டுள்ளது.

நாடாளுமன்ற உறுப்பினர் ரி மகேஸ்வரன் மற்றும் சந்திரகுமார் மகிந்தன் ஆகியோரை கொலை செய்ததன் மூலம் குற்றவியல் சட்டத்தின் அடிப்படையில் இந்த நபர் கொலை குற்றவாளியாக காணப்படுவதாக சட்டமா அதிபர் குற்றம் சுமத்தியுள்ளார்.

சந்தேக நபர் சிறைச்சாலை திணைக்கள அதிகாரிகளினால் இன்று நீதிமன்றத்தில் ஆஜர்ப்படுத்தப்பட்டார். இந்த நிலையில் வழக்கு விசாரணைகளை நீதிபதி எதிர்வரும் நவம்பர் மாதம் 11 ஆம் திகதிக்கு ஒத்திவைத்துள்ளார்.

வட போர் முனையில் படையினர் மூவர் பலி, 9 பேர் படுகாயம்

2008-08-19T18:02:00.000-07:00

யாழ் முகாமாலையில் முன்னரங்கில் நேற்று மாலை 5:30 முதல் அரை மணி நேரத்திற்கு இடம்பெற்ற எறிகணை மோதலில் சிறீலங்கா படைகள் தரப்பில் மூவர் கொல்லப்பட்டுள்ளனர்.

விடுதலைப் புலிகளின் தாக்குதலில் படுகாயமடைந்த மற்றொரு படை உறுப்பினர் பலாலி படைத்துறை மருத்துவமனைக்குக் கொண்டு செல்லப்பட்டுள்ளார்.

நாகர்கோவில் முன்னரங்கில் காலை 8:30 அளவில் இடம்பெற்ற எறிகணை மோதலில் தமது தரப்பில் மூவர் காயமடைந்துள்ளதாக படைத்தரப்பு அறிவித்துள்ளது.

இதேவேளை, நேற்று மாலை நாகர்கோவிலில் விடுதலைப் புலிகளின் பொறி வெடிகளில் சிக்கிய படையினரில் 6 பேர் பலத்த காயங்களுக்கு உள்ளாகியுள்ளதாக, சிறீலங்காவின் தேசிய பாதுகாப்பு ஊடக தகவல் மையம் அறவித்துள்ளது.

பருத்தித்துறையில் படையினர் இருவர் படுகாயம்

2008-08-19T18:00:00.001-07:00

யாழ் பருத்தித்துறையில் இனம் தெரியாதோர் மேற்கொண்ட துப்பாக்கிப் பிரயோகத்தில் சிறீலங்கா படைகள் தரப்பில் இருவர் படுகாயமடைந்துள்ளனர்.

நேற்றிரவு மேற்கொள்ளப்பட்ட துப்பாக்கிப் பிரயோகத்தினைத் தொடர்ந்து, படையினர் அந்தப் பிரதேசங்களில் கடுமையான தேடுதல், மற்றும் சோதனை நடவடிக்கைகளில் ஈடுபட்டனர்.

படுகாயமடைந்த படையினர் இருவரும் பலாலி படைத்துறை மருத்துவமனையில் அனுமதிக்கப்பட்டுள்ளனர்.

வல்லிபுரம் ஆழ்வார் கோவிலுக்கு அருகில் இந்த சம்பவம் இடம்பற்றிருப்பதாக உள்ளுர் மக்கள் தெரிவித்தனர்.

மட்டக்களப்பில் இளம் குடும்பத்தர் கடத்தல்

2008-08-19T17:59:00.001-07:00

மட்டக்களப்பு, களுவாஞ்சிக்குடி, கோட்டைக்கல்லாறு கல்முனை வீதியைச் சேர்ந்த இளம் குடும்பத்தர் ஒருவர் துணைப்படைக் குழுக்களால் கடத்திச் செல்லப்பட்டுள்ளார்.

கடந்த ஞாயிற்றுக்கிழமை மாலை 6:30 அளவில் கடத்திச் செல்லப்பட்டவர் பாலசிங்கம் சிறீஸ்கந்தராசா என அடையாளம் காணப்பட்டுள்ளார்.

வெள்ளைச் சிற்றூந்தில் சென்ற ஆயுத நபர்கள் மேற்கொண்ட இந்த கடத்தலுக்காக காரணங்கள் எதுவும் தெரிய வரவில்லை.

ஜனாதிபதியின் கூட்டத்தில் கலந்து கொண்டவர்களுக்கு பிரியாணியும் 300 ரூபாவும் வளங்கப்படாததால் ஆத்திரமடைந்த மக்கள்

2008-08-19T10:24:00.000-07:00

ஜனாதிபதி மகிந்த ராஜபக்ஸவின் ருவான்வெல்ல பிரதேச கூட்டத்தில் கலந்து கொண்ட மக்கள் உணவுப் பொதியும் 300 ரூபா பணமும் வழங்கப்படும் என்ற உறுதிமொழியில் ஸ்ரீலங்கா சுதந்திரக்கட்சியினரால் அழைத்துச் செல்லப்பட்டதக கூறப்படுகிறது.

ருவான்வெல்ல ஸ்ரீலங்கா சுதந்திரக்கட்சியின் அமைப்பளரின் ஆலோசனைக்கு அமைய தோட்டங்களில் இருந்து இந்த மக்கள் அழைத்துச் செல்லப்பட்டதாகவும் இவர்களை ஏற்றிச் செல்ல இலங்கைப் போக்குவரத்துச் சபைக்கு சொந்தமான பேரூந்துகள் இலவசமாகப் பெற்றுக் கொள்ளப்பட்டதாகவும் தெரிவிக்கப்பட்டுள்ளது.

கூட்டம் முடிந்த பின்னர் உறுதியளிக்கப்பட்டவாறு உணவுப் பொதியும் 300 ரூபா பணமும் வழங்கப்படாத நிலையில் ஆத்திரமடைந்த மக்கள், சுதந்திரக்கட்சியின் சார்பில் கூட்டத்தை ஏற்பாடு செய்தவர்களை தூஷண வார்த்தைகளால் திட்டியதுடன் கற்களைக் கொண்டு தாக்குதல் நடத்தியதாகவும் கூறப்படுகிறது. இதனையடுத்து காவற்துறையினர் தலையிட்டு, பிரச்சினைகயை சமரசம் செய்து வைத்துள்ளனர்.

பொலன்னறுவை - எகொடபத்துவ கிராமம் - மட்டக்களப்புடன் இணைப்பா? முடியாது என்கிறது ஐ.தே.க

2008-08-19T10:10:00.000-07:00

பொலன்னறுவை மாவட்டத்தில் உள்ள எகொடபத்துவ பிரதேசத்தை மட்டக்களப்பு மாவட்டத்துடன் இணைப்பது உள்ளிட்ட பலவேறு இணக்கங்களை உள்ளடக்கி அரசாங்கத்தினால் பிள்ளையான் தரப்புடன் செய்துகொண்ட ரகசிய உடன்படிக்கை தொடர்பாக ஆராய நாடாளுமன்ற தெரிவுக்குழுவொன்று அமைக்கப்பட வேண்டும் என ஐக்கிய தேசிய கட்சியின் பொதுச் செயலாளர் திஸ்ஸ அத்தநாயக்க வலியுறுத்தியுள்ளார்.

எகொடபத்துவ பிரதேசத்தை நிர்வாக ரீதியாக முதலில் மட்டக்களப்புடன் இணைத்து, முழுமையாக மட்டக்களப்பு மாவட்டத்துடன் இணைக்கவும் இந்த ரகசிய உடன்படிக்கை மூலம் இணக்கம் காணப்பட்டுள்ளது என அவர் குற்றம் சுமத்தியுள்ளார்.

இந்த உடன்படிக்கையின் அடிப்படையில் பிள்ளையான் குழுவினரின் 16 முகாம்கள் எகொடபத்துவ பிரதேசத்தில் அமைக்கப்பட்டுள்ளன. பொலன்னறுவை மாவட்டத்தில் உள்ள 8 ஆயிரத்து 696 தமிழ் வாக்காளர்களில் 7 ஆயிரத்து 800 பேர் எகொடபத்துவ பிரதேசத்தில் வசிக்கின்றனர்.

அத்துடன் ஒரு லட்சத்து 12 ஆயிரம் சிங்கள மக்கள் வசித்து வருகின்றனர். இந்த விகிதாசாரத்தை குறைக்கும் நோக்கில் பிள்ளையான் தரப்பினரை குடியமர்த்தும் செயற்திட்டமும் இந்த உடன்படிக்கையில் உள்ளடக்கப்பட்டுள்ளதாக திஸ்ஸ அத்தநாயக்க குறிப்பிட்டுள்ளார்.

புதியவற்றை கற்பதற்கு வயதான மூளை தடையல்ல - ஜேர்மனிய விஞ்ஞானிகள்

2008-08-19T07:40:00.001-07:00

""எமக்கோ வயதாகி விட்டது. புதியனவற்றைக் கற்று ஞாபகத்தில் வைத்திருக்கும் ஆற்றலை எமது மூளை இழந்து விட்டது'' என கவலைப்படுபவர்களை மகிழ்ச்சி வெள்ளத்தில் ஆழ்த்தும் செய்தியொன்றை ஜேர்மனிய விஞ்ஞானிகள் வெளியிட்டுள்ளனர்.

வயதாவதால் மூளையின் செயற்பாடு மந்தமடைந்து விடுவதில்லை. அது புதிய விடயங்களையும் யுத்திகளையும் வெகு விரைவாகக் கற்றுக் கொள்கிறது என இந்த விஞ்ஞானிகள் கூறுகின்றனர்.

இதற்காக 50 வயதுக்கும் 67 வயதுக்கும் இடைப்பட்ட ஆரோக்கிய நிலையிலுள்ள 69 ஆண்கள் மற்றும் பெண்களுக்கு மூன்று பந்துகளை மாறிமாறி மேலே எறிந்து கீழே விழாமல் பிடிக்கும் யுக்தி தொடர்பில் கற்பிக்கப்பட்டது.

இந்நிலையில் மேற்படி வயோதிபர்கள், இளைஞர்கள் போன்று குறைந்தது 60 செக்கன் வரை பந்துகளை கீழே விழவிடாமல் பிடித்ததாக மேற்படி ஆய்வுக்குத் தலைமை தாங்கிய ஹம்பேர்க் பல்கலைக்கழகத்தின் நரம்பியல் பிரிவைச் சேர்ந்த ஜனினா போய்கே தெரிவித்தார்.

மேற்படி 69 வயோதிபர்களும் இதற்கு முன் பந்துகளை இவ்வாறு எறிந்து பிடிக்கும் தந்திர விளையாட்டைக் கற்றவர்கள் அல்ல என்பது குறிப்பிடத்தக்கது

மட்டக்களப்பில் பாதுகாப்பு தீவிரம்

2008-08-19T07:30:00.000-07:00

மட்டக்களப்பு மாவட்டத்தில் பாதுகாப்பு பலப்படுத்தப்பட்டுள்ளதாக தெரிவிக்கப்பட்டுள்ளது. கடந்த சில தினங்களில் மட்டக்களப்பு மாவட்டத்தின் கல்லடி, காத்தான்குடி உள்ளிட்ட பிரதேசங்களில் படையினர் சிலர் மீது தாக்குதல்கள் நடத்தப்பட்டன.

இந்த தாக்குதல்களில் 5 பேர் கொல்லப்பட்டதை அடுத்து இந்த பாதுகாப்பு பலப்படுத்தல் நடவடிக்கைகள் மேற்கொள்ளப்பட்டுள்ளதாக பாதுகாப்பு தரப்பினர் தெரிவித்துள்ளனர்.

இந்த சம்பவங்கள் தொடர்பாக விரிவான விசாரணைகளை நடத்தி வருவதாகவும் இதற்கான படையினரின் முழுமையான ஒத்துழைப்புகள் வழங்கப்பட்டுள்ளதாகவும் தெரிவிக்கப்பட்டுள்ளது.

அதிரடிப்படையினர் தேடுதல் நடவடிக்கைகளை ஆரம்பித்துள்ளனர் எனவும் கூறப்படுகிறது.

முஸ்லிம்களுக்கு புத்த சிலையை வணங்கச் சொல்லி பிரதேச சபைத் தலைவர் அட்டகாசம்.

2008-08-19T06:09:00.000-07:00

இனங்களுக்கிடையே நல்லுறவு, ஐக்கியம் ஏற்பட வேண்டுமென குரல்கொடுத்துக் கொண்டு வரும் இக்காலகட்டத்தில் அரசியல் அமைப்பால் உறுதிப்படுத்தப்பட்ட மத உரிமையை மீறக்கூடிய விதத்தில் முஸ்லிம்களுக்கு புத்த சிலையை வணங்கச் சொல்லி வற்புறுத்தியுள்ள ஒரு சம்பவம் இடம்பெற்றுள்ளது.

இது பற்றிய செய்தி வருமாறு:-

மஹியங்கனை வீதி வழியாக அமைந்துள்ள மீகஹாகிவுல பஸ் நிறுத்தும் சந்தியில் அமைந்துள்ள முஸ்லிம் ஹோட்டலில் பணிபுரிந்த சிப்பந்திகள் மீது பிரதேச சபைத் தலைவர் அடாவடித்தனம் புரிந்த சம்பவம் அண்மையில் நிகழ்ந்துள்ளது.

இச்சம்பவம் பற்றி மேலும் தெரியவருவதாவது:-

ஹாலி-எலயைச் சேர்ந்த உரிமையாளர் ஒருவர் நடாத்தும் மேற்படி ஹோட்டலில் பணி புரிந்த ஊழியர்கள் நால்வர் இரவில் கடையை மூடிவிட்டு வீதி வழியாக உலா வந்துள்ளனர்.

அச்சமயம் அவ்விடத்துக்கு வந்த பிரதேசசபைத் தலைவர் ஏதோ குறித்து 4 இளைஞர்கள் மீதும் தாக்குதல் நடத்தியுள்ளார்.

போதாக் குறைக்கு அருகில் இருந்த போதிமர புத்தர் சிலையையும் வணங்கச் சொல்லிக் கட்டாயப்படுத்தியுள்ளார். அதற்கு சம்பந்தப்பட்ட இளைஞர்கள் மறுத்துள்ளனர்.

இது விடயமாக தகவல் தெரிந்த சமூக நலன்கொண்ட முஸ்லிம் அரசியல்வாதிகள் உடனடியாக மேற்கொண்ட துரித நடவடிக்கையின் பயனாக பிரதேசசபைத் தலைவர் கைது செய்யப்பட்டு பிணையில் விடுவிக்கப்பட்டார்.

கடந்த வாரம் (13) அவர் மீதான வழக்கு பிரிதொரு தினத்திற்கு ஒத்திவைக்கப் பட்டுள்ளது. முஸ்லிம்களின் தனித்துவம் மீது கை வைத்து அரசுக்கு அபகீர்த்தியையும், வெட்கத்தையும் உண்டாக்கும் இச்சம்பவம் குறித்து தகுந்த நடவடிக்கை எடுக்க வேண்டுமென அதிர்ச்சியும், ஆத்திரமும் கொள்ளும் பொதுமக்கள் கவலையுடன் வேண்டுகின்றனர்.

அரசியல் தீர்வு முன்வைக்கப்படாவிட்டால் ஏதாவது ஓர் முறையில் போராட்டம் தொடரும் - பேராசிரியர் ரட்னஜீவன்

2008-08-19T05:44:00.001-07:00

அரசியல் ரீதியான தீர்வுத் திட்டமொன்று முன்வைக்கப்படாது தமிழீழ விடுதலைப் புலிகளை யுத்தத்தின் மூலம் இல்லாதொழித்தால், பிறிதொரு ரூபத்தில் போராட்டம் தொடருவதைத் தவிர்க்க முடியாதென நியூயோர்க் பல்கலைக்கழகப் பேராசிரியர் ரட்னஜீவன் ஹொல் தெரிவித்துள்ளார்.

இலங்கையில் சமாதானம் என்ற தொனிப்பொருளில் நடைபெற்ற கருத்தரங்கொன்றில் உரையாற்றும்போது பேராசிரியர் இந்தக் கருத்துக்களை முன்வைத்துள்ளார்.

தமிழீழ விடுதலைப் புலிகளிடமிருந்து பாதுகாப்பதற்காகவே குண்டுகள் வீசப்படுவதாக அரசாங்கம் சுட்டிக் காட்டுகின்றது. எனினும், உக்கிர மோதல்களினால் சிவிலியன்கள் பாதிக்கப்படும் அவலம் தொடர்பாக உரிய கவனம் செலுத்தப்படவில்லை என அவர் தெரிவித்துள்ளார்.

தமிழர் உரிமைகள் நியாமான ரீதியில் பாதுகாக்கப்படக் கூடிய ஓர் அரசியல் தீர்வுத் திட்டத்தின் மூலம் மட்டுமே நிரந்தர சமாதானத்தை ஏற்படுத்த முடியும் என அவர் சுட்டிக் காட்டியுள்ளார்.

தமிழ், சிங்கள முஸ்லிம் இனத்துவ அடையாளங்களை உறுதிப்படுத்தக் கூடிய பூகோள ரீதியான தனிப்பட்ட அலகுகளின் மூலம் பிரிவினைவாதம் ஏற்படாது என அவர் சுட்டிக் காட்டியுள்ளார்.

இவ்வாறான ஓர் அதிகார பரவலாக்கல் திட்டத்தின் மூலமே அனைத்து இன மக்களிடையேயும் நல்லிணக்கம் ஏற்படும் என அவர் தெரிவித்துள்ளார்.

கச்சதீவில் கால் பதித்த போது தேசம் ஒன்றை வெற்றி கொண்ட மகிழ்ச்சி – புஸ்கின் குமார்

2008-08-19T05:40:00.000-07:00

இந்தியாவில் இருந்து வெளிவரும் பிரபல தமிழ் சஞ்சிகையான குமுதம் சஞ்சிகையின் ஊடகவியலாளர் புஸ்கின் ராஜ்குமார் மீனவர்களுடன் இணைந்து கச்சதீவுக்கு சென்றுள்ளார்.

இந்த விஜயம் தொடர்பான தகவல்களை அவர் நாளை (20) வெளிவரவுள்ள குமுதம் சஞ்சிகையில் விபரித்துள்ளார்.

ராமேஸ்வரத்தில் இருந்து இந்திய மீனவர்களுடன் படகில் அவர் கச்சதீவுக்கு சென்றதாகவும் இந்த பயணத்திற்கு சுமார் 2 மணிநேரம் சென்றது எனவும் அவர் குறிப்பிட்டுள்ளார்.

தாம் கச்சதீவுக் கரையில் கால் பதித்த போது, தேசம் ஒன்றை மீண்டும் வெற்றிகொண்ட மகிழ்ச்சி ஏற்பட்டது எனத் தெரிவித்த அவர் தன்னுடன் சென்ற மீனவர்களுக்கு மீன்பிடி அடையாள அட்டை இருப்பதனால் அவர்கள் கச்சதீவு அருகில் சென்று மீண்டும் இந்திய எல்லைக்கு வர உரிமை உள்ளது.

எனினும் தான் அங்கு செல்வது ஆபத்தானது என ராஜ்குமார் குறிப்பிட்டுள்ளார். தாம் மீனவர்களைப் போல் உடைகளை அணிந்து கொண்டு சென்றதாகவும் அவர் கூறியுள்ளார். இந்திய கடலோர பாதுகாப்புப் படையின் படகுகள் எல்லா இடங்களிலும் தமக்கு தென்பட்டதாகவும் அவர் குறிப்பிட்டுள்ளார்.

1974 ஆம் ஆண்டு தயாரிக்கப்பட்டு 1976ஆம் ஆண்டு மீண்டும் உறுதிப்படுத்தப்பட்ட சர்வதேச கடல் எல்லை தொடர்பான உடன்படிக்கையின் அடிப்படையில் இந்திய அரசாங்கம் கச்சதீவு இலங்கைக்கு சொந்தமானது என உத்தியோபூர்வமாக ஏற்றுக்கொண்டது.

இதனடிப்படையில் குமுதம் சஞ்சிகையின் ஊடகவியலாளர் இலங்கையின் பகுதி ஒன்றுக்குள் பிரவேசிக்க இலங்கை அரசாங்கத்தின் அனுமதியைப் பெற்றிருக்க வேண்டும் என சிங்கள இணையத்தளம் ஒன்று தெரிவித்துள்ளது. குமுதம் ஊடகவியலாளர்;

கச்சதீவுக்கு செல்ல வீசா அனுமதியை பெற்றிருக்கவில்லை என சென்னையில் உள்ள இலங்கையின் பிரதி உயர்ஸ்தானிகர் ஹம்சா ஊடகங்களுக்கு தெரிவித்துள்ளார்.

பாக்கு நீரிணைப் பகுதி இலங்கை அரசினால் பாதுகாப்பு வலயமாக பிரகடனப்படுத்தப்பட்டுள்ளதுடன் பாதுகாப்பு காரணங்களுக்காக இலங்கைப் படகுகள் செல்வதும் முழுமையாக தடைசெய்யப்பட்டுள்ளது. இந்த நிலையில் குமுதம் இதழின் ஊடகவியலாளர் இலங்கையின் சட்டத்தை மீறியுள்ளதுடன் அதன் ஆசிரியர் அதற்கு அனுசரணை வழங்கியுள்ளார்.

இந்தியா, இலங்கை தொடர்பில் அழுத்தங்களை மேற்கொண்டு வரும் நிலையில் இவ்வாறான செயற்பாடுகளுக்கு எதிராக கடுமையான நடவடிக்கை எடுக்க வேண்டும் என ஆய்வாளர்கள் கூறுவதாக அந்த இணையத்தளம் குறிப்பிட்டுள்ளது.

மூதூரிலுள்ள படையினர் வன்னிக்கு நகர்த்தப்பட்டுள்ளனர்

2008-08-19T05:08:00.000-07:00

திருகோணமலை மூதூரில் ஆக்கிரமித்திருந்த சிறீலங்கா தரைப்படைகள் அங்கிருந்து வன்னிக்கு நகர்த்தப்பட்டுள்ளன.

வன்னியில் படைகளுக்கு ஏற்பட்டுவரும் இழப்புகள் காரணமாக உருவாகியுள்ள ஆளணி வெற்றிடத்தை இடை நிரப்பு செய்வதற்காகவே இந்த படை நகர்த்தல் இடம்பெற்றுள்ளது.

தரைப்படையினர் வெளியேறியதைத் தொடர்ந்து, சிறீலங்கா கடற் படையினர் மூதூரை ஆக்கிரமித்துள்ளனர்.

13 காரணங்களால் ஐக்கிய தேசியக் கட்சி மாகாணசபைத் தேர்தல்களில் தோல்வியடையும்- டலஸ் அழகப்பெரும

2008-08-19T04:53:00.001-07:00

எதிர்வரும் சனிக்கிழமை நடைபெறவிருக்கும் வடமத்திய மற்றும் சப்ரகமுவ மாகாணசபைகளுக்கான தேர்தல்களில் 13 காரணங்களால் ஐக்கிய தேசியக் கட்சி தோல்வியடையும் என ஆளும் ஐக்கிய மக்கள் சுதந்திரக் கூட்டமைப்பு தெரிவித்துள்ளது.

ஐக்கிய தேசியக் கட்சி சார்பில், இரு மாகாணசபைகளுக்கும் நிறுத்தப்பட்டிருக்கும் முதலமைச்சர் வேட்பாளர்கள் கொழும்பிலிருந்து கொண்டுசெல்லப்பட்டவர்கள் என்பதால் அவர்களை ஏற்றுக்கொள்ள அப்பகுதி மக்கள் தயாராகவில்லையென இன்று செவ்வாய்க்கிழமை கொழும்பில் நடைபெற்ற ஊடகவியலாளர் மாநாட்டில் கருத்துத் தெரிவித்த அமைச்சர் டலஸ் அழகப்பெரும கூறினார்.

ஐக்கிய தேசியக் கட்சியின் மந்தப் போக்கிலான தேர்தல் பிரசாரக் கூட்டங்கள், அக்கட்சியின் 42 பாராளுமன்ற உறுப்பினர்களில் பெரும்பாலானவர்கள் பிரசாரக் கூட்டங்களில் கலந்துகொள்ளாமை, அக்கட்சியின் தலைமைத்துவத்துக்குக் காணப்படும் எதிர்ப்பு, கட்சிக்குள் ஒற்றுமையின்மை உட்பட 13 காரணங்களால் எதிர்க்கட்சி மாகாணசபைத் தேர்தல்களில் தோல்வியைத் தழுவும் என அமைச்சர் தெரிவித்தார்.

இரண்டு வருடங்கள் ஆட்சியிலிருந்த ரணில் விக்ரமசிங்க இந்த மாகாணங்களில் எந்த அபிவிருத்தியையும் முன்னெடுக்கவில்லையெனவும், அவர்கள் நகர மக்களை மையமாகக் கொண்டே அபிவிருத்திகளை முன்னெடுக்கின்றபோதும், கிராமப் புறங்களில் தமது அரசாங்கமே அபிவிருத்திகளை முன்னெடுத்து வருவதாகவும் அமைச்சர் டலஸ் அழகப்பெரும கூறினார்.

அதேநேரம், ஐக்கிய தேசியக் கட்சியின் பிராந்தியத் தலைவர்கள் அரசாங்கத்துடன் இணைந்துகொள்கின்றமை, ஸ்திரமில்லாத தேர்தல் உறுதிமொழிகள், மதத் தலைவர்களின் ஆதரவு எதிர்க்கட்சிக்கு இன்மை, விடுதலைப் புலிகளுக்கு ஆதரவான கட்சிகளே ஐக்கிய தேசியக் கட்சியுடன் இணைந்துள்ளமை போன்றவையும் ஏனைய காரணங்களாக அமைந்துள்ளன என்றும் அமைச்சர் டலஸ் அழகப்பெரும மேலும் தெரிவித்தார்.

இதேவேளை, சப்ரகமுவ மற்றும் வடமத்திய மாகாணசபைகளுக்கான தேர்தல் பிரசாரங்கள் நாளை நள்ளிரவுடன் முடிவுக்குக் கொண்டுவரப்படுவதாக தேர்தல்கள் ஆணையாளர் தயானந்த திஸ்ஸாநாயக்க அறிவித்துள்ளார்.

சர்வதேச அரசசார்பற்ற நிறுவனங்களின் உபகரணங்களை அரசாங்கக் கட்டுப்பாட்டுப் பகுதிகளுக்குக் கொண்டுசெல்ல இணக்கம்

2008-08-19T04:52:00.001-07:00

விடுதலைப் புலிகளின் கட்டுப்பாட்டிலுள்ள பகுதியில் செயற்பட்டுவரும் சர்வதேச அரசசார்பற்ற நிறுவனங்கள் தமது உபகரணங்களை இராணுவக் கட்டுப்பாட்டுப் பகுதிகளுக்குக் கொண்டுவருவதற்கு இணங்கியிருப்பதாக அரசாங்க வட்டாரங்கள் கூறுகின்றன.

விடுதலைப் புலிகளின் கைகளுக்கு அந்த உபகரணங்கள் செல்வதைத் தடுப்பதற்கே அவர்கள் இதற்கு இணங்கியிருப்பதாக அரசாங்க அதிகாரி ஒருவரை மேற்கோள்காட்டி கொழும்பு ஊடகமொன்று செய்தி வெளியிட்டுள்ளது.

“அரசசார்பற்ற நிறுவனங்களின் உபகரணங்களை விடுதலைப் புலிகள் பெற்று அவற்றை இராணுவத்தினருக்கு எதிராகப் பயன்படுத்தும் ஆபத்து இருப்பதாக அரசாங்கம் சர்வதேச அரசசார்பற்ற நிறுவனங்களுக்கு அறிவுறுத்தியிருந்தது. அவ்வாறு அரசாங்கக் கட்டுப்பாட்டுப் பகுதிகளுக்கு தமது உபகரணங்களைக் கொண்டுவராத அரசசார்பற்ற நிறுவனங்களுக்கு எதிராக கடும் நடவடிக்கை எடுக்கப்படும் என எச்சரிக்கப்பட்டிருந்தது” என அந்த அதிகாரி கூறியுள்ளார்.

கடந்த வெள்ளிக்கிழமை மனித உரிமைகள் அமைச்சர் மஹிந்த சமரசிங்க மற்றும் ஜனாதிபதியின் சிரேஷ்ட ஆலோசகர் பசில் ராஜபக்ஷ ஆகியோர் தலைமையில் நடைபெற்ற மனிதநேய உதவிகளின் ஆலோசனைக் குழுக் கூட்டத்திலேயே இந்த விடயம் தொடர்பாக இணக்கப்பாடு எட்டப்பட்டுள்ளது.

சர்வதேச அரசசார்பற்ற நிறுவனமான நோர்வே மக்கள் அமைப்புக்குச் சொந்தமான வாகனங்களை விடுதலைப் புலிகள் எடுத்துக்கொண்டமைபோன்று எதிர்காலத்தில் எந்தச் சம்பவங்களும் இடம்பெறாமல் தடுப்பதற்கே இந்த நடவடிக்கை எடுக்கப்பட்டதாக மனித உரிமைகள் அமைச்சர் மஹிந்த சமரசிங்க, அந்த ஊடகத்துக்குத் தெரிவித்தார்.

அனைத்து சர்வதேச மற்றும் உள்ளூர் அரசசார்பற்ற நிறுவனங்களும் தமது உபகரணங்கள் மற்றும் அசையும் சொத்துக்களை இராணுவக் கட்டுப்பாட்டுப் பகுதிகளுக்குக் கொண்டுவருவதற்கு இந்தக் கூட்டத்தில் இணங்கப்பட்டது என அமைச்சர் கூறினார்.

விடுதலைப் புலிகளுக்கும், அரசாங்கப் படைகளுக்கும் இடையில் தொடர்ச்சியாக இடம்பெற்று வரும் மோதல்களால் கிளிநொச்சி மற்றும் முல்லைத்தீவு மாவட்டங்களில் இலட்சக் கணக்கானவர்கள் இடம்பெயர்ந்துள்ளனர். அவர்களுக்கான மனிதநேயப் பணிகள் அவசியமாகியுள்ள நிலையில், அரசசார்பற்ற நிறுவனங்களின் உபகரணங்களை அரசாங்கக் கட்டுப்பாட்டுப் பகுதிகளுக்குக் கொண்டுசெல்வதற்கு இணக்கம் காணப்பட்டுள்ளது.

வன்னியில் பொதுமக்கள் மரங்களின் கீழ் வாழ்வதாக ஊடகங்கள் பொய்யான பிரச்சாரம் - மகிந்த சமரசிங்க

2008-08-19T04:51:00.001-07:00

வடபகுதியில் உணவுப் பொருட்களுக்கோ, அத்தியாவசியப் பொருட்களுக்கோ எந்தவிதமான தட்டுப்பாடும் கிடையாதெனத்தெரிவித்த இடர் முகாமைத்துவ, மனித உரிமைகள் அமைச்சர் மகிந்த சமரசிங்க தெரிவித்துள்ளார்.

சர்வதேச உள்நாட்டு ஊடகங்கள் சிலவற்றுக்கு கருத்து வெளியிட்டுள்ள அவர்,

வன்னியில் இடம்பெயர்ந்த மக்கள் மரங்களுக்கடியில் வசிப்பதாகக்கூறிய செய்தியில் உண்மை எதுவும் கிடையாதெனவும் கூறினார்.

அதேசமயம் வட பகுதிக்குத் தேவையான அத்தியாவசியப் பொருட்கள் ஒன்றரை மாதங்களுக்குப் போதுமான தொகை கையிருப்பில் இருப்பதாகவும் வடக்கு மீட்கப்பட்டதும் முழுமையான இயல்பு நிலையை உடனடியாக கொண்டுவர முடியுமெனவும் அத்தியாவசிய சேவைகள் ஆணையாளர் நாயகம் திவாரட்ன தெரிவித்தார்.

நேற்று திங்கட்கிழமை மாலை இடர் முகாமைத்துவ, மனித உரிமைகள் அமைச்சு கேட்போர் கூடத்தில் நடைபெற்ற விஷேட செய்தியாளர் மாநாட்டிலேயே மேற்படி தகவல்கள் வெளியிடப்பட்டன.

அமைச்சர் மகிந்த சமரசிங்க மேலும் விளக்கமளிக்கையில் கூறியதாவது;

கடந்த வாரத்தில் ஒரு சில வெளிநாட்டு ஊடகங்களிலும் உள்நாட்டு ஊடகங்களிலும் வெளியிடப்பட்டிருந்த செய்திகள் எம்மை வியப்படையச் செய்தன.

உடனடியாகவே நாம் கிளிநொச்சி, முல்லைத்தீவு அரச அதிபர்களை கொழும்புக்கு வரவழைத்து கலந்துரையாடினோம். அவர்கள் தெரிவித்த தகவல்கள் மூலம் அந்த ஊடகங்கள் வெளியிட்ட குற்றச்சாட்டுகள் பொய்யானவை என்பது உறுதி செய்யப்பட்டன.

கிளிநொச்சியில் அகதிகளாக வந்த மக்கள் மரங்களுக்கடியில் வாழ்ந்துகொண்டிருப்பதாகவும் அவர்களுக்கு நிவாரண உதவிகள் கிடைப்பதில்லை எனவும் அந்த ஊடகங்கள் தெரிவித்திருந்தன. சில ஊடகங்கள் அரசாங்கத்தை அபகீர்த்திக்குள்ளாக்கவும் எவ்வாறாயினும் யுத்தத்தை நிறுத்துவதற்கான தந்திரோபாயமாகவும் இதனை முன்னெடுப்பதாகவே நாம் கருதுகின்றோம் எனத்தெரிவித்துள்ளார்.

பயங்கரவாதத்திற்கெதிரான 'ஐரோப்பிய பொறிமுறை'யினை விடுதலைப் புலிகளுக்கு எதிராகவும் அமுல்படுத்துக-அரசாங்கம் கோரிக்கை

2008-08-19T04:47:00.001-07:00

பயங்கரவாத நடவடிக்கைகளுக்கெதிரான 'ஐரோப்பிய பொறிமுறை'யினை விடுதலைப் புலிகளுக்கு எதிராகவும் ஐரோப்பிய ஒன்றியம் அமுல்படுத்தவேண்டும் என அரசாங்கம் வேண்டுகோள்விடுத்துள்ளதாக, அரசாங்க உயர்மட்டத் தகவல்கள் தெரிவிக்கின்றன.

தமிழர் புனர்வாழ்வுக் கழகம், ரீ.சீ.சி ஆகிய அமைப்புக்கள் விடுதலைப் புலிகளுக்கு ஆதரவாக ஐரோப்பிய ஒன்றிய நாடுகளில் செயற்பட்டுவருவது தொடர்பான ஆவணங்களையும் அரசாங்கம் ஐரோப்பிய ஒன்றியத்தின் 27 அங்கத்துவ நாடுகளுக்கும் அனுப்பிவைத்துள்ளதாக அரசாங்க உயர் அதிகாரி ஒருவரை மேற்கோள்காட்டி கொழும்பு ஆங்கில ஊடகமொன்று செய்தி வெளியிட்டுள்ளது.

விடுதலைப் புலிகள் ஐரோப்பிய ஒன்றியத்தின் பயங்கரவாத அமைப்புகளின் பட்டியலில் உள்ளடக்கப்பட்டுள்ளபோதிலும், இணையத்தளம் உள்ளிட்ட பல்வேறு ஊடகங்கள் வாயிலாக தற்போதும் அவர்கள் நிதிசேகரிப்பு மற்றும் பிரசார நடவடிக்கைகளில் ஈடுபட்டுவருவதாகவும் அரசாங்கம் ஐரோப்பிய ஒன்றியத்திற்குச் சுட்டிக்காட்டியுள்ளதாக தெரிவிக்கப்பட்டுள்ளது.

அத்துடன், இந்த நடவடிக்கைகளை முடிவுக்குக் கொண்டுவருவதற்கான ஐரோப்பிய பொறிமுறையினை அமுல்படுத்தவேண்டும் எனவும் அரசாங்கம் வேண்டுகோள்விடுத்துள்ளதாக தெரியவருகிறது.

"விடுதலைப் புலிகளுக்கு ஆதரவாகச் செயற்படும் நிறுவனங்கள் குறித்த ஆவணங்களை ஐரோப்பிய ஒன்றியத்திற்கு சமர்ப்பித்துள்ளோம். சுனாமி நிவாரணப் பணிகளுக்காக வழங்கப்பட்ட பணம் எவ்வாறு பயங்கரவாத நடவடிக்கைகளுக்குப் பயன்படுத்தப்பட்டது என்பதையும் நாம் சுட்டிக்காட்டியுள்ளோம்.

ஐரோப்பிய ஒன்றியம் இதுகுறித்து தற்போது ஆராய்ந்து கொண்டிருக்கிறது. இந்த விடயங்களை ஐரோப்பிய ஒன்றியத்துக்கு தெளிவுபடுத்துவது இலகுவான விடயமல்ல. இதற்கு நீண்ட காலம் எடுக்கலாம். இருப்பினும் இதற்கான அழுத்தங்களை நாம் வழங்கிக்கொண்டிருப்போம்" என அரசாங்க உயர் அதிகாரி ஒருவர் தெரிவித்துள்ளார்.

பயங்கரவாத நடவடிக்கைகளுக்கெதிரான 'ஐரோப்பிய பொறிமுறை' அல்கைதா இயக்கத்திற்கு எதிராக அமுல்படுத்தப்படுவதாகச் சுட்டிக்காட்டியுள்ள அரசாங்கம்,

புலிகளுக்கு எதிராகவும் அமுல்படுத்தப்பட வேண்டும் எனவும் கோரிக்கை விடுத்துள்ளதாக தெரியவருகிறது.

"விடுதலைப் புலிகளை ஐரோப்பிய ஒன்றியம் தடைசெய்திருந்தாலும், அவர்களது செயற்பாடுகள் அங்கு வேறுவழிகளில் தொடர்ந்துகொண்டிருக்கின்றன.

இதுகுறித்து ஒன்றியத்தில் அங்கம்வகிக்கும் 27 நாடுகளுக்கும் நாம் தெளிவுபடுத்த வேண்டிய தேவையுள்ளது. ஏனெனில், ஒரு நாடு எதிர்த்தாலும், இதனை அமுல்படுத்த முடியாது" என்றும் அந்த அதிகாரி குறிப்பிட்டுள்ளார்.

அத்துடன், புலம்பெயர்ந்துவாழும் இலங்கையர் மத்தியில், விடுதலைப் புலிகள் மற்றும் அவர்களுக்கு ஆதரவாகச் செயற்படும் அமைப்புக்கள் தொடர்பாக அறிவூட்டும் சமூக மட்டத்திலான செயற்பாடுகளையும் அரசாங்கம் முன்னெடுக்கவுள்ளதாகவும் அவர் குறிப்பிட்டுள்ளார்.

ஏறாவூரில் சமாதான நீதவான் மீது சூடு

2008-08-19T04:45:00.000-07:00

மட்டக்களப்பு ஏறாவூர் தேவாபுரம் காவற்துறைப் பிரிவில் சமாதான நீதவான் ஒருவர் சுடப்பட்டுள்ளார். நேற்றிரவு (18) 8.30 மணியளவில் 61 வயதுடைய சுப்ரமணியம் நாகராசா என்பவரது வீட்டிற்குச் சென்ற இனம் தெரியாதோர் இவர் மீது சரமாரியாகச் சுட்டதாக பிரதேசத் தகவல்கள் தெரிவிக்கின்றன.

கடுமையான காயங்களுக்குள்ளான இவர் செங்கலடி வைத்தியசாலையில் அனுமதிக்கப்பட்டு பின்னர் மட்டக்களப்பு வைத்தியசாலைக்கு மாற்றப்பட்டுள்ளார்.

பத்தினி அம்மன் வீதி, தேவாபுரம், முறக்கொட்டாஞ்சேனை, ஏறாவூர் என்ற வதிவிட முகவரியைக் கொண்ட இவர் பத்தினி அம்மன் கோவில் தர்மகத்தா எனவும் தெரிவிக்கப்படுகிறது.

வன்னிப் பகுதி மக்களைப் பாதுகாக்குமாறு கோரி யாழ் பல்கலைக்கழகத்தில் மௌனப் பிரார்த்தனை

2008-08-19T04:44:00.000-07:00

வன்னிப் பகுதியில் இடம்பெறும் மோதல்களால் இடம்பெயர்ந்திருக்கும் மக்களின் துயர்துடைப்பதற்கு அனைத்துத் தரப்பினரும் முன்வரவேண்டுமெனக்கோரி யாழ் பல்கலைக்கழகத்தின் மௌனப் பிரார்த்தனையொன்று நடத்தப்பட்டுள்ளது.

யாழ் பல்கலைக்கழகத் துணைவேந்தர், விரிவுரையாளர்கள், மாணவர்கள் அனைவரும் இன்று செவ்வாய்க்கிழமை முற்பகல் 10 மணிக்கு பல்கலைக்கழக மண்டபத்தில் ஒன்றுகூடி சுமார் 15 நிமிடநேரம் மௌனமான பிரார்த்தனையில் ஈடுபட்டிருந்தனர்.

வன்னியில் பல்வேறு சிரமங்களுக்கு முகம்கொடுத்திருக்கும் மக்களுக்கான உதவிகளை வழங்க சர்வதேச மற்றும் உள்ளூர் அரசசார்பற்ற நிறுவனங்களும் முன்வரவேண்டுமெனக் கோரியே இந்த மௌனப் பிரார்த்தனை நடத்தப்பட்டது.

வன்னி பெருநிலப்பரப்பைக் கைப்பற்றும் நோக்கோடு இலங்கை இராணுவத்தினர் மேற்கொண்டுவரும் மோதல்கள் காரணமாக போர் நடவடிக்கைகளுடன் தொடர்பல்லாதவர்கள் பாதிக்கப்படுவது வேதனைக்குரியது எனவும், நிச்சயமற்ற இருப்பு நிலையோடும் மிரட்சியும் அச்சமும் கலந்த வாழ்வோடும் வறுமையோடும் போராடும் மக்களின் துயரினைக் போக்குவது அவசியமானது எனவும் யாழ் பல்கலைக்கழக மாணவர் ஒன்றியம் நேற்று விடுத்துள்ள அறிக்கையில் குறிப்பிடப்பட்டுள்ளது.

“யாழ் குடாநாடு தழுவிய ரீதியில் ஏற்பட்ட இடம்பெயர்வின்போது எம்மைத் தாங்கிய உறவுகள் இன்று மருத்துவ, இருப்பிட, உணவுத் தேவைகள் என்பல தேவைகளுக்காக ஏங்கி நிற்கின்றனர். அவர்கள் அனைவரதும் சகல தேவைகளையும் பூர்த்தி செய்வது இயலாது எனினும், அரசு தனது நலன்சார் திட்டங்களையும் அனர்த்த நிவாரண உதவிகளையும் பாரபட்சமின்றி வழங்கும் வண்ணம் கேட்டுக்கொள்கிறோம்” என அந்த அறிக்கையில் தெரிவிக்கப்பட்டுள்ளது.

ஐக்கிய நாடுகள் முகவர்கள் அமைப்புக்களையும், வேறு தொண்டர் நிறுவனங்களையும் தமது மனிதாபிமானப் பணிகளுக்கு அனுமதிப்பதுடன், பொது மக்களைப் பாதிக்காத வகையில் இரண்டு தரப்பினரும் போர் நடவடிக்கைகளை முன்னெடுக்கவேண்டும் எனவும் யாழ் பல்கலைக்கழக மாணவர் ஒன்றியம் விடுத்துள்ள அறிக்கையில் கோரப்பட்டுள்ளது.

கிளிநொச்சி மற்றும் முல்லைத்தீவு மாவட்டங்களில் இலட்சக்கணக்கானவர்கள் இடம்பெயர்ந்துள்ள நிலையில் முதன்முறையாக அப்பகுதி மக்களைப் பாதுகாக்குமாறு கோரி யாழ்ப்பாணத்தில் மௌனப் பிரார்த்தனை நடத்தப்பட்டுள்ள இங்கு குறிப்பிடத்தக்கது.

T.M.V.P உறுப்பினரால் பெண் ஊடகவியலாளர் மீரட்டல் - காவற்துறையில் முறைப்பாடு

2008-08-18T18:36:00.000-07:00

பெண் ஊடகவியலாளர் தக்சிலா தில்ருக்ஷp ஜயசேனவை ரி.எம்.வி.பியின் உறுப்பினர் ஒருவர் அச்சுறுத்தியதாக பொலன்னறுவை காவற்துறையில் முறைப்பாடு செய்யப்பட்டுள்ளது.

வடமத்திய மாகாண சபைத் தேர்தலில் போட்டியிடும் தமிழ்மக்கள் விடுதலைப்புலிகள் கட்சியின் மங்களம் மாஸ்டர் உள்ளிட்ட குழுவினரின் ஆயுதங்களைக் களையுமாறு கோரி கடந்த 15 ஆம் திகதி மன்னம்பிட்டியில் நடைபெற்ற ஆர்ப்பாட்டம் தொடர்பான செய்தியை இந்தப் பெண் ஊடகவியலாளர் சேகரித்து அனுப்பியுள்ளார்.

ஆர்ப்பாட்டத்தின் பின்னர் தான் சென்ற முச்சக்கர வண்டியை பின்தொடர்ந்து மோட்டார் சைக்கிளில் பயனித்த ஒருவர், முச்சக்கர வண்டிக்கு குறுக்காக தனது மோட்டார் சைக்கிளை நிறுத்தி, வண்டியை நிறுத்தியதுடன் தன்னை அச்சுறுத்தியதாக ஊடகவியலாளர் தெரிவித்துள்ளார்.

குறித்த அந்த நபர் தான் மங்களம் மாஸ்டர் மற்றும் கருணாவை நேர்கண்ட போது, ரி.எம்.வி.பியின் முகாமில் இருந்தாகவும் கூறியுள்ளார்.

ஆர்ப்பாட்டம் நடத்தியவர்களை பிடித்து செல்லவே வந்ததாகவும் யாரையும் திருப்பி அனுப்பும் நோக்கில் வரவில்லை எனவும் அந்த நபர் அச்சுறுத்தும் தொனியில் குறிப்பிட்டுள்ளார்.

எனினும் முறைப்பாட்டில் அச்சுறுத்தியவரின் பெயர் குறிப்பிடப்படாததன் காரணமாக அவரை கைதுசெய்து விசாரணைகளை மேற்கொள்ள முடியாது என காவற்துறையினர் தெரிவித்துள்ளனர்.

ஜெர்மனியில் புலிகளை தடைசெய்யுமாறு சிறிய சிங்கள குளு ஒன்று கோரிக்கை

2008-08-18T09:37:00.000-07:00

ஜெர்மனியில் தமிழீழ விடுதலைப்புலிகளின் செயற்பாடுகளை தடை செய்யுமாறு கோரி மகஜர் ஒன்றை அந்நாட்டு அரசாங்கத்திடம் கையளிக்கப்பட்டுள்ளது.

பயங்கரவாதத்திற்கு எதிரான இலங்கை ஒன்றியம் என்ற அமைப்பு இந்த மகஜரைத் கையளித்துள்ளது.

ஜெர்மன் அரசாங்கத்தின் வெளிநாட்டு கொள்கைகள் தொடர்பான சிரேஸ்ட ஆலோசகர் கலாநிதி ஹென்ரிச் கெப்ட்டிடம் இந்த மகஜர் கையளிக்கப்பட்டுள்ளது.

பயங்கரவாதத்திற்கு எதிரான இலங்கை ஒன்றியத்தைச் சேர்ந்த சந்தனி விஜேசேகர, லலித் கங்ஹேவா, விஜேரத்ன விதானகே ஆகிய உறுப்பினர்கள் இந்த மகஜரை கையளித்துள்ளனர்.

இதற்கு எதிராக ஜேர்மனி தமிழமைப்புகள் உடனடியாக நடவடிக்கை எடுக்குமாறு தயக உறவுகள் கேட்டுக்கொள்கின்றன

வன்னியில் தொடரும் மோதல் - உயர்தரப் பரீட்சை – மண்டபத்தில் இருந்து ஓடும் மாணவர்கள்

2008-08-18T08:45:00.000-07:00

விடுதலைப் புலிகளின் கட்டுப்பாட்டுப் பிரதேசத்தில் க.பொ.த. (உயர்தரப்) பரீட்சை எழுதும் மாணவர்கள், விமானக் குண்டுத் தாக்குதல் மற்றும் ஆட்லறி செல் தாக்குதல் நடைபெறும்போது

பரீட்சை மண்டபங்களை விட்டுப் பாதுகாப்புத் தேடி ஓடுவதும் நீண்ட நேரத்தின் பின் திரும்பி வந்து பரீட்சை எழுதுவதுமானதொரு நிலைமையேற்பட்டுள்ளது என அங்கிருந்து கிடைக்கும் தகவல்கள் தெரிவிக்கின்றன.

முல்லைத்தீவு மாவட்டத்திலிருந்து 762 மாணவர்கள் க.பொ.த. உயர்தரப் பரீட்சைக்குத் தோற்றுவதாக இருந்த போதிலும் மூன்றிலொரு பகுதி மாணவர்கள் போர் மற்றும் இடப் பெயர்வு காரணமாகப் பரீட்சைக்குத் தோற்றவில்லை.

துணுக்காய், மல்லாவிப் பிரதேசங்களில் நிலவுகின்ற போர்ச் சூழல் காரணமாக இடம்பெயர்ந்துள்ள மக்கள் பாதுகாப்பான இடங்களைத் தேடி நாளாந்தம் நகர்ந்து கொண்டிருக்கின்றார்கள்.

ஒரு நாளைக்கு ஒரு இடம் என அவர்கள் இடத்திற்கு இடம் சென்று கொண்டிருக்கின்றார்கள். இதனால் மாணவர்களும் ஓரிடத்திலிருந்து பாடசாலைக்குச் சென்று கல்வி கற்க முடியாத சூழ்நிலை ஏற்பட்டுள்ளது.

முல்லைத்தீவு மாவட்டத்தில் 25 ஆயிரம் பாடசாலை மாணவர்கள் இருக்கின்றார்கள். இவர்களுக்கென துணுக்காய் கல்வி வலயத்தில் 54 பாடசாலைகளும், முல்லைத்தீவு கல்வி வலயத்தில் 53 பாடசாலைகளும் இருக்கின்றன.

ஆயினும் துணுக்காய் வலயத்தைச் சேர்ந்த 37 பாடசாலைகள் இராணுவ நடவடிக்கைகள் காரணமாக இடம்பெயர்ந்திருக்கின்றன. கல்விப் பொதுத் தராதரப் பரீட்சைக்கான நிலையங்கள் கூட வேறிடங்களுக்கு மாற்றப்பட்டிருக்கின்றன.

இடம்பெயர்ந்த பாடசாலைகளின் முக்கிய ஆவணங்களை மாத்திரம் அந்தப் பாடசாலைகளின் அதிபர்கள் பாதுகாப்பான இடங்களுக்கு எடுத்துச் சென்றுள்ளார்கள்.

ஏனைய பொருட்கள் தளபாடங்கள், பாடசாலை உபகரணங்கள் அனைத்தையும் அந்தந்த இடத்திலேயே விட்டுவிட்டு வர நேர்ந்துள்ளதாக அதிபர்கள் தெரிவித்துள்ளனர்.

கல்விப் பொதுத்தராதர உயர்தரப் பரீட்சை கடந்த 6 ஆம் திகதி ஆரம்பமாகியது. அன்றைய தினம் பிற்பகல் மாணவர்கள் பரீட்சை எழுதிக் கொண்டிருந்த போது,

முல்லைத்தீவு மாவட்டத்தில் நடத்தப்பட்ட விமானக் குண்டுத் தாக்குதல்கள் காரணமாக மாணவர்கள் அச்சமடைந்து பரீட்சை மண்டபங்களை விட்டுப் பாதுகாப்புத் தேடி ஓடி, சுமார் ஒரு மணித்தியாலயத்திற்குப் பின்னர் திரும்பி வந்து எழுத வேண்டிய நிலைமை ஏற்பட்டது.

இதனால் வன்னிப்பகுதியில் பரீட்சைக்குத் தோற்றும் மாணவர்கள் அச்சத்திற்கு மத்தியிலேயே பரீட்சை எழுத வேண்டியுள்ளனர் எனத் தெரிவிக்கப்படுகிறது.

1000 ரூபா நாணயக்குற்றி அறிமுகம்

2008-08-18T07:40:00.000-07:00

இலங்கை மத்திய வங்கி ஆயிரம் ரூபா நாணயக்குற்றியினை அறிமுகம் செய்துள்ளது. இலங்கை கிரிக்கெட் அணிக்கு உதவி வழங்கும் வகையிலேயே இந் நாணயக் குற்றி அறிமுகம் செய்யப்பட்டுள்ளதாக தெரிவிக்கப்படுகின்றது.

தம்புள்ளை சர்வதேச கிரிக்கெட் மைதானத்தில் இன்று இலங்கை இந்திய கிரிக்கெட் அணிகளுக்கிடையிலான ஒருநாள் போட்டி தொடர் ஆரம்பமாவதற்கு முன்னதாக இந் நாணயம் வெளியிடப்பட்டுள்ளது.

தமிழர் இன ஒடுக்குமுறைக்கு எதிராக ஒபாமா குரல் கொடுப்பார் – இராமநாதன்

2008-08-18T06:58:00.000-07:00

இலங்கையில் தமிழர் இன ஒடுக்குமுறைக்கு எதிராக ஒபாமா குரல் கொடுப்பார் என அமெரிக்கத் தமிழர் புனர்வாழ்வுக் கழகத்தின் முக்கிய செயற்பாட்டாளர் ரஞ்சன் இராமநாதன் நம்பிக்கை வெளியிட்டுள்ளார்.

இலங்கையில் பல்வேறு துன்பங்களை எதிர்நோக்கி வரும் எமது சொந்தங்களுக்கு ஒபாமா ஆதரவு வழங்குவார் எனப் பெரிதும் எதிர்பார்ப்பதாக இராமநாதன் குறிப்பிட்டுள்ளார்.

தமிழர் இன ஒடுக்குமுறைக்கு எதிராக ஒபாமா குரல் கொடுப்பார் எனத் திடமாக நம்புவதாக அவர் மேலும் குறிப்பிட்டுள்ளார்.
அமெரிக்க ஜனநாயகக் கட்சி ஜனாதிபதி வேட்பாளர் பரக் ஒபாமா தமிழீழ விடுதலைப் புலிகளின் ஆதரவாளர்களிடம் ஒபாமா நிதி பெற்றுக் கொண்டதாகத் தகவல் வெளியிடப்பட்டுள்ளது.

அமெரிக்க ஜனாதிபதி வேட்பாளர் தெரிவிற்காகப் போட்டியிட்ட ஹிலாரி கிளின்ரனுக்கு ஏற்கனவே விடுதலைப் புலி ஆதரவாளர்கள் பணம் வழங்கியதாகக் குற்றம் சுமத்தப்பட்டது.

2300 000அமெரிக்க டொலர்களைப் புலி ஆதரவாளர்களில் முக்கிய நபரான ஹிலாரி கிளின்ரனுக்கு ரஞ்சன் இராமநாதன் வழங்கியதாகப் பிரபல ஆங்கில நாளிதழொன்று செய்தி வெளியிட்டுள்ளது.

அமெரிக்கத் தமிழர் புனர்வாழ்வுக் கழகத்தின் பிரதான செயற்பாட்டாளர் எனத் தெரியவந்ததை அடுத்து பெறப்பட்ட நிதி திருப்பி கொடுக்கப்பட்டதாகத் தெரிவிக்கப்படுகிறது.

இலங்கை அரசாங்கத்தைக் கடுமையாக விமர்சிப்போருக்கு இராமநாதன் நிதியுதவி அளித்து வருவதாகக் குறிப்பிடப்படுகிறது.

இலங்கையின் தேசியப் பிரச்சினைக்குப் பொஸ்னிய முறையிலான தீர்வுத் திட்டமொன்று முன்வைக்கப்பட வேண்டும் என அமெரிக்கத் தமிழர் அமைப்புக்கள் கோரிக்கை விடுத்துள்ளன.

தமிழீழ விடுதலைப் புலிகளுக்குச் சார்பான அமைப்புக்கள் பல்வேறு பெயர்களில் அமெரிக்காவில் இயங்கி வருவதாகச் சுட்டிக் காட்டப்படுகிறது

நாச்சிக்குடாவில் பாரிய முன்நகர்வு முறியடிப்பு: 10 படையினர் பலி்; 20 பேர் படுகாயம்

2008-08-18T06:19:00.000-07:00

முழங்காவில் நாச்சிக்குடாப் பகுதியில் சிறிலங்காப் படையினரின் பாரிய முன்நகர்வு தமிழீழ விடுதலைப் புலிகளால் முறியடிக்கப்பட்டுள்ளது. இதில் பத்துக்கும் அதிகமான படையினர் கொல்லப்பட்டுள்ளனர். இருபதுக்கும் அதிகமானோர் படுகாயமடைந்துள்ளனர்.

ஆட்லெறி மற்றும் வெடிகணைச் சூட்டாதரவுடன் நாச்சிக்குடாப் பகுதி ஊடாகவும் அதனை அண்டிய பகுதிகள் ஊடாகவும் நேற்று ஞாயிற்றுக்கிழமை படையினர் பாரிய முன்நகர்வினை மேற்கொண்டனர்.

இம்முன்நகர்வுக்கு எதிராக விடுதலைப் புலிகள் கடும் எதிர்த்தாக்குதல் நடத்தி படையினரின் நகர்வினை முறியடித்தனர்.

இதில் பத்துக்கும் அதிகமான படையினர் கொல்லப்பட்டனர். இருபதுக்கும் அதிகமான படையினர் படுகாயமடைந்தனர்.

கொல்லப்பட்ட படையினரின் உடலங்கள் மற்றும் படைப் பொருட்கள் நடுநிலைப் பகுதியில் (சூனியப் பிரதேசம்) சிதறிக் காணப்படுகின்றன என்று விடுதலைப் புலிகள் தெரிவித்துள்ளனர்.

உலகத் தமிழ் எழுத்தாளர் மாநாட்டில் எஸ்.பொ.வுக்கு"உலகப் பெருந்தமிழர் விருது'

2008-08-18T05:34:00.000-07:00

உலகத் தமிழர் பேரமைப்பின் ஆறாம் ஆண்டின் நிறைவு விழா, உலகத் தமிழ் எழுத்தாளர் சிறப்பு மாநாடாக சனிக்கிழமை தமிழ்நாட்டின் மதுரையில் நடைபெற்றது.

இம்மாநாடு உலகத் தமிழர் பேரமைப்பின் தலைவர் பழ. நெடுமாறன் தலைமையில் இடம்பெற்றது.

மதுரை மாநகரில் உள்ள அரசடிப் பகுதியில் இறையியல் கல்லூரி வளாகத்தில் நடைபெற்ற இம்மாநாட்டில் ஏராளமான தமிழக எழுத்தாளர்களும், வெளிநாடுகளைச் சேர்ந்த எழுத்தாளர்களும் பங்கேற்று உரையாற்றினர்.

தமிழ் எழுத்துலகிற்கு அருந்தொண்டாற்றி வரும் எழுத்தாளர்களான தி.க. சிவசங்கரன், கி. இராஜநாராயணன், எஸ். பொன்னுத்துரை (எஸ்.பொ.), ஜே.வி. கண்ணன், வே. தங்கவேலு (நக்கீரன்) ஆகியோருக்கு "உலகப் பெருந்தமிழர்' விருது வழங்கி மதிப்பளிக்கப்பட்டது.

இந்திய கம்யூனிஸ்ட் கட்சித் தலைவர் சி. மகேந்திரன் இலங்கை பாராளுமன்ற உறுப்பினர்களான சேனாதிராஜா, சிவாஜிலிங்கம்,கவிஞர்களான காசி ஆனந்தன், இன்குலாப், மணியரசன், தியாகு, க. நெடுஞ்செழியன், பேரா. ஜெயராமன், அழகிய பெரியவன், முனைவர் தமிழண்ணல், பேரா. பர்வீன் சுல்தானா, எழுத்தாளர்களான சூரியதீபன், மரு. இந்திரகுமார் (லண்டன்), கலைச்செல்வன் (மியான்மர்), மு. பாலசுப்பிரமணியம், சா. சந்திரேசன், இராசேந்திரசோழன், மெல்கியோர், பசுபதி பாண்டியன் உட்பட பல்வேறு கட்சிகளையும் அமைப்புக்களையும் சேர்ந்த எழுத்தாளர்களும் தலைவர்களும் பங்கேற்று உரையாற்றினர்.

பாசறைப் பாணர் தேனிசை செல்லப்பாவின் எழுச்சியூட்டும் இசை நிகழ்ச்சியும் நடைபெற்றது.

மாநாட்டிற்கு தமிழகம் முழுவதிலும் இருந்து தமிழின உணர்வாளர்கள் பெருமளவிலானோர் பங்கேற்றனர்.

2008ஆம் ஆண்டிற்கான தமிழீழ கிண்ணத்தை பிரித்தானியா சுவீகரித்தது

2008-08-18T05:14:00.000-07:00

சுவிற்சர்லாந்தில் நடைபெற்ற தமிழீழ கிண்ணத்திற்கான அனைத்துலக ரீதியான விளையாட்டுப் போட்டியில், தமிழீழ சுழல் கிண்ணத்தினை பிரித்தானியா பெற்றுள்ளது.

நேற்றிரவு (ஞாயிற்றுக்கிழமை) மின்னொளியில் நடைபெற்ற விறுவிறுப்பான உதைபந்தாட்ட இறுதிச்சுற்றில் நெதர்லாந்து, பிரித்தானியா அணிகள் மோதின.

குறிக்கப்பட்ட நேரத்தில் எந்தவொரு அணியும் புள்ளி பெறாத நிலையில், தண்ட உதை மூலம் பிரித்தானிய அணி வெற்றி பெற்றது.

உதைபந்தாட்டம் மட்டுமன்றி, துடுப்பாட்டம், கரப்பந்தாட்டம், வலைப்பந்தாட்டம், பெண்களிற்கான உதைபந்தாட்டம், பெண்களிற்கான கரப்பந்தாட்டம், பார்வையாளர்களுக்கான குண்டு எறிதல், ஈட்டி எறிதல், குறிபார்த்துச் சுடுதல், சிறுவர்களுக்கான மெய்வல்லுனர் போட்டிகள் என பல போட்டிகள் இடம்பெற்றன.

சுவிஸ் தமிழர் இல்லத்தினால் அனைத்துலக ரீதியாக நடத்தப்பட்ட இந்த தமிழீழ கிண்ணத்திற்கான உதைபந்தாட்டம், மற்றும் ஏனைய போட்டிகள் மாபெரும் விளையாட்டு விழாவாக கடந்த இரண்டு தினங்களும் இடம்பெற்றன.

சுவிற்சர்லாந்தில் இருந்து மட்டுமன்றி பிரித்தானியா, நெதர்லாந்து, டென்மார்க், பிரான்ஸ் என ஏனைய பல ஐரோப்பிய நாடுகளில் இருந்து அணிகள் போட்டிகளில் கலந்து கொண்டிருந்தன.

சுவிற்சர்லாந்தில் நடைபெற்ற 2008ஆம் ஆண்டிற்கான இந்த மாபெரும் விளையாட்டு விழாவை ஐரோப்பிய தொலைக்காட்சி இரண்டு நாட்களும் முழுமையாக ஒளிப்பதிவு செய்திருந்தது.

அதுமட்டுமன்றி, பார்வையாளர்களாகவும், போட்டியாளர்களாகவும் கலந்துகொண்டிருந்த மக்கள் மத்தியில் பல்வேறு நிகழ்ச்சிகளையும் ஐரோப்பிய தொலைக்காட்சி நடத்தியிருந்தது.

செட்டிக்குளத்தில் ஒருவர் காணாமல் போயுள்ளார்

2008-08-18T05:11:00.000-07:00

வவுனியா செட்டிக்குளம் பிரதேசத்தை சேர்ந்த ஒருவர் கடந்த வியாழக்கிழமை முதல் காணாமல் போயிருப்பதாக காணாமல் போனவரின் தாயார் செட்டிக்குளம் காவற்துறையில் முறைப்பாடு செய்துள்ளார். தில்லையம்பலம் தில்லைராசா என்பவரே காணாமல் போயுள்ளார்.

செட்டிக்குளம் பிரதேச கூட்டுறவுச் சங்க விவகாரமாக வீட்டில் இருந்து சென்ற அவர் வீடு திரும்பவில்லை என அவரது தாய் தனது முறைப்பாட்டில் கூறியுள்ளார்.தனது மகன் வீடு திரும்பிக் கொண்டிருந்த போது,

மோட்டார் சைக்கிளில் சென்ற இனந்தெரியாதவர்களினால் அழைத்துச் செல்லப்பட்டுள்ளதாகவும் தனது மகனுக்கு எந்த அரசியல் அமைப்புகளிடனோ, இயக்கங்களுடனோ தொடர்பில்லை என தாயார் காவல்துறையினரிடம் கூறியுள்ளார்.

மணலாற்றில் மின்னல்தாக்கி நான்கு இராணுவத்தினர் பலி, இருவர் காயம்

2008-08-18T05:06:00.001-07:00

நேற்று ஞாயிற்றுக்கிழமை மணலாறு, ஆந்தான்குளம் பகுதியில் மின்னதாக்குதல் காரணமாக இராணுவத்தினர் நால்வர் பலியாகியுள்ளதுடன்,

மேலும் இருவர் காயமடைந்த நிலையில் அனுராதபுர மருத்துவமனையில் அனுமதிக்கப்பட்டுள்ளதாக இராணுவப் பேச்சாளர் பிரிகேடியர் உதய நாயணக்கார தெரிவித்துள்ளார்.

நேற்று மாலை வேளையில் உளவு இயந்திரம் ஒன்றில் அந்தான்குளம் பகுதி ஊடாக இராணுவத்தினர் பயணித்தக்கொண்டிருந்தவேளையிலேயே இவர்களை மின்னல் தாக்கியதாகவும், இந்த மின்னல் தாக்கம் காரணமாக நான்கு இராணுவத்தினர் சம்பவ இடத்திலேயே உடல் கருகிய நிலையில் மரணமடைந்ததாகவும்,

இதில் காயமடைந்த இராணுவத்தினர் இருவர் அவசரமாக அனுராதபுரம் மருத்துவமனைக்கு கொண்டு செல்லப்பட்டு அனுமதிக்கப்பட்டுள்ளதாகவும் தெரிவிக்கப்பட்டுள்ளது.

அமைச்சர் மேர்வின் சில்வா உள்ளிட்ட நால்வரை கைதுசெய்யுமாறு பொலிஸ்மா அதிபருக்கு நீதிமன்றம் உத்தரவு

2008-08-18T05:04:00.000-07:00

தனியார் தொலைக்காட்சி நிறுவனப் படப்பிடிப்பாளரைத் தாக்கி அவரிடமிருந்து கமரா உபகரணங்களைப் பறித்தமை தொடர்பாக தொழில் அமைச்சர் மேர்வின் சில்வா உட்பட நால்வரை கைதுசெய்து நீதிமன்றத்தில் நிறுத்துமாறு கொழும்பு மாவட்ட நீதிமன்றம், பொலிஸ்மா அதிபருக்குப் பணிப்புரை விடுத்துள்ளது.

கொழும்பு மாவட்ட மேலதிக நீதவான் மஞ்சுல திலகரட்ண இந்தப் பணிப்புரையை விடுத்துள்ளார். அமைச்சருடன், களனி பிரதேச சபை உறுப்பினர் பிரசன்ன ரணவீர, நிஹால் சில்வா, துலான் ஆசிரி ஆகிய மூவரையுமே கைதுசெய்யுமாறு நீதிமன்றம் உத்தரவிட்டுள்ளது.

களினியில் புதிதாக அமைக்கப்பட்ட மேம்பாலத் திறப்புவிழாவைப் படம்பிடிக்கச் சென்ற தனியார் தெலைக்காட்சி நிறுவனமான சிரச தொலைக்காட்சியின் படப்பிடிப்பாளரின் வீடியோ கமரா அமைச்சர் மேர்வின் சில்வா உள்ளிட்ட குழுவினரால் பறிக்கப்பட்டதுடன், அவரும் தாக்குதலுக்குள்ளாகியிருந்தார்.

இந்தச் சம்பவம் தொடர்பாக பொலிஸில் முறைப்பாடு செய்யப்பட்டிருந்ததுடன், நீதிமன்றத்திலும் வழக்குத் தாக்கல் செய்யப்பட்டிருந்தது. இந்தச் சம்பவத்துடன் தொடர்புடையவர்களை உடனடியாகக் கைதுசெய்யுமாறு நீதிமன்றம் கடந்தவாரம் அறிவித்திருந்த நிலையில், அமைச்சர் மேர்வின் சில்வா உள்ளிட்ட நால்வரை உடனடியாக கைதுசெய்து நீதிமன்றத்தில் நிறுத்துமாறு கொழும்பு மாவட்ட நீதிமன்றம் இன்று திங்கட்கிழமை பொலிஸ்மா அதிபருக்குப் பணிப்புரை வழங்கியுள்ளது.

படப்பிடிப்பாளர் தாக்கப்பட்டமை தொடர்பாக அமைச்சர் உள்ளிட்ட நால்வரிடமும் விசாரணைகள் மேற்கொள்ளப்பட்டு வருவதாக பேலியோகொட பொலிஸ் தலைமையம், நீதிமன்றத்திற்கு அறிவித்தது. விசாரணைகளைப் பக்கச்சார்பின்றி நடத்துமாறு நீதிமன்றம் பொலிஸாருக்கு உத்தரவிட்டிருந்தது.

ஊடகவியலாளர்களைத் தாக்கிய சம்பவங்கள் தொடர்பாக அமைச்சர் மேர்வின் சில்வா மீது பல்வேறு குற்றச்சாட்டுக்கள் சுமத்தப்பட்டுள்ள போதும், இம்முறையே முதன் முறையாக அவரைக் கைதுசெய்யுமாறு நீதிமன்றம் உத்தரவிட்டுள்ளது.

அசாங்க ஊடகமான இலங்கை ஒளிபரப்புக் கூட்டுத்தாபனத்துக்குள் நுழைந்து செய்திப் பணிப்பாளரைத் தாக்கியதுடன், அத்திரமடைந்த கூட்டுத்தானப் பணியாளர்களால் அமைச்சர் தாக்கப்பட்டிருந்தார். இந்தச் சம்பவத்தைத் தொடர்ந்து உரிய விசாரணைகளை மேற்கொள்வதற்கு ஆணைக்குழுவொன்று நியமிக்கப்பட்டபோதும் அது உரிய விசாரணைகளை துரிதமாக மேற்கொண்டிருக்கவில்லை. மாறாக இலங்கை ஒளிபரப்புக் கூட்டுத்தாபனப் பணியாளர்களே இனந்தெரியாத குழுவினரால் தாக்கப்பட்டு வந்தனர்.

இவ்வாறு ஊடகங்களுக்கு எதிராகச் செயற்படும் அமைச்சர் மேர்வின் சில்வாவுக்கு எதிராக கடும் நடவடிக்கை எடுக்கப்படவேண்டும் என சர்வதேச ஊடக அமைப்புக்கள் தொடர்ந்தும் கோரிக்கைவிடுத்துவரும் நிலையில், அமைச்சரைக் கைதுசெய்யுமாறு கொழும்பு மாவட்ட நீதிமன்றம் இன்று உத்தரவுபிறப்பித்துள்ளது.

புலிகளைத் தோற்கடிக்கும் வலுவான நிலையில் படையினர் - இந்திய பாதுகாப்பு உயர் அதிகாரி

2008-08-18T05:01:00.000-07:00

தமிழீழ விடுதலைப் புலிகள் அமைப்பைத் தோற்கடிக்கக் கூடிய வலுவான நிலையில் அரச படையினர் காணப்படுவதாக இந்திய அமைதி காக்கும் படையின் உயரதிகாரி அசோக் மேதா தெரிவித்துள்ளார்.

முன்னர் ஒருபோதும் இல்லாத வகையில் தமிழீழ விடுதலைப் புலிகளை தோற்கடிக்கக் கூடிய வலுவான நிலையில் தற்போது அரச படையினர் திகழ்வதாக தி ஸ்டேட்மன் பத்திரிகைக்கு அசோக் மேதா செவ்வியளித்துள்ளார்.

1987 – 1990ம் ஆண்டு காலப்பகுதியில் இந்திய அமைதி காக்கும் படையினரின் மட்டக்களப்பு மாவட்ட கட்டளைத் தளபதியாக அசோக் மேதா கடமையாற்றியிருந்தார் என்பது குறிப்பிடத்தக்கது.

வன்னிப் பகுதிக்கான தபால் விநியோகம் துண்டிக்கப்பட்டிருப்பதாக மக்கள் விசனம்

2008-08-18T04:59:00.000-07:00

விடுதலைப் புலிகளுக்கும், இலங்கை இராணுவத்தினருக்கும் இடையில் வன்னிப் பகுதியில் இடம்பெற்றுவரும் மோதல்களைத் தொடர்ந்து கடந்த 8ஆம் திகதியிலிருந்து தபால் விநியோகத்தை இலங்கை அரசாங்கம் இடைநிறுத்தியிருப்பதாக பிராந்தியத் தகவல்கள் தெரிவிக்கின்றன.

வன்னிப் பகுதிக்கான தொலைத்தொடர்புகளை ஏற்கனவே துண்டித்திருந்த அரசாங்கம் தற்பொழுது தபால் விநியோகத்தையும் இடைநிறுத்தியிருப்பதாகவும், இதனால் அங்குள்ள மக்களுடனான தொடர்புகள் முற்றாகத் துண்டிக்கப்பட்டிருப்பதாகவும் தமிழ்நெட் இணையத்தளம் செய்தி வெளியிட்டுள்ளது.

அரசாங்க மற்றும் தனியார் தபால் விநியோகங்கள் முற்றாக இடைநிறுத்தப்பட்டுள்ளதாக அந்தச் செய்தியில் குறிப்பிடப்பட்டுள்ளது. இதுவரை காலமும் வவுனியாவிலிருந்து கிளிநொச்சிக்கு எடுத்துச்செல்லப்பட்ட தபால் பொதிகள் கிளிநொச்சி மாவட்டத்திலுள்ள 8 தபால் நிலையங்கள் மூலம் மக்களுக்கு விநியோகிக்கப்பட்டன. எனினும், அவை தற்பொழுது செயலிழந்திருப்பதாகக் கூறப்படுகிறது.

வன்னிப் பகுதிக்கான தொலைபேசி இணைப்புக்கள் யாவும் துண்டிக்கப்பட்டிருப்பதால் மக்கள் இடம்பெயர்ந்துள்ள நிலையிலும் தமது நிர்வாகப் பணிகளை முன்னெடுத்துச்செல்வதில் சிரமங்களை எதிர்நோக்குவதாக கிளிநொச்சி அரசாங்க அதிபர் அலுவலகம் குறைப்பட்டிருப்பதாக தமிழ்நெட் தனது செய்தியில் தெரிவித்துள்ளது.

இடம்பெயர்ந்திருக்கும் இலட்சக்கணக்கானவர்களுக்கு வழங்கப் போதியளவு உணவுப் பொருள்கள் மற்றும் மருந்துப் பொருள்கள் இல்லாமை, இவற்றை நிவர்த்தி செய்வது தொடர்பாக உரிய தரப்புடன் தொடர்புகொள்ளமுடியாதிருப்பதாக கிளிநொச்சி அரசாங்க அதிபர் அலுவலகம் கூறியுள்ளது.

இதேவேளை, கிளிநொச்சி மாவட்டத்திலுள்ள இலங்கை வங்கி, மக்கள் வங்கி மற்றும் தேசிய சேமிப்பு வங்கி ஆகியவற்றில் திரவப்பணத்துக்குத் தட்டுப்பாடு ஏற்பட்டிருப்பதாகவும், வங்கிகளிலிருந்து 5 இலட்சம் ரூபாவிலிருந்து 1 இலட்சம் ரூபா வரையிலான பணத் தொகைகளே மீளப்பெற்றுக்கொள்வதற்கு அனுமதிக்கப்படுவதாகவும் தமிழ்நெட் செய்தியில் குறிப்பிடப்பட்டுள்ளது.

கிளேமோர் தாக்குதல்கள் இடம்பெறுவதால் வவுனியாவிலிருந்து கிளிநொச்சிக்குப் பணத்தை எடுத்துச் செல்வதற்கு அதிகாரங்கள் பின்னடிப்பதாகக் கூறப்படுகிறது.

ஆயுத தளபாடங்கள் கப்பல் கப்பலாகப் பாகிஸ்தானிலிருந்து 10 நாட்களுக்கு ஒருமுறை: எதிர்வரும் மாதங்களில் அனுப்புவதற்கு உறுதிமொழி

2008-08-18T04:57:00.002-07:00

எதிர்வரும் மாதங்களில் 10 நாட்களுக்கு ஒரு கப்பல் என்ற அடிப்படையில் இலங்கைப் படைகளுக்குத் தேவையான ஆயுத தளபாடங்களைத் தவறாது அனுப்பி வைப்பதற்கு இலங்கைக்கு உறுதியளித்திருக்கின்றது பாகிஸ்தான். கொழும்பு ஆங்கில வார இதழ் ஒன்று இவ்வாறு நேற்றுத் தகவல் வெளியிட்டிருக்கின்றது.

அந்த வார இதழ் மேலும் தெரிவித்திருக்கும் சில தகவல்கள் வருமாறு:-

விடுதலைப்புலிகளுக்கு எதிரான இராணுவ நடவடிக்கைகளுக்குப் பாகிஸ்தான் உறுதியான ஆதரவை வழங்குகின்றது. இராணுவ நடவடிக்கைக்கு அவசியமான பொருள்களுடன் கப்பல்கள் கொழும்பிற்கும் கராச்சிக்கும் இடையில் அடிக்கடி பயணிக்கின்றன.

பாகிஸ்தான் தனது ஆயுதத் தளபாடத் தொழிற்சாலைகளிலிருந்தும் தனது இராணுவத்தின் சேமிப்புக் களஞ்சியங்களிலிருந்தும் இலங்கைக்கு அவசியமான ஆயுதத் தளபாடங்களை வழங்குகின்றது.

மேலும் இலங்கையுடனான தனது உறவின் ஆழத்தைப் புலப்படுத்துவதற்காக எதிர்வரும் மாதங்களில் இராணுவ நடவடிக்கைகளுக்கு அவசியமான பொருள்களுடன் 10 நாட்களுக்கு ஒரு கப்பல் என்ற அடிப்படையில் இலங்கைக்கு அனுப்பி வைக்க இஸ்லாமாபாத் உறுதியளித்துள்ளது.

இவ்வாறான உறுதிமொழியும் வலுவான ஆதரவுமே இவ்வருட இறுதிக்குள் கிளிநொச்சியைக் கைப்பற்றிவிடுவோம் என அரசு அறிவிப்பதற்குக் காரணமாக அமைந்துள்ளன.

இலங்கை இராணுவத் தளபதிக்கும் பாகிஸ்தானின் முப்படைத் தளபதி அஸ்வக் பேர்வெஸ் கயானிக்கும் இடையில் தனிப்பட்ட நட்புறவு காணப்படுகின்றது. இதன் காரணமாக இலங்கை இராணுவத்திற்கு உடனடியாக விநியோகம் தேவைப்பட்ட வேளை அவர் அவற்றை வழங்க முன்வந்துள்ளார்.

இலங்கைக்கு அவசரமாகத் தேவைப்பட்ட இராணுவத் தளபாடங்களை உற்பத்திசெய்து வழங்குவதற்குச் சிலகாலம் பிடிக்கும் என்பதால் அதுவரை காத்திருக்காது உடனடியாக அவற்றை விநியோகிக்கும் நோக்கில் பாகிஸ்தான் இராணுவத்திற்கு எழக்கூடிய பாதிப்பையும் புறமொதுக்கி, அதன் சேமிப்புக் களஞ்சியங்களிலிருந்து அவற்றை எடுத்து விநியோகிக்க அவர் நடவடிக்கை எடுத்துள்ளார். என்றும் அந்த ஆங்கில நாளேட்டில் கூறப்பட்டுள்ளது.

மாகாணசபைகளுக்கு கூடுதல் அதிகாரங்களைப் பகிரக்கூடிய தீர்வே முன்வைக்கப்படும்- திஸ்ஸ வித்தாரண

2008-08-18T04:57:00.001-07:00

ஐக்கிய இலங்கைக்குள் மாகாணங்களுக்கு கூடியளவு அதிகாரங்களைப் பகிரக்கூடியவகையிலான இறுதித் தீர்வொன்றையே சர்வகட்சிப் பிரதிநிதிகள் குழு முன்வைக்கும் என சர்வகட்சிப் பிரதிநிதிகள் குழுவின் தலைவர், அமைச்சர், பேராசிரியர் திஸ்ஸ வித்தாரண தெரிவித்துள்ளார்.

சமஷ்டித் தீர்வொன்றை முன்வைப்பதற்கு சர்வகட்சிப் பிரதிநிதிகள் குழு முயற்சிப்பதாக ஜாதிக ஹெல உறுமய முன்வைத்திருக்கும் குற்றச்சாட்டை மறுத்திருக்கும் அமைச்சர், மாகாணசபைகளுக்குக் கூடுதல் அதிகாரங்களைப் பகிரக்கூடிய தீர்வே முன்வைக்கப்படும் எனக் கூறியுள்ளார்.

“கடந்த திங்கட்கிழமை நடைபெற்ற சர்வகட்சிப் பிரதிநிதிகள் குழுக் கூட்டத்தில் ஐக்கிய இலங்கைக்குள் கூடுதலான அதிகாரங்களைப் பகிர்வது தொடர்பாக சர்வகட்சிப் பிரதிநிதிகள் குழு உறுப்பினர்கள் கவனம் செலுத்தியிருந்தனர். வடஅயர்லாந்துப் பிரச்சினையை அதிகாரப் பகிர்வின்மூலம் தீர்ப்பதில் ஐக்கிய இராச்சியத்துக்கு ஏற்பட்ட அனுபவங்களை நாம் எமது வெளிநாட்டுப் பயணத்தின்போது அறிந்துகொண்டிருந்தோம். வெளிநாட்டுப் பயணங்கள் மூலம் எமக்குக் கிடைத்த அனுபவங்களை தமிழ் மக்கள் விடுதலைப் புலிகள் அமைப்பின் பிரதிநிதிகள் உட்பட அனைத்துக் கட்சிப் பிரதிநிதிகளுடனும் நாம் பகிர்ந்துகொண்டோம்” என அமைச்சர் தெரிவித்தார்.

சர்வகட்சிப் பிரதிநிதிகள் குழவிலிருந்து ஜாதிக ஹெல உறுமய வெளியேறியுள்ளதுடன், ஐக்கிய தேசியக் கட்சி மற்றும் ஜே.வி.பி. போன்ற கட்சிகள் தொடர்ந்தும் சர்வகட்சிப் பிரதிநிதிகள் குழுவிலிருந்து விலகியே உள்ளன.

இதேவேளை, இலங்கையின் இனப்பிரச்சினையைத் தீர்வுக்குக் கொண்டுவருவதற்கு சர்வகட்சிப் பிரதிநிதிகள் குழு ஒரு பயனுள்ள அமைப்பு என்ற நிலைப்பாட்டையே பிரதான எதிர்க்கட்சியான ஐக்கிய தேசியக் கட்சி கொண்டுள்ளது. சர்வகட்சிப் பிரதிநிதிகள் குழுவின் செயற்பாடுகளை மேலும் வலுப்படுத்துவதற்கு சில மாற்றங்கள் செய்யவேண்டி இருப்பதாக சர்வகட்சிப் பிரதிநிதிகள் குழுவுக்கான ஐக்கிய தேசியக் கட்சியின் பாராளுமன்ற உறுப்பினர் கே.என்.சொக்சி தெரிவித்துள்ளார். சர்வகட்சிப் பிரதிநிதிகள் குழுவின் செயற்பாடுகளுக்குத் தடையாக சில காரணிகள் இருப்பதாக அவர் சுட்டிக்காட்டியுள்ளார்.

“முதலாவதாக, சர்வகட்சிப் பிரதிநிதிகள் குழுவில் தமிழ் கட்சிகள் பங்கெடுக்கவில்லை. இரண்டாவதாக, ஐக்கிய தேசியக் கட்சிக்கு அழைப்பு விடுக்கப்பட்டிருந்தாலும், சிறிலங்கா சுதந்திரக் கட்சியும் அதன் பங்காளிகளும் இனப்பிரச்சினைத் தீர்வு தொடர்பாக பொதுவான இணக்கப்பாடொன்றுக்கு வரவேண்டும். ஆளும் கட்சியின் பங்காளிக் கட்சிகள் ஒவ்வொன்றும் வௌ;வேறான தீர்வுயோசனைகளை முன்வைத்தால் அது இறுதி முடிவொன்றுக்குச் செல்வதற்குத் தடையாக இருக்கும்” என சொக்சி கூறியுள்ளார்.

அதேநேரம், மாகாணசபைகளுக்கு அதிகாரங்களை வழங்கும் சர்வகட்சிப் பிரதிநிதிகள் குழுவில் தாம் பங்கேற்க முடியாது என ஜாதிக ஹெல உறுமயவின் தலைவர் எல்லாவல மேதானந்த தேரர் மீண்டும் வலியுறுத்தியுள்ளார்.

மடுமாதா தரிசனம் - தமிழ்க் கத்தோலிக்கர்களுக்கு அனுமதி மறுப்பு

2008-08-18T04:54:00.000-07:00

மடு தேவாலயத்தின் ஆவணி மாதத் திருவிழா இம்முறை நடைபெறாத போதும், திருவிழாவையொட்டி நடைபெற்ற திருப்பலிப் பூசை மற்றும் திருச் சொரூப ஆராதனை வழிபாட்டில் கலந்து கொள்வதற்காகச் சென்ற வவுனியா மற்றும் மன்னாரைச் சேர்ந்த தமிழ் கத்தோலிக்கர்கள் படையினரால் அனுமதிக்கப்படவில்லை.

சிங்கள பக்தர்கள் மட்டுமே அனுமதிக்கப்பட்டனர். இந்த வழிபாட்டில் கலந்து கொள்வதற்காக வெள்ளிக்கிழமை மூன்று அமைச்சர்களும் சுமார் 500 சிங்கள கத்தோலிக்கர்களும் தென்பகுதியிலிருந்து மடுவுக்கு படையினரால் அழைத்துச் செல்லப்பட்டிருந்தனர்.

மதவாச்சி ஊடாக மட்டுமே சிங்கள பக்தர்கள் மடுவுக்குச் செல்ல அனுமதிக்கப்பட்டு வந்ததால் மன்னார் மற்றும் வவுனியாவிலிருந்து பல தமிழ் கத்தோலிக்கர்கள் மதவாச்சிக்கு சென்றிருந்தனர். எனினும், தமிழர்கள் எவரும் மடுவுக்குச் செல்ல அனுமதிக்கப்படவில்லை.

இதேநேரம், மடுக்கோவிலுக்குச் செல்வதற்கு விரும்புவதாக வவுனியா இராணுவ முகாமுடன் தொடர்பு கொண்டு தமிழ்த் தேசியக் கூட்டமைப்பு வன்னி மாவட்ட எம்.பி. சிவநாதன் கிசோர் கேட்டபோது, மதவாச்சிக்கு வந்தால் பொலிஸ் பாதுகாப்புடன் அங்கு அழைத்துச் செல்ல முடியுமெனத் தெரிவித்தனர்.

பொலிஸாரின் பாதுகாப்பின்றி தானாகச் செல்ல வேண்டுமானால் பாதுகாப்பு அமைச்சின் அனுமதி பெறப்பட வேண்டுமென சிவநாதன் கிசோருக்குத் தெரிவிக்கப்பட்டுள்ளது.