விமானப் படை வீரரின் துப்பாக்கியைப் பறிக்க முயன்ற இருவர் மீது தாக்குதல் ஒருவர் பலி, மற்றவர் காயம்

திருகோணமலை கந்தளாய் தம்பலகாமம் பகுதியில் கடமையில் ஈடுபட்டிருந்த விமானப் படை வீரர் ஒருவரின் துப்பாக்கியை பலவந்தமாகப் பறிக்க முற்பட்டவர்கள் மீது விமானப் படைவீரர் நடத்திய தாக்குதலில் ஒருவர் கொல்லப்பட்டும், மற்றையவர் காயமடைந்தும் உள்ளார்.

இச்சம்பவம் நேற்று இரவு 11.30 மணியளவில் இடம்பெற்றுள்ளது. பற்றைக்குள் இருந்து பாய்ந்து வந்த இருவர் விமானப் படைவீரரைத் தள்ளிவிட்டு அவரது ஆயதத்தை பறிக்க முற்பட்டுள்ளனர்.

எனினும் சுதாகரித்துக் கொண்ட விமானப் படைவீரர் மேற்கொண்ட துப்பாக்கிப் பிரயோகத்தில் ஒருவர் கொல்லப்பட்டு, ஏனையவர் காயமடைந்துமுள்ளார்.

பொலிசாரின் ஆரம்ப கட்ட விசாரணைகளில் இவர்கள் இருவரும் புலி உறுப்பினர்களாக இருக்கலாம் என சந்தேகம் தெரிவித்துள்ளனர்.


இதேவேளை நேற்றிரவு உப்புவெளி அபேபுர பகுதியில் புலிகள் எனச் சந்தேகிக்கப்படுபவர்களால் வர்த்தகர் ஒருவர் சுட்டுக் கொல்லப்பட்டுள்ளதாக தெரிவிக்கப்பட்டுள்ளது.

சுட்டுக் கொல்லப்பட்டவர் பாதுகாப்புத் தரப்பினரிடம் சுமுகமான உறவுகளை வைத்திருந்ததாகத் தெரிவிக்கப்படுகிறது.