நவம்பர் மாத இறுதியில் விடுதலைப் புலிகள் மாவீரர் தினத்தைக் கொண்டாடும்போது அங்கு எதுவும் இருக்காது- சரத் பொன்சேகா

இராணுவக் கட்டுப்பாடற்ற பகுதிகளிலுள்ள மக்களை இராணுவத்தினரின் முன்னரங்கப் பகுதிகளுக்கு வருமாறு இராணுவத் தளபதி லெப்டினட் ஜென்ரல் சரத் பொன்சேகா கோரிக்கை விடுத்துள்ளார்.

மன்னார், வவுனியா, மணலாறு பகுதிகளில் முன்னெடுக்கப்பட்டுவரும் மோதல்களில் இராணுவத்தினர் வெற்றிகரமாக முன்னேறிவரும் நிலையில், விடுதலைப் புலிகளின் பிடியில் சிக்கியிருக்கும் மக்கள் வெளியேறுவதற்கு இந்த மோதல்கள் உதவும் எனவும் கொழும்பு ஊடகமொன்றுக்கு வழங்கிய செவ்வியில் அவர் கூறியிருந்தார். இராணுவக் கட்டுப்பாடற்ற பகுதிகளிலிருக்கும் மக்களை, இராணுவத்தினரின் முன்னரங்கப் பகுதிகளுக்கு வருமாறு கோரிக்கை விடுத்திருக்கும் இராணுவத் தளபதி, தமது கட்டுப்பாட்டின்கீழிலிருந்து வெளியேறும் மக்களைத் தடுப்பதற்கு எதிரிகளுக்கு நேரம் இருக்காது எனவும் கூறியுள்ளார்.

2006-2007ஆம் ஆண்டு காலப் பகுதியில் கிழக்கில் முன்னெடுக்கப்பட்டதைப் போன்று தற்பொழுது வன்னியிலிருந்து பெருந்தொகையான மக்கள் வெளியேறுவார்கள் எனவும், அவர்களுக்கு பாதுகாப்புத் தரப்பினரிடமிருந்து பாதுகாப்பு வழங்கப்படும் எனவும் இராணுவத் தளபதி அந்த ஊடகத்துக்கு வழங்கியுள்ள செவ்வியில் கூறியுள்ளார்.

நவம்பர் மாத இறுதியில் விடுதலைப் புலிகள் மாவீரர் தினத்தைக் கொண்டாடும்போது அங்கு எதுவும் இருக்காதெனவும், விடுதலைப் புலிகள் பதுங்கு குழிகளுக்குள்ளேயே ஒன்றுகூடுவார்கள் எனவும் இராணுவத் தளபதி தெரிவித்தார்.

தற்பொழுது மல்லாவி-துணுக்காய் மற்றும் மாங்குளம்-வெள்ளான்குளம் பகுதிகளைக் கைப்பற்றும் முயற்சிகளில் இராணுவத்தினர் ஈடுபட்டிருப்பதாக அவர் தெரிவித்தார். இராணுவத்தின் 57 மற்றும் 59 பிரிவு இராணுவ முகாம்கள் முல்லைத்தீவை நோக்கிய படை நகர்வை முன்னெடுத்துவருவதாக சரத் பொன்சேகா தெரிவித்துள்ளார்.

“நேற்று மாலை மல்லாவி பகுதியிலிருந்து விடுதலைப் புலிகளின் சார்ள்ஸ் அன்டனி படைப்பிரிவின் பிரதித் தலைவர் உட்பட 27 பேரினது சடலங்களை மீட்டிருப்பதாகவும், கடந்த காலங்களில் விடுதலைப் புலிகள் வெளிநாடுகளிலிருந்து பெருமளவான ஆயுதங்களைக் கொண்டுவந்திருப்பதாகவும் கூறியுள்ளார்.

இதேவேளை, கிளிநொச்சி மற்றும் முல்லைத்தீவுப் பகுதிகளை நோக்கி ஒரு இலட்சத்துக்கும் அதிகமானவர்கள் இடம்பெயர்ந்திருப்பதாக அங்கிருந்து கிடைக்கும் தகவல்கள் தெரிவிக்கின்றன. மன்னார் மற்றும் வவுனியா முன்னரங்கப் பகுதிகளில் இராணுவத்தினருக்கும் விடுதலைப் புலிகளுக்கும் இடையில் இடம்பெற்றுவரும் கடுமையான மோதல்களால் அங்கிருந்து ஆயிரக்கணக்கான மக்கள் இடம்பெயர்ந்து முல்லைத்தீவு, கிளிநொச்சி பகுதிகளுக்குச் சென்றிருப்பதாகத் தகவல்கள் வெளியாகியுள்ளன.

இதேவேளை, நேற்று வெள்ளிக்கிழமை முல்லைத்தீவு-மாங்குளம் ஏ-9 வீதியில் இடம்பெற்ற கிளேமோர் தாக்குதலில் கிளிநொச்சி மாவட்ட செயலகத்தின் அபிவிருத்தி உத்தியோகஸ்தரும், பூநகரி பிரதேச பிரதி திட்டமிடல் பணிப்பாளருமான சாந்தலிங்கம் விமலகுமார் கொல்லப்பட்டார்.

மன்னார், வவுனியா பகுதிகளிலிருந்து இடம்பெயர்ந்திருக்கும் மக்களுக்குத் தேவையான உதவிகளை ஒருங்கமைத்துவிட்டு மோட்டார் சைக்கிளில் வவுனியா நோக்கிச் சென்றபோதே அவர் கொல்லப்பட்டதாகவும், இடம்பெயர்ந்த அரசாங்க உத்தியோகத்தர்களுக்கு உதவும் அமைப்பின் தலைவராக இவர் செயற்பட்டு வந்ததாகவும் கிளிநொச்சி மாவட்ட செயலக வட்டாரத் தகவல்கள் தெரிவிக்கின்றன.

கடந்த மாதம் இடம்பெற்ற கிளேமோர் தாக்குதலில் துணுக்காய் பிரதேச செயலாளர் நந்தகுமார் கொல்லப்பட்டிருந்தமை இங்கு குறிப்பிடத்தக்கது.