ராஜீவ் கொலையில் இன்னமும் மர்மம் இருக்கிறது...குமுதம் ரிப்போட்டர்,

வேலூர் சிறையில் நடந்த பிரியங்கா _ நளினி சந்திப்பு கடந்த ஒரு வார காலமாகவே சர்வதேச மீடியாக்களின் தலைப்புச் செய்திகளில் அடிபட்டு வருகிறது. தனது கணவர் ராஜீவ் காந்தியின் படுகொலை வழக்கில் சிறையில் அடைக்கப்பட்டிருக்கும் நளினி மீது, காங்கிரஸ் கட்சித் தலைவி சோனியா காட்டும் பரிவு, சர்வதேச அரங்கில் அவர் மீதான நன்மதிப்பை அதிகப்படுத்தியிருக்கிறது. தனது தந்தை கொலைக்கான நிஜப் பின்னணியை அறியும் பொருட்டே, கடந்த மார்ச் மாதம் 19_ம் தேதி பிரியங்கா, நளினியைச் சந்தித்ததாகவும் சொல்லப்படுகிறது.

இந்நிலையில், நளினியோடு ஆயுள் தண்டனைக் கைதியாக வேலூர் சிறையில் அடைக்கப்பட்டிருக்கும் ரவிச்சந்திரன், அவரது வழக்கறிஞர் மூலமாக நம்மைத் தொடர்பு கொண்டார். அதில், ‘இந்தப் படுகொலையில் இதுவரை வெளியில் வராத பல ரகசியங்கள் இருக்கின்றன. பிரியங்காவுக்கு முன்பே முன்னாள் ஜனாதிபதி வி.வி.கிரியின் மகளும் சிறையில் நளினியையும், எங்களையும் சந்தித்துப் பேசி தகவல்களைச் சேகரித்தார். கொலைக்குக் காரணமாகச் சொல்லப்படும் மனித வெடிகுண்டு தணு யார்? சதி வலைக்கு யார் காரணம்? என்பதை முதல்முறையாகப் பேச விரும்புகிறேன். என்னுடைய பதிலை விளக்கமாகவே எழுதி அனுப்புகிறேன்’ என தகவல் அனுப்பியிருந்தார்.

ராஜீவ் காந்தி கொலை வழக்கில் நளினியின் கணவர் முருகன் என்கிற ஸ்ரீகரன், சாந்தன், பேரறிவாளன் ஆகியோருக்கு தூக்கு தண்டனையும், நளினி, (இவரது தூக்கு தண்டனை சோனியா காந்தியின் சிபாரிசால் ஆயுள் தண்டனையாகக் குறைக்கப்பட்டது) ரவிச்சந்திரன், ராபர்ட் பயஸ், ஜெயக்குமார் ஆகியோருக்கு ஆயுள் தண்டனையும் விதிக்கப்பட்டது. இந்த ஆயுள் தண்டனைக் கைதிகளில் நளினியும், ரவிச்சந்திரனும் மட்டுமே தமிழ்நாட்டைச் சேர்ந்தவர்கள். மற்ற இருவரும் இலங்கையைச் சேர்ந்தவர்கள். 89_ம் ஆண்டில் தமிழ்நாடு மீட்சிப்படையின் தலைவராக இருந்த ரவிச்சந்திரன், இலங்கையில் ஆயுதப் பயிற்சியைப் பெற்றுவிட்டு, விடுதலைப்புலிகளின் நிலைப்பாட்டை தமிழ்நாட்டில் அதிகப்படுத்துவதற்காகச் செயல்பட்டவர். இவர் தந்தை ஓய்வு பெற்ற சப்_கலெக்டர். ராஜீவ் கொலையான ஆறு மாதங்களுக்குப் பிறகு கைது செய்யப்பட்ட இவருக்கு, சிறப்பு நீதிமன்றம் தூக்கு தண்டனை விதித்தது. பின்பு உச்ச நீதிமன்றத்தில் ஆயுள் தண்டனையாக குறைக்கப்பட்டது. தற்போது பதினேழு ஆண்டுகளாக சிறையில் அடைக்கப்பட்டிருக்கும் ரவிச்சந்திரன் எழுதிய கேள்வி_பதில் பாணியிலான விரிவான கடிதம் ஒன்று, அவரது வழக்கறிஞர்கள் மூலமாக கடந்த 19_ம் தேதி நமக்கு வந்தது. அந்தக் கடிதத்தைத்தான் இங்கே தந்திருக்கிறோம்.

பிரியங்கா_நளினி சந்திப்பிற்கு என்னதான் காரணம்?

“பிரியங்கா காந்தி கூறியுள்ளபடி இதுவொரு தனிப்பட்ட, அவரது சொந்த விருப்பத்தினாலான சந்திப்பாகவே நாம் கருதுகிறோம்.’’

அடுத்த வருடம் நடக்கவிருக்கும் பொதுத் தேர்தலில் ராகுல்காந்தியை பிரதமர் வேட்பாளராக முன் நிறுத்த காங்கிரஸ் கட்சி உத்தேசித்திருக்கும் சூழ்நிலையில், இந்தச் சந்திப்பில் முக்கியத்துவம் அடங்கியிருப்பதாகச் சொல்கிறார்களே?

“நீங்கள் சொல்வதில் உண்மையிருந்திருந்தால் சந்திப்பு நிகழ்ந்த நாளன்றே, அதாவது மார்ச் 19_ம் தேதியே காங்கிரஸ் கட்சியினராலும், பத்திரிகைகளாலும் விளம்பரப்படுத்தப்பட்டிருக்�
�ும். ஆனால், அப்படி எதுவும் நடக்கவில்லை. இப்பொழுது கூட வழக்கறிஞர் ஒருவரால்தான் இந்தச் சந்திப்பு பற்றிய செய்தி வெளியே தெரியவந்ததே தவிர, சம்பந்தப்பட்டவர்களால் அல்ல. அரசியலுக்கு அப்பாற்பட்டு, சோனியா காந்தியும், அவர் மகள் பிரியங்காவும், மகன் ராகுலும் இந்த விவகாரத்தில் காட்டி வரும் அணுகுமுறையை நாங்கள் மிகவும் மதிக்கிறோம்.’’

இந்த ரகசிய வருகைக்கான அவசியம்தான் என்ன?

“அதற்கு பிரியங்காவே பதில் அளித்திருக்கிறார். நளினியை நேருக்கு நேர் சந்தித்ததன் மூலம் தன் மனதில் நீண்ட காலம் இருந்த பாரத்தைப் போக்கி அமைதி தேடிக் கொண்டதாகச் சொல்லியிருக்கிறார். விரிவாகச் சொல்வதென்றால், ஆரம்பம் முதலே ராஜீவ் காந்தி கொலை விசாரணை குறித்து நடைபெற்ற புலனாய்வு பற்றி சோனியா காந்திக்கும், அவருடைய குடும்பத்தாருக்கும் எள்ளளவும் திருப்தியில்லை. குறிப்பாக, பிரியங்கா இந்த வழக்கு விசாரணைகளை ஆரம்பம் முதல் இன்றுவரை மிகவும் உன்னிப்பாக கவனித்து வந்திருக்கிறார். டெல்லியில் நடைபெற்ற ‘வர்மா கமிஷன்’, ‘ஜெயின் கமிஷன்’ விசாரணைகளை தவறாமல் கண்காணித்து வந்திருக்கிறார். கார்த்திகேயனின் சி.பி.ஐ. புலனாய்வு விசாரணைகளையும், அதன்பின் நடைபெற்ற நீதிமன்ற விசாரணைகளையும் அமைச்சர் சிதம்பரம் வாயிலாக தொடர்ந்து பின்பற்றி வந்திருக்கிறார். இவை எல்லாவற்றிலும் அவிழ்க்கப்படாத பல முடிச்சுகள் இருப்பது அவருக்குப்(பிரியங்கா) புலப்பட்டிருக்கிறது. குறிப்பாக, மனித வெடிகுண்டு என்று சொல்லப்பட்ட தணு குறித்து ஆதாரபூர்வமான அடையாளங்களை சி.பி.ஐ. இன்று வரை சந்தேகத்திற்கிடமில்லாமல் நிரூபிக்கவில்லை. தணு யார்? எந்த ஊர்? அவர் குடும்பம் எது? உறவினர்கள் யார்? என்று எந்த ஆதாரமும் இல்லை.

‘விடுதலைப் புலிகளின் உறுப்பினர் தணு, இவர்தான்’ என்று புகைப்படம் ஒன்றில் அடையாளப்படுத்தப்பட்ட கொடியேந்திய பெண் புலி, உண்மையில் அனுஜா என்பதும், அவர் தணு அல்ல என்பதும் அவருக்குத்(பிரியங்கா) தெரிய வந்திருக்கும் என்று நம்புகிறேன். மேலும், தடயவியல் மூலம் தணுவின் முகத்தையும், அனுஜாவின் புகைப்படத்தையும் கம்ப்யூட்டர் மூலம் ஒப்பிட்டு, இருவரும் ஒன்றே என்று அறிவியல் ரீதியாக விசாரணை நீதிமன்றத்தில் சி.பி.ஐ.யினால் சொல்லப்பட்டது. இதில், வினோதம் என்னவென்றால், இதே அனுஜாவை 91_ம் ஆண்டு செப்டம்பர் முதல் வாரத்தில், நான் யாழ்ப்பாணம் விடுதலைப் புலிகளின் முகாம் ஒன்றில் சந்தித்தேன். இந்த வழக்கில் கைது செய்யப்பட்டவர்களில் நான் ஒருவன் மட்டுமே, கொலை நடந்தபின் யாழ்ப்பாணம் சென்று மீண்டும் தமிழகம் திரும்பியவன். என்னுடைய கூற்றை அப்போது சி.பி.ஐ. உதாசீனம் செய்துவிட்டது. ஏனென்றால், என்னுடைய கூற்று அப்போது ஏற்கப்பட்டிருந்தால், தணு யார்? என்று அவர்கள் கட்டியிருந்த கதை, அடியோடு மண்ணாகிப் போயிருக்கும். அறிவியல் பொய்யாகாது. ஆனால், அந்த அறிவியலைக் கையாள்பவர்கள் பொய் உரைக்கலாம் என்று தெரிய வந்தது. இந்தப் புலனாய்வின் மீது பிரியங்காவுக்கு மேலும் சந்தேகத்தை உருவாக்கியிருக்கலாம்.

தவிர, மனித வெடிகுண்டில் பயன்படுத்தப்பட்டதாகச் சொல்லப்பட்ட பெல்ட் பாம் எங்கிருந்து, யாரால் வரவழைக்கப்பட்டது? யார் அதை உருவாக்கியது? என்பது இன்னும் யாருக்கும் தெரியவில்லை. அதேபோல், ராஜீவ் கொலையாவதற்குச் சில மணி நேரங்கள் முன்பாக கொழும்பில் உள்ள இந்தியத் தூதரகத்திற்கு கொலை குறித்து வந்த ‘எச்சரிக்கைத் தொலைபேசி’(பின்னர் உறுதிப்படுத்தப்பட்டது) யாரால், எங்கிருந்து பேசப்பட்டது? என்பதும் இன்றுவரை மர்மமாகவே உள்ளது.

ஜெயின் கமிஷனில் எழுப்பப்பட்ட பல சந்தேகங்களுக்கு இன்னும் விடையில்லை. அதற்காக, உருவாக்கப்பட்ட சி.பி.ஐ. தனிப்பிரிவான எம்.டி.எம்.ஏ(மல்டி டெவலப்பிங் மானிட்டரிங் ஏஜென்சி) புலனாய்வுப் பிரிவு இத்தனை ஆண்டுகள் ஆகியும் இன்னும் தன்னுடைய விசாரணையை முடிக்கவில்லை. கொலை நடந்த சில மாதங்களில் புலனாய்வு வலைக்குள் சிக்கிய சவூதி அரேபிய தனியார் வங்கியான பி.சி.சி.ஐ. திவாலான மர்மம் இன்னும் நீடிக்கிறது. இவை எல்லாவற்றிற்குமான விடை ஒருவேளை நளினியிடம் கிடைக்கலாம் என்ற எண்ணத்தில் பிரியங்கா வந்திருக்கலாம். ஏனென்றால், நளினி ஒருவர்தான் இந்த வழக்கில் தொடர்புடைய தணு, சுபாவுடன் நேரடியாகத் தொடர்பு கொண்டிருந்தார். அத்துடன், தன் தந்தையைக் கொல்லப்போகும் விஷயம் நளினிக்கு உண்மையிலேயே முன்பே தெரியுமா? தெரியாதா? என அறிந்து கொள்வதும் ஓர் காரணமாக இருக்கலாம்.’’

இதெல்லாம் இப்போது தெரிந்து அவர்களுக்கு என்ன பயன் இருக்கப் போகிறது?

“பத்திரிகைகளுக்கும், பாதிக்கப்பட்டவர்களுக்கும் உள்ள வித்தியாசம் இதுதான். மீடியாக்களுக்குத் தேவை செய்தி மட்டுமே. அவர்களுக்கு வேண்டியது உண்மை மற்றும் தெளிவு. அது அவர்களுக்குக் கிட்டவில்லை. ஏன்? தண்டனை அனுபவிக்கும் எங்களுக்கே கண்ணைக் கட்டி காட்டில் விட்ட நிலைதான் இன்றளவும். ராஜீவ்காந்தி கொலை பற்றி எல்லாம் தெரிந்துவிட்டது. நீதிமன்றத்தால் தீர்க்கப்பட்டுவிட்டது என்று பத்திரிகைகளும், மக்களும் நம்பினால் அது உங்கள் முதுகை நீங்களே தட்டிக் கொள்ளும் செயல்தான் என்பது என் கருத்து. இந்த வழக்கில் சி.பி.ஐ. கொலைச் சதியை எப்படி நிரூபித்தது? ஹரிபாபு எடுத்த புகைப்படங்களைக் கொண்டு! ‘விடுதலைப்புலிகளும், அதன் தமிழக ஆதரவாளர்களும் ஒன்றிணைந்து சதி செய்து ராஜீவைக் கொன்றனர். இதற்குக் காரணம், இந்திய ராணுவத்தை இலங்கைக்கு அனுப்பி விடுதலைப் புலிகளிடமிருந்து ஆயுதங்களைப் பறிக்க முனைந்ததும், இந்திய_இலங்கை ஒப்பந்தத்தை அமல்படுத்த முயன்றதும் பிரபாகரனுக்குப் பிடிக்கவில்லை.’ _ இதற்கு ஆதாரமாக சி.பி.ஐ.யினால் காட்டப்பட்டன பல்வேறு வரலாற்றுப் பதிவுகள்.

சதித்திட்டத்திற்கு ஆதாரமாகக் காண்பிக்கப்பட்டது, குற்றம் சாட்டப்பட்டவர்களிடம் இருந்து பெறப்பட்ட ஒப்புதல் வாக்குமூலம். அந்த ஒப்புதல் வாக்குமூலத்தில் சதித் திட்டம் பற்றி ஏதேனும் தெளிவாகக் கூறப்பட்டிருக்கிறதா? என்றால், அப்படி எதுவும் இல்லை. ஒவ்வொரு ஒப்புதல் வாக்குமூலத்திலும் உள்ள ஒரே ஒரு முக்கியமான வரி, ராஜீவ் கொல்லப்படப் போவது பற்றிய சந்தேகம் முன்பே எங்களுக்குத் தெரியும் என்பது போன்ற தோற்றம் அவ்வரிகளில் தொனிக்கும் என்பதுதான். இவற்றை எழுதியது யார் என்றால், அதே சி.பி.ஐ.யைச் சேர்ந்த ஓர் அதிகாரிதான். காவல்துறையின் ஒப்புதல் வாக்குமூலம் எப்படி பெறப்படும் என்பது யாவரும் அறிந்த செய்தி. அதை பிரியங்காவும் அறியாதவரல்ல. இதில் வேடிக்கை என்னவென்றால், அதே சி.பி.ஐ.யால் வேறொரு ஆதாரமாகச் சமர்ப்பிக்கப்பட்ட ஆவணத்தில், விடுதலைப் புலிகளின் புலனாய்வுப் பிரிவு தளபதி பொட்டு அம்மன், சிவராசனுக்கு அனுப்பியதாகச் சொல்லப்பட்ட வயர்லெஸ் செய்தியில் ராஜீவ் கொலை நடவடிக்கை தங்கள் மூவரைத் தவிர, அந்த அமைப்பின் அப்போதைய இரண்டாம் கட்டத் தலைவர்களுக்குக்கூட தெரியாது என்று கூறப்பட்டுள்ளதுதான்.

அப்படியிருக்கையில், குண்டு வெடிப்பிலும், அதன்பிறகு நடைபெற்ற தேடுதல் வேட்டையிலும், கொலையில் ஈடுபட்டதாகச் சொல்லப்படும் தணு, சிவராசன், சுபா ஆகியோர் கொல்லப்பட்ட நிலையிலும், கைது செய்யப்பட்ட சாமானியர்களான அதுவும் தமிழகத்தைச் சேர்ந்த நளினி, அறிவு மற்றும் என் போன்றோர்க்கு சதி குறித்து முன்பே தெரியும் என்று சி.பி.ஐ. சொன்னதை அவராலும், அவர் குடும்பத்தாலும் எப்படி நம்ப முடியும்? இதே கேள்வியினை அல்லது சந்தேகத்தை எட்டு வருடங்களுக்கு முன், அதாவது 2000_வது ஆண்டில் சோனியா குடும்பத்திற்கு மிகவும் நெருக்கமான மோகினிகிரி அம்மையார் (முன்னாள் ஜனாதிபதி வி.வி.கிரியின் மகள்) எம்மிடம் கேட்டார். அப்போது அவர் நளினியைச் சிறையில் சந்தித்துப் பேசியதோடு, ஆண்கள் மத்திய சிறையில் இருக்கும் ஏனைய ஆறு பேரையும் சந்தித்துப் பேசினார். அப்போதும் இதையேதான் நாம் அவர்களுக்குத் தெளிவுபடுத்தினோம்.

சி.பி.ஐ.யினர் நளினி_முருகன் காதலை கொலைச் சதிக்கு சாதகமாகப் பயன்படுத்தி, கதை பின்னி, விடுதலைப் புலிகள், அதன் ஆதரவாளர்கள்... என்பதுடன் ராஜீவ் கொலை விசாரணையின் புலனாய்வை மிகச் சுலபமாக முடித்துக் கொண்டனர். ‘நாட்டிற்கும், சோனியா குடும்பத்தினருக்கும் உண்மை விளங்க வேண்டுமென்றால் அனுஜா_தணு விவகாரத்தில் இந்திய அரசு அதிகாரிகள், தொடர்பில்லாத, நம்பகத்தன்மையுள்ள தடயவியல், கம்ப்யூட்டர் நிபுணர்களைக் கொண்டு மீளாய்வு செய்து, சி.பி.ஐ. கூற்றைச் சரி பாருங்கள்’ என்று விளக்கினோம். இப்போதும் அதையே கூறுகிறோம்.’’

அப்படியானால் இந்த வழக்கில் சி.பி.ஐ.யினர் உங்களை ஏன் சேர்த்தார்கள்? நளினியின் பங்குதான் என்ன?

“நளினியைப் பொறுத்தவரை அவர் ஸ்ரீபெரும்புதூர் கூட்டத்திற்கு தணு, சுபாவிற்கு துணையாகச் சென்றது தவிர, அவருக்கு வேறு எதுவும் தெரியாது. இதற்கு முன் அவர்களுடன் வி.பி. சிங் கூட்டத்திற்கும் நளினி சென்றிருக்கிறார். நான் உள்ளிட்ட ஏனையோர்கள் சிவராசனுடன், அமைப்பு ரீதியிலான, அரசியல் கருத்துக்களின் அடிப்படையிலான தொடர்பினையே மேற்கொண்டிருந்தோம். இதனாலேயே கொலைச்சதி குறித்து எங்களுக்கும் தெரியும் என்று சி.பி.ஐ. சொன்னது. இது விடுதலைப்புலிகள் குறித்தும், அதன் அமைப்பு குறித்தும் முறையான புரிதல் இல்லாமல் புனைந்துரைக்கப்பட்ட கட்டுக் கதை. செயல்பாட்டளவில் நாங்கள் சிவராசன் குழுவினருக்கு உதவினோம் என்று வைத்துக் கொண்டாலும், அதன்மூலம் குற்றத்திற்கு உடந்தையாக இருந்தோம் என்று நிரூபிக்கப்பட்டாலும்கூட, அதற்கான தண்டனை சட்டப்படி இரண்டு ஆண்டுகள் முதல் அதிகபட்சம் ஏழு ஆண்டுகள் மட்டுமே. எங்களுக்குத் தூக்கு தண்டனையும், ஆயுள் தண்டனையும் பெற்றுக் கொடுத்தது சி.பி.ஐ. எழுதிய ஒப்புதல் வாக்குமூலத்தில் காணப்படும் ‘கொலை நடக்கப்போவது எங்களுக்கு முன்பே தெரியும்’ என்ற ஒரு வரிதான்.’’

இனி உங்கள் எதிர்காலம்தான் என்ன?

“இன்னும் கேள்விக்குறியாகத்தான் உள்ளது. நாங்கள் அரசியல் கைதிகள். கிரிமினல்கள் அல்ல. கிரிமினல்களாக இருந்திருந்தால் பத்து அல்லது பதினான்கு ஆண்டுகளுக்குப்பின் விடுதலை ஆகியிருப்போம். எம் வழக்கில் அரசியல் கலந்துள்ளதால் எல்லா சட்ட, சிறை விதிகளுக்கு அப்பாற்பட்டு பதினேழு ஆண்டுகள் கடந்த பின்னரும் விடுவிக்கப்படாமல் உள்ளோம். நளினிக்கு அவர் குழந்தை அரித்ராவின் நலன் கருதி சோனியாகாந்தி கருணை காட்டினார். தற்போது பிரியங்காவும் நேரில் சந்தித்து பரிவுடன் பேசி, அவர் விடுதலை குறித்தும், குழந்தை குறித்தும் பேசி அறிந்திருக்கிறார். ஆனால், மூத்த அரசியல்வாதியான கலைஞர் தலைமையிலான தமிழக அரசு, ஜெயலலிதாவிற்கும், காங்கிரஸ் அரசியல்வாதிகளுக்கும் பயந்து, நளினி உள்ளிட்ட நான்கு ஆயுள் தண்டனைக் கைதிகளை விடுவித்தால், தமிழகத்தில் சட்டம், ஒழுங்கு பாதிக்கப்படும் என்று பொய்க் காரணம் கூறி எம்மை விடுதலை செய்ய மறுக்கிறது. அரசியலில் நீதி, நியாயம், சத்தியம் அனைத்தும் சாகடிக்கப்படுகின்றன. இந்தப் படுகொலையில் ஒளிந்திருக்கும் உண்மைகளை வெளிச்சத்திற்குக் கொண்டு வருவதும் அரசின் கடமைகளில் ஒன்று என்பதையும் இங்கு நினைவூட்ட விரும்புகிறேன்.’’ ஸீ

ஸீ ஏ.வி.ஆனந்த்

குமுதம் ரிப்போட்டர்